“Soqoni Ira Vata”

1. E tautauvata vakacava nodra soqo vakairogorogo na Isireli nira biuti Ijipita mai, kei na soqo ni veiwasewase kei na soqo ni veimatanitu?

¹ Sega ni dede nodra biuti Ijipita na Isireli, e vakaroti Mosese o Jiova me “soqoni ira vata” e Ulu i Saineai mera rogoca nona vosa me rawa nira rerevaki koya ra qai vakavulica na luvedra ena nona sala. (Vkru. 4:10-13) Sa dua mada ga na soqo guiguilecavi dredre qai veivakayaloqaqataki! Ena vica na vula mai qo, eda na soqoni vata na dauveiqaravi ni Kalou ena soqo ni veiwasewase kei na soqo ni veimatanitu me vakavulici keda o Jiova. Na cava meda cakava me yaga kina vei keda na soqo qori?

2. Na cava meda cakava meda “vakarau” kina ena soqo ni veiwasewase?

² “Vakarau”: E vakaroti ira na Isireli o Jiova mera “vakarau” ina soqo vakairogorogo qori e Ulu i Saineai. (Lako 19:10, 11) E vinakati tale ga na vakavakarau vinaka vei keda kece na tiko ena soqo ni veiwasewase, sega ni o ira ga na vakaitavi. Kena ivakaraitaki, levu era na kerea mera cegu mai na nodra cakacaka ena vica na siga. Rawa ni tautauvata kei na ka e sotava o Niemaia. E vinakata me cegu mai na nona cakacaka, ni dau tu mena waini o Tui Atakisekise, me lako i Jerusalemi me veivuke ena tara tale ni bai, ia e kila ni na rairai sega ni duavata kina na tui. E masu o Niemaia qai doudou me kerekere ena yalovinaka. E vakadonuya na tui me lako, e tokona tale ga na tara ni bai! (Niem. 2:1-9) Ni o kerei nomu boso ni cakacaka mo cegu ena vica na siga, vakacava o sa vakadeitaka tale ga nomu ilakolako kei na nomu icili? Era marautaka na qase mera veivuke ke o vinakata. Tuvanaka mo yaco totolo yani ni bera ni tekivu na soqo, qai tu vakarau mo ‘vakasamataka sara vakabibi’ na ka o na rogoca.—Iper. 2:1.

3. Na cava ena vukei keda meda vakarautaka na lomada?

³ Dua tale na tiki bibi ni noda vakarau oya meda vakarautaka na lomada me rawa nida vakarorogo da qai vuli kina. (Esera 7:10) Ena biu rawa ena Web site na jw.org na porokaramu ni soqo ni veiwasewase, ena tiko kina na ulutaga kece ni vunau kei na dua se rua na kena tikinivolatabu bibi. Eda rawa ni veivosakitaka na tikina totoka qori ena noda Sokalou Vakavuvale ena macawa ni soqo eda na tiko kina. Eso na dautukutuku era tabaka na porokaramu mera vola kina eso na tikina bibi era rogoca.

4. Era na vakavulici luvedra vakacava na itubutubu ena gauna ni soqo?

⁴ ‘Vakavulici Luvemuni’: Dua na inaki ni soqo vata e Ulu i Saineai mera ‘vakavulici luvedra’ na itubutubu e Isireli. (Vkru. 4:10) Qori tale ga na ka mera cakava na itubutubu ena gauna ni soqo. Mera dabe vata kei luvedra ra qai vukei ira mera vakarorogo. Ni cava e dua na siga kei na gauna ni nodra sokalou vakavuvale, mera veivosakitaka na porokaramu.

5. Ena yaga vakacava vei keda noda tiko ena soqo ni tikina sa roro mai?

⁵ E uqeti ira na Isireli na soqo vakairogorogo e Ulu i Saineai mera raica vakabibi nira dauveiqaravi ni Kalou. (Vkru. 4:7, 8) E vakarautaki gona na soqo sa roro tiko mai qo me yaga tale ga vei keda. Tolu na siga eda na biuta kina na vanua dravuisiga ca ena vuravura i Setani meda marautaka na veivakabulabulataki vakayalo kei na veimaliwai veivakauqeti kei ira na tacida. (Aisea 35:7-9) Ni sa voleka mai na siga i Jiova, meda kua sara ni vakawaletaka noda soqoni vata meda veivakayaloqaqataki!—Iper. 10:24, 25.