Masuta Tiko ga na Veivakadonui ni Kalou

E solia vei keda na Kalou e dua na iloloma talei—oya na noda rawa ni vosa vua qai talaucaka na lomada vua ena masu. E masuta o Tui Tevita: “Kemuni na Daurogo masu, era na lako mai vei kemuni na tamata kece.” (Same 65:2) Ia eda na masu vakacava vua na Kalou me rawa ni rogoca qai vakalougatataki keda?

MASU ENA YALOMALUMALUMU MAI VU NI LOMAMU

Ni o masu, o sa sova tiko na lomamu ena mata ni Kalou ena nomu tukuna sara ga vua na ka e tu e lomamu. (Same 62:8) E marautaka vakalevu na Kalou Kaukaua Duadua na masu e vu mai lomada.

CAVUTA NA YACA NI KALOU NI O MASU

E levu tu na icavuti ni Kalou, ia e dua ga na yacana. “O yau o Jiova, qori na yacaqu.” (Aisea 42:8) E voleka ni basika vaka7,000 na yaca i Jiova ena iVolatabu. Levu na parofita era cavuta na yaca ni Kalou nira masu. Kena ivakaraitaki, e kaya o Eparama: “Yalovinaka Jiova, . . . vakatara meu vosa tiko ga [vei kemuni].” (Vakatekivu 18:30) Nida masu gona, meda cavuta tale ga na yaca ni Kalou o Jiova.

MASU GA ENA NOMU VOSA

Se mani vosa cava eda vakayagataka, e kila vinaka na Kalou na ivakarau ni lomada kei na noda vakanananu. E vakadeitaka qori na nona Vosa: “Ni sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”—Cakacaka 10:34, 35.

Ia me vakalougatataki keda na Kalou, e tiko eso tale na ka meda cakava mai na noda masu tu ga. Eda na raica qori ena vica na ulutaga e tarava.