Dauveivuke ena Cakacaka Vakavunau
1. E yaga vakacava noda cakacaka yarua nida vunau?
1 Ena dua na gauna a tala o Jisu e 70 na tisaipeli mera vunau, qai lesia “mera lako yarua.” (Luke 10:1) Eda rawa ni kaya na ivakarau ni vunau ya, era veivukei ra qai veivakayaloqaqataki kina na tisaipeli. Ena rawa vakacava nida vukea na tacida eda cakacaka vakavunau vata?
2. Eda na vakarorogo vakacava ni vosa na tacida? Na cava na vuna?
2 Meda Vakarorogo: Ni vakamacala na tacida eda cakacaka vata, meda vakarorogo vinaka. (Jeme. 1:19) Cega noda iVolatabu ke wilika e dua na tikinivolatabu. Meda raici koya e vosa, na tacida se o taukeinivale. Noda vakarorogo vinaka, ena rairai uqeti taukeinivale tale ga me vakarorogo.
3. Gauna cava ena rairai vinakata kina na tacida meda vakamacala?
3 Kila na Gauna Meda Vosa Loma: Eda na doka na tacida e vakamacala tiko nida laivi koya ga me vosa. (Roma 12:10) Meda kua ni vosa takoso. Ke guileca na ka e via tukuna se saqata o taukeinivale na nona ivakamacala se taroga e dua na ka, qai vinakata na veivuke, meda saga meda tomana ga na ulutaga a vakamacala tiko kina na tacida, meda kua ni veivosakitaka e dua tale na ulutaga vou. (Vkai. 16:23; Dauv. 3:1, 7) Ke da vosa, me matata vinaka na ka eda tukuna me salavata kei na ka e sa vakamacalataki oti.—1 Kor. 14:8.
4. Na cava ena vakavuna noda marau kei na vuavuaivinaka ni noda vunau?
4 Sa dua na ka “nodra marau” na le 70 na tisaipeli era cakacaka yarua ni oti nodra vunau. (Luke 10:17) Keda tale ga eda na marau qai vuavuaivinaka noda vunau nida vakarorogo da qai kila na gauna meda vosa kina nida vukea na tacida eda cakacaka vata e veivale.