Bibi na Vosota ena Cakacaka Vakavunau
1 E sivia na 30 na yabaki nona marautaka voli na yapositolo o Paula na cakacaka vakaulotu. Me vaka ga na sasaga yaga tale e so, na nona cakacaka vakavunau e salavata mai na veika dredre. (2 Kor. 11:23-29) Ia a vunau tiko ga o Paula. (2 Kor. 4:1) E kila ni rawa ga ni vosota ena cakacaka vakaitalatala ena kaukaua e solia o Jiova. (Fpai. 4:13) Ena nona ivakaraitaki ni vosota ena yalodina, e rawa kina ni tukuna o Paula: “Ni vakamurimuri au me vaka au sa vakamurimuri Karisito.”—1 Kor. 11:1, VV.
2 Vosota na Veivakatovolei Nikua: Levu na tacida era sotava e veisiga na veivakalialiai, veitusaqati, ra tawa kauai tale ga na lewenivuvale, itokani vakacakacaka, se o ira nodra icaba e koronivuli. (Maciu 10:35; Joni 15:20) De dua o sotava tale tiko ga qori. Ena yasana adua, rairai o vosota voli na tauvimate, se o saga tiko e veisiga mo kua ni rawai ena veitemaki e vakatovolei kina nomu vakabauta kei na vosota. Eda na vakaukauataki nida vakasamataka na nodra ivakaraitaki na tamata yalodina ni Kalou eliu kei ira na lotu vaKarisito nikua nira vosota na veika dredre.—1 Pita 5:9.
3 Nida “vakaiyaragi e na i yaragi kece ga ni Kalou” eda na vakaukauataki meda dei tiko ga ena noda cakacaka vakaitalatala. (Efeso 6:10, 11, VV, 12, 13, 15) E yaga tale ga noda masulaka meda dau vosota. Eda na vosota na veika dredre ena vuku ni yalo tabu ni Kalou. (2 Kor. 6:4-7) Meda qaqa ena noda vala vakayalo, ena vakaukauataki keda noda muria na ivakaro ni Kalou. (Same 119:24, 85-88) Me vaka ga e dua na gone e taleva vakavica na ivola nei tamana dauloloma, ena dei tale ga noda veiwekani kei Jiova ena noda wilika e veisiga na iVolatabu. Nida dau vuli vakataki keda ena vakavukui keda meda vosota na veika dredre, eda na vakatulewa dodonu ni vakamuai keda na rai ni Kalou da qai yalodina tiko ga vei Jiova.—Vkai. 2:10, 11.
4 Vakalougatataki na Vosota: Me vakataki Paula, na noda vosota ena cakacaka vakaitalatala e vakamarautaki Jiova, eda na vakalougatataki kina kei ira tale e so. (Vkai. 27:11) Meda qacoya na cakacaka vakaitalatala, me ivakadinadina ni dei noda vakabauta qai “talei vakalevu cake . . . mai na koula sa caca rawarawa . . . ni dau vakatovolei e na bukawaqa.”—1 Pita 1:6, 7, VV.