Rawa ni Dei Nomu Veigauna se Bera Mai ke Vinaka Nomu iTovo?

Ena vica na senitiuri sa oti era nanuma e levu, ni na vinaka nodra veigauna se bera mai ke vinaka nodra itovo. Kena ivakaraitaki, e levu mai Esia era duavata kei na ka e tukuna na qasenivuli kilai levu o Confucius (551-479 B.G.V.) E kaya: “Kua ni cakava vei ira eso tale na ka o sega ni vinakata me caka vei iko.”a

NODRA VAKATULEWA E LEVU

Levu era vakabauta ke vinaka na nodra itovo, ena lai vinaka nodra veigauna se bera mai. Era saga gona mera veidokai, itovo vinaka, qarava vinaka nodra itavi ra qai saga tiko ga me vinaka nodra lewaeloma. E kaya e dua na yalewa o Lina mai Vietnam: “O na vakalougatataki ke o daudina qai vinaka nomu itovo.”

Na yalewa vata ga qori e solia tiko na kakana vei ira na dravudravua kei ira e sega nodra vale.

Eso e dau uqeti ira nodra lotu me vinaka nodra itovo. E tukuna e dua na tagane o Uraia e tiko mai Taiwan: “Ke vinaka na noda itovo eda na marau ena gauna eda mate kina. Ia ke sega, eda na lai vakararawataki.”

CAVA E YACO KINA?

Oti e dua na siga e oca qai rarawa e keveta tiko qo na luvena tagane.

Eda vakadinadinataka ni yaga vakalevu vei keda noda caka vinaka vei ira eso tale. Ia era raica e levu ni sega ni dau saumi lesu na ka vinaka era cakava vei ira eso tale. E kaya e dua na yalewa o Seini mai Ogo Kogo: “Na ka au sotava au raica kina ni sega ni dau yaga tu ga noda caka vinaka vei ira eso tale. Au solia noqu vinaka kece meu qarava noqu vuvale. Ia e leqa noqu vakawati, qai biuti keirau vakaveitinani o watiqu.”

Levu tale era raica nira sega ni tamata vinaka kece na daulotu. E kaya o Ema e tiko mai Japani: “Au lewena e dua na lotu qai dau tuvanaka na veika mera cakava na itabagone. Ia au kurabuitaka niu raica eso era itovo vakasisila, veivuvutaki, era butakoca mada ga na ilavo ni lotu.”

“Au solia noqu vinaka kece meu qarava noqu vuvale. Ia e leqa noqu vakawati, qai biuti keirau vakaveitinani o watiqu.”—SEINI, OGO KOGO

Era saga eso na daulotu me vinaka na nodra itovo. Ia toso na gauna era rarawataka ni sega ni saumi lesu na veika vinaka era dau cakava. Qori na ka sara ga e sotava e dua na yalewa o Vani mai Vietnam. E kaya: “Veisiga au na kauta na vuata, senikau, kei na kakana meu lai cabora vei ira na tukaqu era sa mate. Vica vata na yabaki noqu caka vinaka tu mai, au vakaitavi tale ga ena so na ivakarau ni sokalou. Ia e tauvimate bibi o watiqu, a mate tale ga o luvequ yalewa ni vuli tu mai vanuatani.”

SEGA NI RAWATI NA MARAU KE VINAKA NOMU ITOVO

E bibi na itovo vinaka, ia e sega ni vakatau kina na dei ni noda veigauna se bera mai. Na vuna? Raica mada na ka e kaya na iVolatabu.

ERA NA SEGA NI VIA CAKA VINAKA NA TAMATA KECE

“E dua wale na tamata ivalavala ca e rawa ni vakacacana e levu na ka vinaka.”—DAUVUNAU 9:18.

Ke o saga ena nomu vinaka taucoko mo dua na tamata vinaka, e rawa ni vakaleqai iko tale na ka ca era cakava eso. Kena ivakaraitaki, de dua o sa muria tiko na ivakaro me kua na vakasosoqoni vata ena gauna ni matedewa qo. Ia vakacava ke ra talaidredre tiko ga eso? Qori e rawa ni vakavuna mera lai tauvimate o ira era muria tiko na ivakaro.

LEVU ERA SEGA NI VAKADUIDUITAKA NA KA E VINAKA KEI NA KA E CA

“E tiko na sala e rairai donu vua na tamata, ia na kena itinitini na sala ga ni mate.”—VOSA VAKAIBALEBALE 14:12.

Ena itukutuku makawa e tu kina e levu na kedra italanoa o ira era nanuma ni sa donu tu na ka era cakava, ia ra qai liaca ni cala sara tu ga. Era sotava kina na ca ni nodra vakatulewa.

EDA SEGA NI LEWA NODA VEISIGA NIMATAKA

“Oni sega mada ga ni kila se na vakaevei na nomuni bula nimataka.”—JEMESA 4:14.

Na tamata vinaka mada ga e rawa ni mate vakasauri. Kena ivakaraitaki, na veitauvi ni COVID-19 e levu era vakayalia nodra bula nira saga mera vukea eso tale. Se, eso era sotava tale ga na ituvaki a sotava e dua na yalewa o Litia mai Jaina. A mate o tamana ena dua na coqa vakadomubula. E kaya: “Au sega ni kila na vuna e mate kina o tamaqu. E turaga vinaka, dau cakacaka vakaukaua qai yalomalumalumu. Ratou bula kece na tiko ena vakacalaka ya, vakavo ga o tamaqu.”

Ena vinaka vakacava noda veisiga nimataka ke sega ni vakatau qori ena noda itovo vinaka? Ena sauma qori e dua na idusidusi e nuitaki. Eda na kila tale ga na sala me vinaka kina noda veisiga nimataka. Eda na raica i vei na idusidusi qori?

a Me ikuri ni ivakamacala i Confucius, raica na wase 7, parakaravu 31-35, ni vola Mankind’s Search for God, tabaka na iVakadinadina i Jiova. E tiko tale ga ena neimami website na www.pr2711.com.