Me Yaga na Caka Vuli iVolatabu
1. Na cava na noda itavi na dautukutuku era caka vuli iVolatabu?
1 E sega ni dua e qarava rawa na Kalou ke sega ni “vagolei koya mai” o Jiova. (Joni 6:44) Ia ena vinakati vei ira na dautukutuku mera cakava nodra itavi mera vukei ira tale eso mera toro voleka vua na Tamadra vakalomalagi. (Jeme. 4:8) E vinakati na vakavakarau. Sega ni rauta na kena wiliki ga na parakaravu qai tarogi na taro me kila o gonevuli na ka e vulica qai toso kina vakayalo.
2. Na cava ena yaco ke yaga na vuli iVolatabu?
2 Me yaga na caka vuli iVolatabu, mera vukei nodra gonevuli na dautukutuku mera (1) kila na ka e kaya na iVolatabu, (2) ciqoma na kena ivakavuvuli, kei na (3) nodra muria na ka e kaya na iVolatabu. (Joni 3:16; 17:3; Jeme. 2:26) Rawa ni vakavula nodra dusimaki na gonevuli mera muria na vica na tikina qo. Na nodra rawata na tikina yadua qo e vukei ira mera veiwekani kina kei Jiova, ra qai yalataka vua na nodra bula.
3. Na cava era dau taroga kina na qasenivuli maqosa na taro vakavure vakasama?
3 Na Cava e Vakasamataka Tiko o Gonevuli?: Meda kila ke taura rawa o gonevuli na ka e vulica qai ciqoma, meda kua ni vosa tu ga, meda uqeti koya me dau vakamacala. (Jeme. 1:19) E kila na ka e kaya na iVolatabu me baleta na ulutaga e veivosakitaki tiko? E rawa ni vakamacalataka ga ena nona vosa? Na cava na nona rai ena ka sa vulica? E vakabauta ni yaga na ka e vakavulica na iVolatabu? (1 Ces. 2:13) E kila tiko ni ka e vulica e dodonu me veisautaka na ivakarau ni nona bula? (Kolo. 3:10) Me saumi na taro va qo, e bibi meda taroga na taro vakavure vakasama da qai vakarorogo.—Maciu 16:13-16.
4. Na cava me caka ke dredre vei gonevuli me kila se bulataka na ka e vulica ena iVolatabu?
4 E taura toka na gauna na kena cavuraki na itovo kei na ivakarau ni vakasama sa vakawakana tu. (2 Kor. 10:5) Vakacava ke sega ni ciqoma se bulataka o gonevuli na ka e vulica? E vinakati na vosovoso me soli kina na gauna me tara na lomai gonevuli na ka e vulica ena Vosa ni Kalou kei na cakacaka ni yalo tabu. (1 Kor. 3:6, 7; Iper. 4:12) Mo kua ni vakasaurarataki koya, e vinaka cake me veitalanoataki e dua tale na ulutaga ke dredre vei gonevuli me kila se muria e dua na ivakavuvuli vakaivolatabu. Nida yalovosovoso nida vakavulici koya ena iVolatabu, da qai cakava ena dela ni loloma, ena rairai veisau ni toso na gauna.