Meda Veivakayaloqaqataki

1. E gauna vinaka ni cava na nona dau veisiko na ivakatawa dauveilakoyaki?

¹ A vola ina ivavakoso mai Roma na yapositolo o Paula: “Ni’u sa gadreva vakalevu me’u raici kemuni ka vota vei kemuni e so na ka ni veivakalougatataki vakayalo me vakaukauwataki kemuni. Oya e kena i balebale, me da vukei kece kina, mo ni vukei au e na nomuni vakabauta, ka me’u vukei kemuni tale ga e na noqu vakabauta.” (Roma 1:​11, 12, VV) E gauna vinaka gona ni veivakaukauataki qai veivakayaloqaqataki na nona dau sikovi keda na ivakatawa dauveilakoyaki ena gauna oqo.

2. Cava e dau kacivaki rawa kina na nona veisiko na ivakatawa ni tabacakacaka?

² Na iVavakoso: E dau kacivaki ni se vo tu e tolu na vula nona veisiko mai na ivakatawa ni tabacakacaka ena ivavakoso. Oqo ena solia na gauna meda veisautaka kina noda ituvatuva, me rawa ni yaga vei keda nona veisiko. (Efeso 5:​15, 16) Ke da cakacaka saumi, rawa nida kerea noda gade meda tokona na cakacaka vakavunau ena lomanimacawa. So era tuvalaka mera painia veivuke ena vula ni veisiko. Ke da nanuma meda gade ena dua na vanua, rawa beka nida veisautaka noda ituvatuva me rawa nida tiko ena gauna ni veisiko?

3. Cava eda rawa ni cakava ena gauna ni veisiko meda vakayaloqaqataki kina?

³ Na inaki levu ni nona veisiko na ivakatawa ni tabacakacaka oya me vakayaloqaqataki keda, qai vakatututaka e so na ka meda vakavinakataka ena noda cakacaka vakavunau. Rawa beka nida kerea meda cakacaka vata kei koya se watina, ke sa vakawati? E dau marautaka na ivakatawa ni tabacakacaka me cakacaka vata kei ira na dautukutuku, okati kina o ira na dautukutuku vou se o ira era sega ni matau ena so na basoga ni cakacaka vakavunau. Rawa nida vuli ena iwalewale ni nona vunau, kei na vakatutu e dau solia. (1 Kor. 4:​16, 17) Noda sureti koya ena vakasigalevu se vakayakavi, e dua na sala eda rawa ni vakayaloqaqataki kina. (Iper. 13:⁠2) E bibi meda vakarorogo vinaka ena nona ivunau baleta ni ka e talaucaka ena ganita sara ga na ivavakoso.

4. Eda vakayaloqaqataki koya vakacava na ivakatawa ni tabacakacaka?

⁴ Na iVakatawa ni Tabacakacaka: Na yapositolo o Paula a vakataki ira ga na tacina ena loma ni ivavakoso. A sotava na veivakacacani qai lomanuiqawaqawa, ia a vakavinavinakataka vakalevu na nodra veivakayaloqaqataki na ivavakoso. (2 Kor. 11:​26-​28) Na gauna era rogoca kina na ivavakoso mai Roma nona sa kau tiko yani vakavesu o Paula, e so era lai ‘tavaki koya ena makete i Apiusi’​​—⁠rauta ni 74 na kilomita! ‘Ia ni raici ira o Paula sa vakavinavinaka vua na Kalou, ka sa vakayaloqaqataki vakalevu.’ (Caka. 28:​15, VV) E rawa tale ga nida vakayaloqaqataki koya na ivakatawa ni tabacakacaka ena noda vakaraitaka na yalo ni veidokai nida tokona na nona veisiko. (1 Tim. 5:​17) Rawa nida tukuna da qai vakaraitaka sara ga noda vakavinavinakataka na nodrau sasaga. Rau na marautaka tale ga vakaveiwatini ni rau raica na noda vakabauta, loloma, kei na noda vosota.​​—⁠2 Ces. 1:​3, 4.

5. Na cava eda gadreva kina na veivakayaloqaqataki ena gauna oqo?

⁵ Ena “gauna cacamatua, [qai] lewalewai dredre” oqo, o cei ena sega ni gadreva me na vakayaloqaqataki? (2 Tim. 3:​1, NW) Meda vakatulewataka sara ga oqo meda vakaitavi ena macawa lavotaki ni nona veisiko na ivakatawa ni tabacakacaka. Eda rawa ni veivakayaloqaqataki na lewe ni ivavakoso kece, okati kina na ivakatawa dauveilakoyaki. Ena sala oqo eda na dau ‘veivakacegui qai veivakatataki cake tiko ga kina.’​​—⁠1 Ces. 5:​11.