Qarauna Vinaka Sara na Nomu Lewaeloma
1. Na cava na usutu ni soqo lavotaki ni yabaki ni cakacaka ni isoqosoqo ni 2013, na cava na inaki ni porokaramu?
1 Eda sotava e veisiga na ituvaki e rawa ni vakaleqa na noda lewaeloma. Na porokaramu ni soqo lavotaki ni yabaki ni cakacaka ni isoqosoqo ni 2013 ena tekivu ena 1 Seviteba, 2012, qai veiganiti me kena usutu, “Qarauna Vinaka Sara na Nomu Lewaeloma.” (1 Tim. 1:19) E tuvanaki na porokaramu qori me vukei keda yadudua meda kauaitaka vakabibi na sala eda vakayagataka tiko kina na nona isolisoli vakasakiti na Dauveibuli.
2. Na taro bibi cava ena saumi ena porokaramu?
2 Vaqara na Tikina Qo: Ena veivosataki ena porokaramu e vitu na taro bibi me baleta na lewaeloma:
• Na cava eso na ka e rawa ni vakaleqa na noda lewaeloma?
• Eda na vakavulica vakacava na noda lewaeloma?
• E rawa vakacava meda galala mai na nodra dra na tamata kece ga?
• Na cava e vakaraitaka na nomu dau vakasamataka kei na nomu dau muria na ivakavuvuli vakaivolatabu?
• Eda na levea vakacava na noda rawa ni vakamavoataka na nodra lewaeloma eso tale?
• Ra itabagone, oni na rawa ni tudei vakacava ni oni sotava na veitusaqati?
• Era na vakalougatataki vakacava o ira era muria na nodra lewaeloma e dusimaki ena yalo tabu?
3. Ena yaga vakacava vei keda na porokaramu?
3 Ena veivuke i Jiova, eda rawa ni vorata na sasaga i Setani me vakaleqa na noda lewaeloma. E tukuna tiko vei keda na Tamada vakalomalagi ena nona Vosa kei na nona isoqosoqo: “Oqo na sala, dou mai lako tu ga kina.” (Aisea 30:21) Na porokaramu qo e dua na sala e vakarautaka tiko kina o Jiova na veidusimaki va qori. Mo tuvanaka rawa sara ga qo mo rogoca na porokaramu taucoko ni soqo. Vakarorogo vinaka qai vakasamataka na sala o rawa ni bulataka kina na ka o vulica. Dou veivosakitaka vakavuvale na porokaramu. Na noda bulataka na ivakasala eda rogoca ena vakayaloqaqataki keda meda saga tiko ga me “vinaka na noda lewaeloma,” qai vukei keda meda kua ni vakalaiva na gagadre ni vuravura i Setani me rawai keda meda cakava e dua na ka ena vakaleqa na noda veiwekani kei Jiova.—1 Pita 3:16.