Ena Yaga Vakacava Vei Iko na Masu?

E tauvimate bibi o Pamela, qai qara na sala me qaravi kina vakavuniwai. Ia e masu tale ga vua na Kalou me vukei koya me vosota na ituvaki dredre ya. Vakacava e yaga na nona masu?

E kaya o Pamela, “Dua na ka na noqu rere ena gauna au qaravi tiko kina vakavuniwai. Ia na gauna au masu kina vei Jiova, au vakila na vakacegu, au sa lomadei tale ga. Au se vakila tiko ga na mosi, ia e vukei au na masu meu kua ni yalolailai. Na gauna era dau tarogi au kina eso tale se vakacava tiko na kequ ituvaki, au kaya, ‘Au marau tiko, dina niu tauvimate!’”

Ia eda na sega ni masu ga ni tauvi keda e dua na mate bibi. Eda dau sotava kece na ituvaki dredre, so e leqa lelevu, so e lailai ga. Eda vinakata gona meda vukei. Ia ena rawa ni veivuke na masu?

E kaya na iVolatabu: “Biuta vei Jiova na nomu icolacola bibi, ena tokoni iko o koya. Ena sega vakadua ni laiva me bale na yalododonu.” (Same 55:22) Sa bau veivakacegui dina! Ena vukei iko gona vakacava na masu? Ni o masu vua na Kalou ena sala e vakadonuya, ena tokoni iko mo vosota na kemu ituvaki.—Raica na kato “Na Yaga ni Masu.”

Na Yaga ni Masu

Vakacegu ni vakasama

“Na ka kece me vakaraitaki vua na Kalou . . . ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece, ena vuku i Karisito Jisu.” (Filipai 4:6, 7) Ni o talaucaka na lomamu vua na Kalou ena vukei iko mo tauri iko vakamalua, o na sega tale ga ni vakatulewa cala ni dredre na ituvaki.

Vuku vakalou

“Ke dua vei kemuni e lailai vua na vuku, me kerea tiko ga vua na Kalou, ni na soli vua. Ni lomasavu o koya vei keda kece. E sega ni dau vaqara cala.” (Jemesa 1:5) Nida sotava na ituvaki dredre, ena rawa ni cala na noda vakatulewa. Ke o kerea na vuku vua na Kalou, ena rawa ni vukei iko mo vakasamataka e levu na ivakavuvuli vakaivolatabu ena yaga ena nomu vakatulewa.

Veivakaukauataki qai veivakacegui

“Au rawata na ka kece ena vuku i koya e vakaukauataki au.” (Filipai 4:13) Ni Kalou Kaukaua Duadua o Jiova, ena solia vei iko na kaukaua mo kila kina na ka mo cakava, se mo vosota kina na ituvaki dredre. (Aisea 40:29) E tukuna tale ga na iVolatabu ni o Jiova e “Kalou e dau vakacegui keda ena ka kece.” E vakacegui keda ena “veika dredre kece eda sotava.”—2 Korinica 1:3, 4.