O Lokuyara Tiko Beka?
Lokuyara ena cava? Ena kena vakaleweni na Advance Medical Directive card, e vakarautaki me baleti keda na iVakadinadina papitaiso. Ni o ‘sega ni kila se na vakaevei na nomu bula nimataka,’ e bibi gona mo vakatulewa sara ga qo qai vola na veiqaravi o na vakadonuya me caka vei iko ke gadrevi mo qaravi totolo vakavuniwai. (Jeme. 4:14; Caka. 15:28, 29) E yaga vakalevu ena tikina qori na DVD Transfusion-Alternative Health Care—Meeting Patient Needs and Rights. Sarava na DVD, vakasamataka na ka o raica qai masulaka, raica vata tale ga kei na taro era koto qo e ra.—Me nanumi: Oni vakadreti na itubutubu moni lewa matau ni oni sarava kei ira na luvemuni lalai na DVD qo, ni vakaraitaki kina vakalekaleka na veisele.
(1) Na cava era sa dikeva tale tiko kina eso na vuniwai kei ira na kenadau ni tabana ni bula na vakayagataki ni dra? (2) Tukuna e tolu na ivakaraitaki ni veisele vereverea e sega ni vakayagataki kina na dra. (3) E vica na vuniwai kei na dauveisele e vuravura era vakaraitaka na nodra tu vakarau mera qaravi ira na sega ni via taura na dra? Na cava e va kina ya nodra rai? (4) Na cava e kune ena so na vakadidike e caka ena vica na valenibula me baleta na vakayagataki ni dra? (5) Na cava eso na leqa e yaco ena veiqaravi vakavuniwai e vakayagataki kina na dra? (6) Na cava era sa vakadeitaka e levu na kenadau me baleta na yaga ni veiqaravi e sega ni soli kina na dra? (7) Na cava e dau vakavuna na lailai ni dra (anemia)? Ni dua e lailai nona dra, na ivakatagedegede cava e rawa ni qai tukuni kina ni sa leqataki nona bula? Na cava e rawa ni caka me vakalevutaka tale na dra? (8) Na cava e rawa ni caka me bulia vakalevu kina na yago na red-cell? (9) Na iwalewale cava soti era dau vakayagataka na vuniwai me kua ni levu kina na dra e vakayali ena gauna ni veisele? (10) Ena yaga tale beka ga vei ira na gone, ira na tauvimate bibi, kei ira na mavoa vakaca na veiqaravi vakavuniwai e sega ni vakayagataki kina na dra? (11) Na cava e bibi duadua ena veiqaravi vakavuniwai e vinaka? (12) Na cava e bibi kina vei keda na lotu vaKarisito meda vakatulewataka rawa qo na veiqaravi vakavuniwai e sega ni vakayagataki kina na dra? Eda na cakava vakacava?
Noda digia eso na veiqaravi vakavuniwai e vakaraitaki ena DVD e noda dui vakatulewa sara ga, ia me salavata qori kei na noda lewaeloma e vakavulici ena iVolatabu. O sa vakadeitaka na veiqaravi vakavuniwai o vakadonuya me na caka vei iko kei ira na luvemu, o qai vakalewena nomu card? E vinaka mo wilika tale na wase 7 ni ivola “Loloma ni Kalou” kei na ivola tale eso era cavuti kina ni vakamacalataka vinaka na tikina qo. Rairai e sega ni vakayacori ena noda vanua e levu na iwalewale ni veiqaravi vakavuniwai eda sarava ena DVD, ia e bibi meda tu vakarau ni vakamatatataka na noda vakatulewa me baleta na dra da qai dei kina. Raica vinaka tale mo vakadeitaka ni o sa vola vakadodonu nomu vakatulewa ena nomu Advance Medical Directive card. Vakamacalataka vinaka na ka o sa vakatulewataka vei ira na nomu lewenivuvale era sega ni iVakadinadina kei rau na saini tiko ena nomu card.
[Kato ena tabana e 3]
• O sa vakadeitaka na veiqaravi vakavuniwai o na vakadonuya me caka vei iko kei ira na luvemu?
• De mani yaco na leqa tubukoso, sa vakaleweni vinaka tu beka nomu Advance Medical Directive card?