Ka Mo Cakava Mo Bula ena Vuravura Vou

Me vaka eda sa vulica mai, na Kalou ena vakarau vakarusai ira kece na tamata ca, kei na leqa era vakavuna. Eda rawa ni nuidei ni na yaco qori. Na vuna? Ni yalataki ena Vosa ni Kalou na iVolatabu ni:

“Sa takali tiko yani na vuravura.”—1 JONI 2:17.

Eda kila ni so era na vakabulai ni tukuni tale ga ena tikinivolatabu qori:

“O koya e cakava na loma ni Kalou ena tu ga me sega ni mudu.”

Koya gona ke da via bula, e dodonu meda cakava na loma ni Kalou. Me rawa nida kila na loma ni Kalou, ena vinakati mada meda vulica na veika me baleti koya.

O NA VAKABULAI KE O KILA NA KALOU

iYaloyalo: 1. E roso na nasi qo ena levu ni nona oca kei na yalolailai. 2. E raica ena nona gauna ni cegu ni dua rau cakacaka vata e marautaka tiko e dua na mekesini. 3. E wilika sara na yalewa rau cakacaka vata e dua na tikinivolatabu, qai solia vua na jw.org kad.

E kaya o Jisu: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga.” (Joni 17:3) Meda vakabulai ena gauna ni veivakarusai qai bula tawamudu, ena vinakati meda ‘vulica na veika me baleta’ na Kalou, meda kilai koya vinaka tale ga. Sega ni kena ibalebale qori meda kila wale ga ni bula tiko, se meda kila ga e vica na ka me baleti koya. E vinakati sara ga mo veitokani kei na Kalou. Me rawa ni dei noda veitokani kei na dua, ena vinakati kina noda gauna. E va tale ga qori nida via veitokani kei na Kalou. Dikeva mada e vica na ka dina e tukuna na iVolatabu, meda veitokani voleka kina kei na Kalou, me dei tale ga.

Ka Dina Eda Vulica ena iVolatabu

Eda vulica ni inaki ni Kalou meda bula ena Parataisi.

A buli rau na imatai ni tamata o Atama kei Ivi, qai vakarautaka vei rau e dua na itikotiko totoka e vakatokai na were o Iteni. E uasivi na yagodrau, e vakarautaka tale ga na Kalou na ka kece me rau marau kina. A rawa sara ga ni rau bula tawamudu. Ke rau veitokani tiko ga kei na Kalou, rau na sega ni mate. Ia rau qai talaidredre ena dua na ivakaro rawarawa sara ni Kalou.

Eda vulica na vuna eda rarawa tiko kina.

Nona talaidredre na imatai ni tagane o Atama, sa sega ni rawa kina ni bula tawamudu, wili kina o keda kece na vo ni kawatamata. E kaya na iVolatabu: “Ena vuku ni dua ga na tamata e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga.” (Roma 5:12) Me vaka ga nodrau rawa ni vakadewa na mate na itubutubu vei luvedrau, o Atama e vakadewa tale ga na ivalavala ca, kei na mate vei keda kece nona kawa. Ya na vuna eda qase kina da qai mate.

Eda vulica na ka sa cakava na Kalou me vukei keda.

E kaya na iVolatabu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.” (Joni 3:16) Na Kalou e talai Jisu mai vuravura me mate ena vukuda. E kaya e dua na turaga ni Idia o Prabhakar e yabaki 86 me baleta na loloma qori: “Au kila kina na levu ni nona lomani au o Jiova.a E dolava na sala meu rawata kina na bula tawamudu.”

Eda vulica na sala meda vakavinavinakataka kina nona vukei keda na Kalou.

E kaya na iVolatabu nida rawa ni vakaraitaka noda vakavinavinaka vua na Kalou, nida “muria tiko ga na nona ivunau.” (1 Joni 2:3) E lomani keda na Kalou, e vakavulici keda gona ena sala meda marautaka kina noda bula ena gauna qo. (Aisea 48:17, 18) Na Kalou e sega ni vinakata meda rarawa. Ke da talairawarawa vua, e yalataka nida na marautaka noda bula ena gauna qo, eda na rawa tale ga ni bula tawamudu.

WILIKA E VEISGA NA VOSA NI KALOU NA IVOLATABU

E rai cake na nasi ni wilika oti na iVolatabu ena nona gauna ni vakasigalevu. — Ke o dau masuta na veivuke ni Kalou qai cakava na ka e vinakata, o na rawa ni vakabulai ena gauna ni veivakarusai

Eda dau kana meda rawa ni bula. Ia e kaya o Jisu: “E sega ni bula na tamata ena madrai wale ga, e bula ga ena vosa kece e lako mai na gusu i Jiova.”—Maciu 4:4.

Ena gauna qo, eda rawa ni wilika na vosa i Jiova ena iVolatabu. Ni o vulica na iVolatabu, o na kila kina na ka e cakava na Kalou ena veigauna sa oti, ena gauna qo, kei na veika ena cakava ena gauna se bera mai.

KEREA NA VEIVUKE NI KALOU

Vacava ke o via cakava na ka e vinakata na Kalou, ia vaka me dredre tiko mo muduka na itovo ca? Ke va qori, ena yaga vakalevu nomu kila vinaka na Kalou.

Dikeva nona ivakaraitaki e dua na yalewa eda na vakatoka me o Sakura, e dau veiyacovi vakasisila i liu. Ni tekivu vuli iVolatabu, e qai kila ni vakarota na Kalou meda “dro tani mai na veiyacovi tawadodonu.” (1 Korinica 6:18) E kerea vua na Kalou me vakaukauataki koya, toso na gauna sa qai biuta na itovo ca qori. Ia se vinakati tiko ga vua me vorata na veitemaki. E kaya, “Keu vakasamataka mai na veika vakasisila, au dau masu sara ga mai vu ni lomaqu vei Jiova. Au kila niu sega ni rawa ni vorata ga ena noqu kaukaua. Na masu e vakavolekati au sara ga vei Jiova.” Me vakataki Sakura, e vica vata na milioni era sa vulica tiko na veika me baleta na Kalou. E vakaukauataki ira me rawa nira veisautaka nodra ivakarau ni bula mera vakamarautaki koya.—Filipai 4:13.

Na levu ga ni nomu vulica na veika me baleta na Kalou, o na kilai koya vinaka kina, ena ‘kilai iko tale ga na Kalou’ me nona itokani voleka. (Kalatia 4:9; Same 25:14) O na rawa tale ga ni vakabulai mo bula ena vuravura vou e yalataka na Kalou. Ia ena vakacava na bula ena vuravura vou? Ena vakamacalataki qori ena ulutaga tarava.

a O Jiova na yaca ni Kalou e volai ena iVolatabu.