Noda Cakacaka Vakaitalatala—iVakaraitaki ni Noda Lomana na Kalou
1. E uqeti Jisu vakacava nona lomana na Kalou?
1 A uqeti Jisu na loloma me vunau. Na basoga kece ni nona cakacaka vakaitalatala e ivakadinadina matata ni nona lomani Jiova. E kaya o Jisu: “Me kila ga ko ira na kai vuravura ni’u sa lomani Tamaqu, ia me vaka sa vosa vei au ko Tamaqu, au sa kitaka vakakina.” (Joni 14:31) Nida imuri i Jisu, e noda itavi dokai tale ga meda vakaraitaka ena noda cakacaka vakaitalatala na titobu ni noda lomana na Kalou.—Maciu 22:37; Efeso 5:1, 2.
2. Ena tara vakacava na noda cakacaka vakaitalatala noda lomani Jiova?
2 “Me Vakarokorokotaki na Yacamuni”: Eda lomana na Kalou, da vakarokorokotaka na yacana nida gumatua ena gauna kece ga meda wasea vei ira eso tale na itukutuku me baleti Jiova kei na nona Matanitu. (Same 83:18; Isik. 36:23; Maciu 6:9) Me vakataki Jisu ga, eda na vakaraitaka tiko ga ena noda cakacaka vakaitalatala nida vinakata mai vu ni lomada me vakarokorokotaki na yaca i Jiova, me vakayacori tale ga na lomana.—Maciu 26:39.
3. Ena uqeti keda vakacava na noda lomani Jiova meda vosota na veika dredre?
3 Uqeti Keda na Loloma Meda Vosota ba Ka Dredre: Ena vakamalumalumutaka na ilati kece na noda lomani Jiova. (1 Kor. 13:5, 7) A sotava o Jisu e levu na ka e rawa sara ga ni tarova na nona cakacaka vakaitalatala. Ia e vosota na veika dredre ni titobu na nona loloma, e vinakata tale ga me cakava na loma i Jiova. (Mari. 3:21; 1 Pita 2:18-23) Eda sotava tale ga e levu na ka dredre, na noda lomana na Kalou ena uqeti keda meda vosota. Nida muria vakavoleka na ivakaraitaki i Karisito, eda na yalodei da qai doudou meda cakava na ka eda rawata ena noda cakacaka vakaitalatala. E dina ni dau tarai keda na nodra veitusaqati na lewe ni noda vuvale, na tauvimate, na bula vaqase, se nodra sega ni kauai na lewenivanua, ena sega ga ni tarova noda vakaraitaka noda lomani Jiova nida solia noda vinaka kece ena cakacaka vakaitalatala.
4. Na itavi dokai cava e uqeti keda kina noda lomani Jiova?
4 E veiuqeti na loloma, da qai kalougata meda vakaraitaka ena noda cakacaka vakaitalatala nida lomana na Kalou mai vu ni lomada. (1 Kor. 13:13) Ni sa voleka sara qo na gauna me vakarokorokotaki kina na yaca i Jiova, e neitou masu me ‘tubu vakalevu na nomuni loloma.’ —Fpai. 1:9; Maciu 22:36-38.