Meda Daumasu na iTalatala Lotu vaKarisito
1. Na cava e gadrevi me rawa nida cakava kina noda cakacaka vakaitalatala?
1 Ena sega ni rawa nida cakava ga vakataki keda na cakacaka vakaitalatala. Eda na cakava rawa ga qori ena kaukaua e solia o Jiova. (Fpai. 4:13) E vakayagataki ira nona agilosi me dusimaki keda vei ira era vaka na sipi. (Vkta. 14:6, 7) Na itei ni ka dina eda teivaka da qai vakasuasuataka, ena vakatubura ga o Jiova. (1 Kor. 3:6, 9) E bibi gona meda vakararavi na italatala lotu vaKarisito vua na Tamada vakalomalagi ena noda daumasu!
2. Na cava eso na ka meda masulaka?
2 Keda Yadua: Meda masu ena ituvaki kece ga eda vunau kina. (Efeso 6:18) Na cava eso na ka meda masulaka? E rawa nida kerea meda vakadoudoutaki, me donu tale ga noda rai me baleta na yalava. (Caka. 4:29) Meda kerei Jiova me dusimaki keda vei ira na yalomalumalumu, de dua eda rawa ni vakavulici ira ena iVolatabu. Eda rawa ni masu lo vakalekaleka vei Jiova me vukei keda ena isaunitaro dodonu, ke mani taro o taukeinivale. (Niem. 2:4) Meda kerea tale ga na vuku me rawa nida vakaliuca tiko ga na cakacaka vakaitalatala. (Jeme. 1:5) Ena marau o Jiova ke da vakavinavinakataka na itavi dokai e lesi keda kina meda nona italatala.—Kolo. 3:15.
3. Nida veimasulaki, ena tete tiko ga kina vakacava na cakacaka vakavunau?
3 Ira Tale Eso: Meda “veimasulaki” tale ga, ke veiganiti e rawa nida cavuta sara ga na yacadra noda itokani italatala. (Jeme. 5:16; Caka. 12:5) Ena lailai beka ga na ka o rawa ni cakava ena cakacaka vakavunau ena vuku ni tautauvimate? Vakacava mo masulaki ira nomu itokani italatala era bulabula vinaka. Mo kua ni beca na yaga ni nomu masulaki ira! E sega ni cala ke da masulaki ira na vakaitutu torocake mera vakatara tiko ga na cakacaka vakavunau, ‘me rawa nira bula galala ra vakacegu’ tale ga na tacida.—1 Tim. 2:1, 2.
4. Na cava meda gumatua kina ena masu?
4 Na ilesilesi meda vunautaka na itukutuku vinaka e vuravura taucoko e cakacaka vakaitamera. Ke da “gumatua ena masu,” eda rawa ni vakacavara na cakacaka qori ena veivuke i Jiova.—Roma 12:12.