E Vinaka na Matamu?

1. Na cava e kena ibalebale me ‘vinaka na matada’?

¹ Na ka eda raica e dau tara na noda ivalavala. E veiganiti kina na vosa i Jisu: “E cina ni yago na mata. Ke vinaka na matamu, ena ramase na yagomu taucoko”! (Maciu 6:​22) Ena vakasama a vosa tiko kina o Jisu, dua ga na ka eda na vakaliuca ke “vinaka” na matada​—na kena vakayacori na loma ni Kalou. Ena ka bibi duadua ena noda bula na Matanitu ni Kalou, eda na sega ni vakawelei ena veika vakayago e sega na betena se so tale na ka ena vakalatilati ena noda cakacaka vakaitalatala.

2. E rawa vakacava ni vakacalai na noda rai, ia na cava meda cakava?

² Bibi Meda Dikevi Keda: E rawa ni vakacalai na noda rai ena ka e kaburaki ena itukutuku ni veivoli me baleta na ka eda gadreva, e rawa ni vakacalai tale ga ena ka era taukena eso tale. Ni bera nida cakava se volia e dua na ka ena vakalusi gauna vakalevu, na ilavo, se vakaogai keda vakalevu, e vinaka meda “cakacakataka na kena isau” ena noda taroga, ‘Ena vakavinakataka se vakaleqa noqu qaravi Jiova?’ (Luke 14:28; Fpai. 1:​9-​11) E ka vakayalomatua tale ga meda dau vakasamataka se sala cava tale meda vakarawarawataka kina noda bula me vakalevutaki kina noda cakacaka vakaitalatala.​—2 Kor. 13:5; Efeso 5:​10.

3. Na cava eda vulica vua na ganeda a veisautaka na kena ituvaki me bula rawarawa ga?

³ A vakatulewataka e dua na ganeda me cakacaka saumi tiko ga e veisiga ni tekivu painia tudei. Ia ke a cakacaka mada ga vagauna, e se rawa tiko ga ni bula ena ilavo e rawata. A kaya: “Eda sega ni rawa ni qarava e rua na turaga. E dodonu meu vakuai au mai na veika au vinakata, meu lomavakacegu ga ena veika au gadreva dina. Au qai liaca ni na madra na veika vakayago qai seavu na kena taleitaki ni toso na gauna, ena vakalomaocaocataki au wale ga keu saga tiko ga meu rawata.” A veisautaka na kena ituvaki me bula rawarawa ga qai veisautaka nona cakacaka me painia tiko ga kina.

4. Na cava e sa qai bibi ga kina nikua me vinaka tiko ga na matada?

⁴ Sa lekaleka na gauna e vo, sa qai bibi ga me vinaka tiko ga na matada. Na siga yadua eda lakosivita e sa qai vakavolekati keda ga ina icavacava ni ivakarau ni bula qo kei na tekivu ni bula ena vuravura vou. (1 Kor. 7:​29, 31) Ke da vakaliuca na cakacaka vakavunau, eda rawa ni vakabulai kei ira tale ga era vakarorogo vei keda.​—1 Tim. 4:​16.