NODA BULA VAKARISITO
Tokona na iVakatagedegede i Jiova
E lewa na Kalou o Jiova na ivakatagedegede ni itovo savasava meda muria. Kena ivakaraitaki, e vakarota ena bula vakawati na nodrau vauci vata me tawamudu na tagane kei na yalewa. (Mac 19:4-6, 9) E cata na veiyacovi tawadodonu. (1Ko 6:9, 10) E vakarautaka mada ga na ivakavuvuli me baleta na isulusulu kei na sasauni era na kilai tani kina nona tamata.—Vkr 22:5; 1Tm 2:9, 10.
Ena vuravura nikua, e levu era sega ni muria na ivakatagedegede i Jiova. (Rom 1:18-32) Na nodra vakatulewa me baleta na isulusulu, sasauni kei na itovo e vakatau sara tiko ga ena ka era nanuma e levu. Levu era sakitaka na nodra ivalavala vakasisila ra qai vakalewai ira e duidui na ivakatagedegede era muria.—1Pi 4:3, 4.
Nida iVakadinadina i Jiova, e dodonu meda yaloqaqa ni tokona na nona ivakatagedegede savasava na Kalou. (Rom 12:9) Ena sala cava? Meda vakatakila ena sala matau na ka e taleitaka o Jiova. Ia ena vinakati tale ga meda muria vinaka na nona ivakatagedegede. Kena ivakaraitaki, nida digia na isulu kei na sasauni, meda tarogi keda: ‘E laurai ena ka au digia na ivakatagedegede i Jiova se na vuravura? E kilai ena noqu isulusulu kei na sasauni niu doka na Kalou?’ Nida digia tale ga e dua na porokaramu ni tivi se yaloyalo, e vinaka meda taroga: ‘Vakacava ena taleitaka o Jiova na porokaramu qo? Na ivakatagedegede i cei e vakabibitaki kina? Ena vakaleqai au vakayalo na ka ni veivakamarautaki au digia? (Sm 101:3) Vakacava ena vakatarabetaki ira na lewenivuvale kei na so tale?’—1Ko 10:31-33.
Na cava e bibi kina meda tutaka na ivakatagedegede i Jiova me baleta na itovo savasava? Sa voleka qo me vakarusa o Jisu Karisito na veimatanitu kei na veika ca. (Isi 9:4-7) O ira ga era cakava na loma ni Kalou era na vakabulai. (1Jn 2:15-17) Koya gona meda tokona mada ga na ivakatagedegede savasava i Jiova me rawa nira raica eso tale noda itovo vinaka, ra qai vakalagilagia kina na Kalou.—1Pi 2:11, 12.
Ni laurai na isulu kei na noqu isasauni, na cava e kilai me baleta na ivakatagedegede au muria?
SARAVA NA VIDIO MO ITOKANI I JIOVA—DUA GA NA TAGANE, DUA GA NA YALEWA, OTI ME VEIVOSAKITAKI NA TARO E RA:
Na cava e ka vakayalomatua kina meda muria na ivakatagedegede i Jiova?
Na cava mera vakavulici luvedra kina na itubutubu nira se lalai me baleta na ivakatagedegede savasava i Jiova?
Na cava mera cakava na uabula kei ira na gone mera vukei ira kina eso tale me yaga vei ira na yalovinaka i Jiova?