Kua ni Lokuyara na Vunau!
1. Na veivakadreti cava i Paula meda raica vakabibi nikua?
1 “Mo vunautaka na vosa, kua tale ni lokuyara.” (2 Tim. 4:2) Na cava e bibi kina ena noda gauna na veivakadreti i Paula? Ena tara vakacava noda bula kei ira tale eso na ka e tukuna?
2. Na cava meda gumatua kina ni vaqarai ira era se sega ni rogoca na itukutuku vinaka?
2 Vakatau Kina na Bula: E milioni nikua era se bera ni rogoca na itukutuku vinaka ena rawati kina na bula. (Roma 10:13-15; 1 Tim. 4:16) Era se kune ga e levu na yalomalumalumu ena yalava e dau tarai wasoma. Ni duidui na gauna kei na siga eda lesu kina eda na rairai sotava e dua tale na lewenivuvale. Noda gumatua na qarai ira qori ena vinaka tiko ga kina noda lewaeloma, eda na galala tale ga mai na nodra dra eso tale.—Caka. 20:26.
3. Eda na vakayagataka vinaka vakacava na noda gauna ena cakacaka vakavunau?
3 Era a tusaqati vakaca na lotu vaKarisito ena matai ni senitiuri, ia era ‘vakasinaiti Jerusalemi ena nodra ivakavuvuli.’ (Caka. 5:28) E va tale ga ya noda sasaga meda ‘vunau vakavinaka sara’? (Caka. 10:42) Eda dau vakayagataka vinaka na gauna nida lako ena cakacaka vakavunau? Ke da waraka tiko e dua e lai veisikovi lesu, eda na saga meda vunau vei ira era tasivi?
4. E yaga vakacava ena noda yadra tiko ga, noda ogaoga ena cakacaka vakavunau?
4 Yadra Tiko Ga: E dodonu meda yadra tiko ga qai yalomatua ni sa voleka ni cava na veika vakavuravura qo. (1 Ces. 5:1-6) Eda na sega ni lomaocaocataka na ka ni vuravura qo, ke da dauveivosakitaka na nuinui ni Matanitu ni Kalou. (Luke 21:34-36) Eda na ogaoga gona ena cakacaka ni veivakabulai nida “namaka tiko” na kena yaco mai na siga i Jiova.—2 Pita 3:11, 12.
5. Ena yaga vakacava ena cakacaka vakaitalatala noda doka na bula?
5 Nida sega ni lokuyara na vunau, eda sa vakatotomuria tiko na rai i Jiova me baleta na bula: “Ni sega ni vinakata me rusa e dua, e vinakata ga moni veivutuni kece.” (2 Pita 3:9; Isik. 33:11) Me noda inakinaki mada ga meda vunau vei ira tale e levu ena noda yalava, me lagiti tiko ga kina o Jiova!—Same 109:30.