Ni o Taro Qai Vakarorogo e Vakaraitaka ni o Veinanumi

1. Na cava meda vulica me laulau kina noda cakacaka vakaitalala?

¹ E levu era dau taleitaka mera vakamacalataka nodra nanuma, ia era cata nira vakadodonutaki se vakatarogi. E bibi gona vei keda na italatala lotu vaKarisito meda maqosataka noda taro me rawa nida takiva mai na ka e tu e lomadra na tamata.—Vkai. 20:5.

2. Na taro vakacava e laulau?

² E dodonu me veiuqeti na noda taro, me kua ni veivakayalolailaitaki. Ni dau vunau e veivale e dua na tacida, e taroga, “Oni nanuma ni na yaco na gauna eda na veirokovi qai veidokai na tamata kece?” Ni rogoca oti na ka e kaya o taukeinivale, ena tomana, “Ena rawati vakacava qori?” se “Na cava e va qori kina na nomuni rai?” Ni vunau tawalokuci tiko e dua tale na tacida, e dau tarogi ira na vakaluveni, “Ni o qarava tiko nomu itavi vakaitubutubu, na cava e dua na ka o marautaka vakalevu?” Oti e qai taroga, “Ia na cava oni dau leqataka?” Na taro va qo e sega ni veivakayalolailaitaki, ia e uqeti ira ga mera vakamacalataka na nodra nanuma. Ni duidui na ituvaki, ena gadrevi meda veiveisautaka na usutu ni veivosaki kei na iwalewale ni noda taro me ganiti ira na tiko ena yalava.

3. Cava meda dau vakatudaliga kina da qai kua ni vosa tu ga ena cakacaka vakaitalatala?

³ Takiva Mai na ka e tu e Lomadra: Ke ra tu vakarau na itaukeinivale mera tukuna na ka era nanuma, mo vakarorogo vinaka, qai kua ni curu takoso nira vosa tiko. (Jeme. 1:19) Ciqoma ena yalovinaka na nodra ivakamacala. (Kolo. 4:6) O rawa ni kaya: “E vakavure vakasama sara ga na tikina qori. Au marautaka vakalevu na nomu wasea mai.” Vakacaucautaki koya. Taroga eso tale na taro mo kila kina na ka e nanuma kei na vuna e va kina oya na nona rai, ia mo cakava ena yalovinaka. Qara e dua na ka drau duavata kina. Ke o vinakata me raica na iVolatabu, o rawa ni kaya, “O sa bau vakasamataka tu na tikina qo?” Meda kua ni dre ga noda mua se via veiba.—2 Tim. 2:24, 25.

4. Eda na doka vakacava e dua eda vosa vua?

⁴ Era na via sauma na noda taro na itaukeinivale ke ra raica nida vakarogoci ira. E rawa sara ga nira kila ke da rogoci ira dina tiko se sega. A dikeva e dua na ivakatawa dauveilakoyaki, “E dau taleitaki e dua e dau vakarorogo, e rawarawa vei ira na tamata mera talaucaka na lomadra vua nira vakila ni kauaitaki ira dina.” Noda vakarorogo e vakaraitaka na noda dokai ira, ena rawa ni uqeti ira tale ga mera rogoca na itukutuku vinaka eda kauta tiko yani.—Roma 12:10.