Vakavulica e So Tale Mera Lomani Jiova

1. Na cava e vakavolekati ira e so vei Jiova?

¹ O nanuma na imatai ni gauna o rogoca kina na itukutuku me baleti Jiova? Na cava a vakayarayarataki iko vua? Era kaya e levu na yalomalumalumu ni nodra kila na itovo qoroi ni Dauveibuli e vakavolekati ira vua, vakauasivi nona yalololoma kei na veikauaitaki.​​—⁠1 Joni 4:⁠8.

2, 3. Eda na vakayagataka vakacava na ivola Kaya na iVolatabu ena nodra vakavulici e so tale mera lomani Jiova vakalevu?

² “Oqo na Noda Kalou”: E vakavotui na loloma i Jiova ena ivola Kaya na iVolatabu, e vakabibitaki tale ga kina noda veiwekani kei koya. Eda na vakayagataka vakacava na ivola qo ena nodra vakavulici e so tale mera lomana vakalevu na Kalou? Ni vakamacalataki e dua na tikina vou, e vinaka meda taroga e so na taro vakavure vakasama me vaka: “Na cava o vulica e ke me baleti Jiova?” se “E vakadinadinataka vakacava na tikina qo ni o Jiova e Tama vinaka duadua?” Ena yaga na iwalewale ni veivakavulici qori ena nona bucina o gonevuli na veiwekani tawamudu kei Jiova.

³ Nida vukei ira na vuli iVolatabu mera kila ni ka dokai na vulici ni veika me baleta na Kalou dina, na Kalou bula duadua ga, era na vakadinata na vosa i Aisea “oqo na noda Kalou.” (Aisea 25:⁠9) Nida vakamacalataka na Vosa ni Kalou, meda vakabibitaka nida na vakalougatataki ni sa na vakayacora na inaki ni Kalou na nona Matanitu e kena Tui o Jisu Karisito.​​—⁠Aisea 9:​6, 7.

4, 5. Na cava na ibalebale ni noda lomani Jiova?

⁴ Vakaraitaka ni o Lomani Jiova: Noda lomani Jiova ena lomada, yaloda, kei na noda vakasama taucoko e sega ni okati ga kina noda taleitaka vakalevu na Kalou. E dodonu meda vakabauta qai muria nona ivakarau ni rai. (Same 97:10) Noda lomana na Kalou ena vakavotui ena noda muria kece nona ivakaro, da qai vakayacora tiko ga “nai valavala savasava kei na daulotu,” ena gauna mada ga eda vakatovolei se tusaqati kina.​​—⁠2 Pita 3:​11; 2 Joni 6.

⁵ Eda marau ni cakava na loma ni Kalou nida lomani koya. (Same 40:⁠8) Me vulica o gonevuli ni ivakaro kece ni Kalou ena yaga tawamudu vei ira nona tamata. (Vkru. 10:⁠12, 13) Nona moica e dua na nona bula me salavata kei na veidusimaki i Jiova e vakaraitaka ni vakavinavinakataka na nona cakacaka veivakurabuitaki. Tuberi gonevuli me kila ni na sega ni rarawa se yaco vua na leqa ke muria na sala dodonu i Jiova.

6. Era vakalougatataki vakacava na lomani Jiova?

⁶ Vakalougatataki o Ira na Lomana na Kalou: O Jiova e kauaitaki ira na yalomalumalumu era lomani koya, e vakatakila vei ira “na veika titobu ni Kalou.” (1 Kor. 2:​9, 10) E dei nodra inuinui me baleta na veigauna se bera mai nira kila na inaki i Jiova. (Jere. 29:11) Ena yalololoma o Jiova vei ira na lomani koya. (Lako 20:⁠6) E nodra inuinui na bula tawamudu ni lomani ira na Kalou.​​—⁠Joni 3:​16.

7. Na cava nomu rai me baleta nodra vakavulici e so tale mera lomani Jiova?

⁷ Na levu ga ni ka eda kila me baleta na Tamada vakalomalagi, na levu tale ga ni ka meda tukuna vei ira e so tale. (Maciu 13:52) E ka dokai noda vakavulici ira e so tale mera lomani Jiova, vakauasivi o ira na luveda! (Vkru. 6:​5-7) Meda vakacaucautaki Jiova tiko ga kei ira noda vuli iVolatabu ena vuku ni ‘nona yalololoma levu.’​​—⁠Same 145:⁠7.