Qaravi Jiova Vakavuvale
1 Ena gauna vakaivolatabu, era dau cakava vata e levu na ka na vuvale. Era dau qarava na nodra itavi ni veisiga, o koya e bibi cake sara nira dau qaravi Jiova vata. (Vunau 10:12-14; Vkru. 31:12) Nikua, e levu na vuvale era sa sega ni dau cakacaka vata. Ia, era kila na lotu Vakarisito ni bibi na cakacaka vata vakavuvale, vakauasivi ena nodra qaravi Jiova. E dau vakamarautaki koya sara ga e tauyavutaka na vuvale ni raica na nodra qaravi koya ena duavata na vuvale!
2 Cakacaka Vakavunau: E dau vakaukauataka na veiwekani vakavuvale na nodra dau cakacaka vakavunau vata. O koya gona, ena sega wale ga ni cakacaka vata kei ira na lewe ni ivavakoso e dua na qase, e dodonu me na cakacaka vakavunau tale ga kei na watina vaka kina o ira na luvena. (1 Tim. 3:4, 5) Dina nira na osooso na ivakatawa dauveilakoyaki, era na tuvana mera na cakacaka vakavunau vata kei na watidra.
3 O ira na itubutubu era cakacaka vakavunau vata kei ira na luvedra, e rawa nira vukei ira mera daukaulotu sara. Ena sega wale ga ni raica o gone na nodrau marau kei na nodrau lomavakacegu nona itubutubu ena cakacaka vakavunau, ia ena raica tale ga ni rau lomani Jiova kei ira na tamata. (Vkru. 6:5-7) Nira tubu cake na gone ena sega ni yali vei ira na veika oqo. Ratou dau cakacaka vata vakavunau e dua na veiwatini kei na tolu na luvedrau tagane, e tiko na nodratou yabaki ni bula ena maliwa ni 15 ina 21. E kaya o tamadratou: “Keirau dau vakavulici iratou ena gauna kece, keirau qai dau saga me marautaki me veiuqeti tale ga na ka eratou vulica.”
4 Vakavakarau Vata: Era dau vakila na vuvale na yaga ni nodra vakavakarau vata ena cakacaka vakavunau. Era dau taleitaka sara vakalevu na gone ni veiveisau na nodra itavi nira vakatovotovo vakavuvale, oya mera itaukeinivale se mera vunau. So na vuvale era vakayagataka na iotioti ni vica na miniti ni nodra vuli vakavuvale mera vakatovotovo kina.
5 E dau marautaki vakalevu na noda cakava vata kei ira eda lomana e so na itavi bibi qai veivakacegui vaka oqo. E ka marautaki gona na nodra dau cakacaka vata vakavunau na lewenivuvale, ra veisikovi lesu, ra qai caka vuli iVolatabu! O koya gona, nida sokaloutaki Jiova tiko vakavuvale, e rawa nida kaya ena marau: “Koi au kei ira na noqu lewe-ni-vale, keitou na qaravi Jiova.”—Josua 24:15.