Noda iYaya ni Veivakavulici
1. E vakatauvatani vakacava noda itavi ni veivakavulici kei na cakacaka vakamatai?
1 Era dau vakayagataka na matai na veimataqali iyaya ni cakacaka. Eso na iyaya era vakayagataki vagauna ke baleta na cakacaka matailalai, ia eso e vakayagataki vakalevu. O ira sa qaseta na cakacaka vakamatai, era na tawana e veigauna na iyaya qori ena nodra kato, nira kenadau tale ga ni vakayagataka. Me baleta na cakacaka vakaitalatala, na iVolatabu e uqeti ira na lotu vaKarisito yadua mera “tamata cakacaka e sega ni dua na ka [era] maduataka.” (2 Tim. 2:15) Na iyaya bibi duadua cava eda na tawana tiko ena noda kato? Na Vosa ni Kalou—na iyaya bibi duadua eda vakayagataka ‘nida vakavulici ira tiko na lewenivanua mera tisaipeli.’ (Maciu 28:19, 20) Koya gona, meda saga meda kenadau ni “wasea vakadodonu na ivakavuvuli dina.” Ia e tiko eso tale na iyaya ni cakacaka e vakayagataki vakawasoma. Meda saga meda kenadau kina ena noda vakavulici ira na lewenivanua ena ka dina.—Vkai. 22:29.
2. Na cava na iyaya ni veivakavulici eda na vakayagataka vakalevu?
2 iYaya ni Veivakavulici Eda Vakayagataka Vakalevu: Na cava eso tale na iyaya eda na vakayagataka? Na iyaya bibi duadua eda na vakayagataka meda vakavulica kina na ka dina vakaivolatabu oya Na Cava Sara Mada e Kaya na iVolatabu? Ni vulica oti na ivola qori o gonevuli, eda na vakayagataka sara na “Tiko ga ena Loloma ni Kalou” ni na vukei koya me muria na ivakavuvuli vakaivolatabu e veisiga. E vinakati kina meda kenadau ni vakayagataka na rua na ivola qori. E rawa ni vakayagataki tale ga eso na noda brochure. Kena ivakaraitaki na iTukutuku Vinaka Mai Vua na Kalou! e dua vei ira na iyaya bibi duadua me tauyavutaki kina na vuli iVolatabu. Ke tiko ena noda yalava eso era sega ni kila vinaka na wilivola se o ira era vosataka na vosa e lailai na ivola e tabaki kina se sega sara ga, eda rawa ni vakayagataka na brochure Vakarorogo Vua na Kalou se Vakarorogo Vua na Kalou mo Bula Tawamudu. Me rawa nira vagolei mai ena isoqosoqo na gonevuli, ena yaga sara na brochure O Cei Era Cakava Tiko Nikua na Lomai Jiova? E tiko tale ga eso na vidio e veivuke vakalevu ena veivakatisaipelitaki, me vaka na Vuna mo Vulica Kina na iVolatabu?, kei Na Cava e Caka ena Vale ni Soqoni?, Does God Have a Name? (E Tiko na Yaca ni Kalou?), qori eso tale na iyaya e dodonu meda vulica meda vakayagataka vinaka.
3. Ena yaga vakacava na ulutaga ena tabaki tiko ena Noda Cakacaka Vakaitalatala?
3 Eso na ulutaga ena tabaki tiko ena Noda Cakacaka Vakaitalatala ena vukei keda meda kenadau ni vakayagataka na iyaya ni veivakavulici e dau vakayagataki vakalevu. Nida saga meda kenadau kina, eda sa muria tiko na ivakasala uqeti vakalou: “Qarauni iko vinaka tiko ga kei na nomu veivakavulici. Tudei kina, ni o cakava qo o na vakabulai iko kei ira na rogoci iko.”—1 Tim. 4:16.