‘Solibula’ ena Vukudra na Vuli iVolatabu
1. Na cava ena vinakati ena nona vukei na vuli iVolatabu?
1 E sega ni vakatau ga nona yalayala e dua na vuli iVolatabu ena nomu vuli iVolatabu wasoma kei koya, e levu tale na ka e vauci kina. E vakatauvatana na yapositolo o Paula na nona veivolekati kei ira e vakavulica ina dua na tina e karoni ira na luvena. Eda tu vakarau tale ga meda ‘solia noda bula’ ena noda vukei ira noda gonevuli mera tubu vakayalo.—1 Ces. 2:7-9.
2. Na cava meda kauaitaki gonevuli kina, ena caka vakacava qo?
2 Kauaitaki Koya: Ni sa bulataka na ka e vulica o gonevuli, ena dusimaki koya nona lewaeloma me kua ni vakailala kei ira era sega ni muria na ivakavuvuli vakaivolatabu. (1 Pita 4:4) Era na rairai cati koya na nona lewenivuvale. (Maciu 10:34-36) Eda rawa ni vakaseavutaka nona galili ena noda kauaitaki koya vakayalololoma. E tukuna e dua na daukaulotu sa veiqaravi dede tu mai: “Kua ni biubiu totolo ni oti na vuli. Ke rawa, veitalanoa mada kei koya.” Tu vakarau mo vukei nomu gonevuli. Me kena ivakaraitaki, ke tauvimate, o rawa ni qiri vua se sikovi koya? O rawa ni dabe e yasana ena gauna ni soqoni, se vukei ira na luvena ke veiganiti?
3. Eda na vukei gonevuli vakacava me vakayaloqaqataki ena ivavakoso?
3 Veivuke na iVavakoso: Kevaka o cakacaka vakavunau volekata na vale nei nomu gonevuli, vakacava mo sikovi koya vakalekaleka kei na tacimu drau cakacaka vata tiko me rau veikilai? Ena so na gauna, sureti ira eso na dautukutuku se qase ni ivavakoso me veitomani kei iko ena vuli. Ni sa tauyavu na vuli, uqeti nomu gonevuli me mai soqoni ena Kingdom Hall. Ena marautaka kina na veimaliwai e veivakayaloqaqataki kei ira na lewe ni ivavakoso, era rawa tale ga ni okati me nona vuvale vakayalo.—Mari. 10:29, 30; Iper. 10:24, 25.
4. Ena yaga vakacava noda gugumatua?
4 Ena marau e dua na itubutubu e solia nona vinaka kece me tuberi luvena vakayalo, ni raica nona dei ena qaravi Jiova qai muria tiko ga na dina. (3 Joni 4) Eda rawa ni vakila tale ga na marau qori, ke da solia noda bula ena vukudra noda vuli iVolatabu.