O Rawa ni Vakarabailevutaka Nomu Cakacaka Vakavunau?
1. Na cava e vinakati sara vakalevu nikua ena cakacaka vakavunau, na vuna?
1 Ni raica o Jisu nodra ciqoma e levu na itukutuku vinaka ni Matanitu ni Kalou, a tukuna kina vei ratou na nona imuri me ratou “masuti koya . . . na i Taukei ni were, me talai ira yani [“eso tale,” NW] na tamata cakacaka me ra la’ki tatamusuki e na nona were.” (Maciu 9:37, 38, VV) Sa qai bibi sara nikua meda gugumatua ena cakacaka ni tatamusuki ni sa voleka ni cava. E bibi kina meda vakasamataka da qai masulaka se rawa nida vakarabailevutaka vakacava na noda cakacaka vakavunau.—Joni 14:13, 14.
2. Na cava era cakava eso ni vinakati e levu na dautatamusuki ena were?
2 Vakarabailevutaka Nomu Cakacaka: E levu era rawa ni painia ena veidusimaki kei na veitokoni i Jiova. (Same 26:2, 3; Fpai. 4:6) Eso era saga vagumatua mera painia veivuke me dua na vula se sivia ena loma ni yabaki. Qori na sala vinaka mera vakarabailevutaka kina na nodra cakacaka vakavunau. Nira marautaka e levu nodra painia veivuke, era vakasamataka kina mera painia tudei.—Caka. 20:35.
3. Ke o a painia tu e liu, na cava o na rairai vakasamataka ena gauna qo?
3 O Rawa Beka ni Painia Tale?: Ke o a painia tu e liu, ena levu dina na ka vinaka o na tukuna me baleta na gauna ya. O bau vakasamataka qai masulaka mo painia tale? De dua sa sega ni vakalatilati na ituvaki o a cegu kina ena painia e liu. O sa rawa ni painia tale ena gauna qo.—1 Joni 5:14, 15.
4. Na ka talei cava e rawa nida cakava kece?
4 Sa toso vinaka sara tiko na cakacaka ni tatamusuki, sa voleka tale ga ni cava. (Joni 4:35, 36) Meda dui dikeva tale mada na keda ituvaki ena gauna qo. E rawa beka nida veisautaka na noda ituvatuva e veisiga me rawa nida vakarabailevutaka kina noda cakacaka vakavunau? Ke sega ni rawa qori, vakacava meda toroya cake na iwalewale ni noda cakacaka vakavunau? (Mari. 12:41-44) O ira na rawa ni vakarabailevutaka ena gauna qo nodra cakacaka vakavunau mera painia, e ka dokai dina ni vakayagataki ira o Jiova ena cakacaka talei qo!—Same 110:3.