O rawa ni vakavakarau qo mo rawa ni bula ena vuravura vinaka sa voleka
Sa Voleka na Vuravura Vou Parataisi!
Na Kalou a bulia na vuravura mera bula tawamudu kina na tamata yalododonu. (Same 37:29) A vakarautaka vei rau na imatai ni veiwatini, o Atama kei Ivi, e dua na itikotiko totoka na were o Iteni. E qai lesia vei rau kei na nodrau kawa e dua na itavi, ya mera teivaka na vuravura qai taqomaka vinaka.—Vakatekivu 1:28; 2:15.
Na vuravura ena gauna qo e sa sega ni vaka na Parataisi a vinakata na Kalou. Ia e se dei tiko ga na nona inaki. Ena veisautaka vakacava na Kalou na vuravura me Parataisi? Me vaka eda sa raica mai ena vica na ulutaga sa oti, na Kalou ena sega ni vakarusa na vuravura eda bula tiko kina. Ia ena solia vei ira na tamata yalodina mera bula kina. Ni sa vakayacora na Kalou na nona vosa ni yalayala, ena vacava tu na bula ena vuravura?
Dua ga na matanitu
Na Matanitu ni Kalou mai lomalagi ena vakarau liutaka mai na kawatamata kece. Ena marautaki na bula e vuravura, era na bula veiyaloni na tamata, era na veilomani ra qai marautaka na nodra cakacaka. Na Kalou sa lesi Jisu me Tui me liutaka na vuravura. O Jisu e sega ni vakataki ira na iliuliu ena gauna qo, ni kauaitaki ira dina na vakarurugi ena nona lewa. Ena vakilai na loloma ena nona veiliutaki, ena yalovinaka, yalololoma qai dau lewadodonu.—Aisea 11:4.
Veiyaloni na vuravura taucoko
Ena sega ni tawasei ira na bula ena vuravura vou, na duidui vakamatanitu se matatamata. Era na duavata na tamata kece. (Vakatakila 7:9, 10) O ira kece na bula e vuravura era na lomana na Kalou kei na kainodra, era na cakacaka vata ena veiyaloni me rawati na inaki ni Kalou. Oya me taqomaki qai qaravi vinaka na nodra itikotiko na vuravura.—Same 115:16.
Taqomaki na veikabula
Gauna sa na liutaka kina na vuravura na Matanitu ni Kalou, ena lewa na Dauveibuli na veika kece me baleta na draki, ena totoka vakaoti. (Same 24:1, 2) Ni se bula i vuravura o Jisu, a vakaraitaka vakalailai na kaukaua e solia vua na Kalou, ena nona tarova e dua na draki ca vakadomobula. (Marika 4:39, 41) Ni liutaka na vuravura o Jisu, sa na oti vakadua na leqa tubukoso, eda na sega tale ni rerevaka tiko. Era na bula veiyaloni na tamata kei na manumanu, ena sega ni vakacacani na vuravura.—Osea 2:18.
Bulabula vinaka qai levu na kakana
Era na bulabula vinaka kece na tamata. Sega ni dua ena tauvimate, qase, se mate. (Aisea 35:5, 6) Era na marautaka na vuravura totoka savasava, me vaka ga na were o Iteni rau marautaka na imatai ni veiwatini. Ena bulabula tale ga na qele qai vuavuaivinaka, ena sega ni leqa na kakana. (Vakatekivu 2:9) Me vakataki Isireli na matanitu makawa ni Kalou, o ira kece na bula ena Parataisi era na ‘kania na kedra madrai mera mamau.’—Vunau ni Soro 26:4, 5.
Vakacegu dina kei na sautu
Ni sa liutaka duadua ga na Matanitu ni Kalou na vuravura taucoko, ena marautaki na bula vakacegu, era na veiyaloni na tamata qai sega na veivakaduiduitaki. Sa na sega na ivalu, vakatanitaki ni lewa, se me ka ni oca na sasagataki ni bula ni veisiga. E yalataka na iVolatabu: “Era na dui dabe ena ruku ni nodra vaini kei na ruku ni nodra vunilolo, ena sega ni dua me vakarerei ira.”—Maika 4:3, 4.
Vale kei na cakacaka marautaki
Ena tiko na nodra vale na vuvale kece, ena sega ni dua me cemuri ira qai marautaki na nodra cakacaka. Me vaka e kaya na iVolatabu, era na “sega ni oca wale” ena nodra cakacaka kaukaua.—Aisea 65:21-23.
Vuli vinaka duadua
E yalataka na iVolatabu “Ni na robota na vuravura na kilaka me baleti Jiova.” (Aisea 11:9) O ira na bula ena vuravura vou era na vulica na titobu ni nona vuku na Dauveibuli o Jiova. Era na vulica tale ga na totoka ni nona ibulibuli. Era na sega ni vakayagataka nodra kilaka mera buli yaragi se mera veivakamatei. (Aisea 2:4) Era na vulica ga mera bula veiyaloni ra qai taqomaka na vuravura.—Same 37:11.
Bula tawamudu
Na Kalou e bulia sara vakavinaka na vuravura qo meda marautaka kina na bula ena veisiga. E vinakata meda bula tawamudu na tamata ena vuravura. Qori na nona inaki mai na ivakatekivu. (Same 37:29; Aisea 45:18) Me rawati qori, na Kalou ena ‘tiloma vakadua na mate.’ (Aisea 25:8) E yalataka na iVolatabu, “Sa na sega tale na mate, na lolosi, na tagiyaso, kei na mosi.” (Vakatakila 21:4) Na Kalou ena vakarautaka na inuinui ni bula tawamudu vei ira kece na tamata. Ya o ira na vakabulai ni vakarusai na veika ca kece, kei na dua na iwiliwili levu era na vakaturi ena vuravura vou.—Joni 5:28, 29; Cakacaka 24:15.
Ena gauna qo era sa vakavakarau tiko e vicavata na milioni, mera bula ena vuravura Parataisi sa voleka e liutaka na Matanitu ni Kalou. Dina ni se sega ni uasivi na nodra bula se na yagodra, era sa sasagataka tiko mera bulataka na itovo e vinakata na Kalou ena vuravura vou. E rawa vacava ya? Qori nodra vulica na veika me baleta na Kalou o Jiova, kei Jisu Karisito e tala mai.—Joni 17:3.
Vacava mo vulica eso tale na ka mo vakabulai kina ni vakarusai na veika ca ena vuravura qo, qai bula ena vuravura vinaka sa voleka. Kerea vua e dua na iVakadinadina i Jiova mo vulica na iVolatabu, e sega ni saumi.