ULUTAGA NI VULI 52
Vukea Eso Tale Mera Vosota na Veika Dredre
“Kua ni bureitaka na ka vinaka vei ira e dodonu me soli vei ira ke tu vei iko na kaukaua mo veivuke.”—VKAI. 3:27.
SERE 103 iVakatawa—Era iSolisoli Tamata
KA ENA VULICIa
1. E sauma vakacava o Jiova nona masu na nona dauveiqaravi?
VAKACAVA o kila tiko ni rawa ni vakayagataki iko o Jiova me saumi nona masu mai vu ni lomana e dua? O rawa sara ga ni veivuke ke o qase se dauveiqaravi ni ivavakoso, painia, dautukutuku ni ivavakoso, gone se qase, tagane se yalewa. Ni kere veivuke vei Jiova e dua e lomani koya, na noda Kalou ena rawa ni vakayagataki ira na qase ni ivavakoso kei na so tale na dausokalou yalodina mera “vukei” koya, mera “vakacegui” koya tale ga. (Kolo. 4:11) Eda marau nida qaravi Jiova kei ira na tacida ena sala qori! Eda rawa ni veivuke ni veitauvi e dua na mate, ena gauna ni leqa tubukoso, se veivakacacani.
VEIVUKE ENA GAUNA NI MATEDEWA
2. Na cava ena rairai dredre kina meda vukea eso tale ena gauna ni matedewa?
2 Ena gauna ni matedewa, ena dredre toka meda vukea eso tale. Kena ivakaraitaki, de dua eda na via gade vei ira noda itokani, ia ena leqataki na noda bula. Eda na rairai vinakata meda sureti ira era leqa vakailavo meda mai kanavata, ia e sega tale ga ni rawa qori. Eda via vukea eso tale, ia e dredre toka nira tauvimate se leqa vakailavo na lewe ni noda vuvale. Eda vinakata meda vukei ira na tacida, ena marautaka o Jiova ke da cakava na ka eda rawata. (Vkai. 3:27; 19:17) Na cava meda cakava?
3. Na cava eda vulica vei ira na qase ena ivavakoso nei Lesi? (Jeremaia 23:4)
3 Ka mera cakava na qase. Ke o qase ni ivavakoso, saga mo kilai ira vinaka na sipi. (Wilika Jeremaia 23:4.) E kaya o Lesi, na tacida e tukuni ena ulutaga sa oti, “O ira na qase ena noqu iwasewase era dau cakacaka vata kei au kei na so tale ena cakacaka vakaitalatala, keimami dau cakava vata tale ga eso na ka.”b Na nodra sasaga na ivakatawa qori e rawarawa kina nira vukei Lesi ni tete na matedewa na COVID-19, era takali tale ga kina eso na lewe ni nona vuvale.
4. Na cava e rawa kina nira vukei Lesi na qase ni ivavakoso? Cava eda vulica?
4 E vakamacalataka o Lesi: “Niu sa veitokani vinaka tiko kei ira na qase ni ivavakoso, e rawarawa kina niu tukuna na lomaqu kei na ka au kauai kina.” Na cava era vulica na qase? Moni vakatawai ira na lewe ni ivavakoso ni bera na leqa. Moni veitokani kei ira. Ke dredre mo sikovi ira ena vuku ni matedewa, vakayagataka eso tale na sala. E kaya o Lesi: “Eso na gauna era dau qiri se vakau itukutuku mai e vica na qase ena dua vata ga na siga. E uqeti au sara ga na tikinivolatabu era tukuna mai, ia au kila vinaka tu na veitikinivolatabu qori.”
5. Era na kila vakacava na qase na ka era gadreva na mataveitacini? Era na veivuke vakacava?
5 Dua na sala eda na kila kina na ka era gadreva na tacida oya nida vakayagataka na taro e tarogi vakamatau. (Vkai. 20:5) Vakacava e veirauti tiko na kedra kakana, na wainimate, kei na so tale na ka ena yaga vei ira? Era leqataka ni rawa nira vakacegui mai na nodra cakacaka, se sega ni veirauti na isau ni nodra rede? Ke vakarautaka na matanitu na veivuke, vakacava era vinakata noda veitokoni ena kena kerei? Era vukei Lesi na mataveitacini ena ka vakayago. Ia na loloma era vakaraitaka na qase ni ivavakoso kei na nodra veivakayaloqaqataki mai na iVolatabu, e uqeti koya me vosota. E kaya: “Eratou masu vata kei au na qase. Au sega ni nanuma rawa na ka eratou cavuta, ia au nanuma vinaka na kena veivakacegui. E vaka ga me tukuna tiko o Jiova, ‘Au na tiko vata kei iko.’”—Aisea 41:10, 13.
E marau na tacida e liutaka tiko na itavi nira saumitaro e levu na tacida era tiko ena soqoni vaka kina e dua na tacida tauvimate e sema tiko mai ena vidio (Raica na parakaravu 6)
6. E rawa nira veivuke vakacava e levu ena ivavakoso? (Raica na iyaloyalo.)
6 Ka meda cakava na kena vo. Eda namaka mera liu sara ga na qase ni ivavakoso ena nodra karoni na mataveitacini. Ia e vinakata o Jiova meda vakaitavi kece ena nodra vakayaloqaqataki kei na nodra vukei na tacida. (Kala. 6:10) Na ka lalai mada ga eda rawa ni cakava me ivakaraitaki ni noda loloma, ena uqeti koya e tauvimate tiko. Kena ivakaraitaki, e rawa ni volavola se droini e dua na gone qai vakau vua e dua na tacida tagane me vakayaloqaqataki koya. E rawa ni talai e dua na gone e qase cake me lai volivoli vua e dua na tacida yalewa, se veivuke ena so tale na ka. Vakacava eda rawa ni vakasaqara na kena kakana e dua e tauvimate qai lai biu ena nona vale? E macala ni vinakati mera vakayaloqaqataki kece na lewe ni ivavakoso ni tete tiko na matedewa. De dua meda tiko tale vakalailai ni oti na soqoni meda veimaliwai kei ira na mataveitacini se veivosaki ena vidio. Vakacava o ira na qase ni ivavakoso? E vinakati tale ga mera vakayaloqaqataki. Eso na tacida era vakauta na nodra ivola ni vakavinavinaka vei ira na qase era oga vakalevu ena gauna ni matedewa. Ena yaga dina nida cakava na noda itavi meda “veivakayaloqaqataki tiko,” meda “veivakauqeti” tale ga.—1 Ces. 5:11.
VEIVUKE ENA LEQA TUBUKOSO
7. Na cava ena rairai yaco ni oti na leqa tubukoso?
7 E rawa ni vakasauri na leqa tubukoso, e rawa sara ga ni veivakaleqai. Eso ena rairai vakacacani na ka era taukena, na nodra vale, se takali na wekadra voleka. E yaco tale ga qori vei ira na mataveitacini. Eda na vukei ira vakacava?
8. Na cava mera cakava na qase kei na ulunivuvale ni bera na leqa tubukoso?
8 Ka mera cakava na qase. Kemuni na qase, moni vukei ira na mataveitacini mera vakarautaki ira ni bera na leqa tubukoso. Moni vakadeitaka nira sa kila kece tiko na lewe ni ivavakoso na ka mera cakava mera taqomaki kina, oti mera qiriti ira na qase. E kaya o Margaret e tukuni ena ulutaga sa oti: “Era vakasalataki keimami na qase ena veika e gadrevi ena ivavakoso, ni se bera ni oti na gauna ni kama ena neimami yasayasa. Era tukuna ke ra vakarota na vakailesilesi ni matanitu me keimami toki se leqataki na neimami bula, me keimami biubiu vakatotolo.” E yaco donu mai na ivakasala qori. Ni oti ga e lima na macawa, sa tekivu na kama. Ena sokalou vakavuvale, mera veivosakitaka na ulunivuvale na ka mera cakava yadudua na lewenivuvale. Ke o vakavakarau rawa, vaka kina o ira na luvemuni, o na sega ni taqaya ena gauna ni leqa tubukoso.
9. Era na veivuke vakacava na qase ni bera na leqa tubukoso kei na gauna e oti kina?
9 Ke o ivakatawa ni iwasewase lailai, vakadeitaka ni sa donu na naba ni talevoni kei na vanua era tiko kina na mataveitacini era lewe ni nomu iwasewase ni cakacaka vakavunau. Mo cakava rawa qori ni bera na leqa tubukoso. Vola na yacadra, taleva mo vakadeitaka ni sa donu tiko. Ena gauna ni leqa tubukoso, o rawa ni qiriti ira yadua mo kila na ka era gadreva. Mo solia totolo na itukutuku qori vua na kodineita ni ilawalawa qase, ena qai qirita o koya na ivakatawa ni tabacakacaka. Na nomuni cakacaka vata ena vakarawarawataka na veivuke. Ni oti na kama ena vanua e tiko kina o Margaret, e yadra tu ga na nona ivakatawa ni tabacakacaka me 36 na aua, e osooso sara ni tuvanaka nodra cakacaka na qase mera qiriti e rauta ni 450 na tacida era sa biuta mai na nodra vale me rawa nira vukei. (2 Kor. 11:27) Nodra cakava qori, era vukei rawa kina o ira mera vakaicilitaki.
10. Na cava e bibi kina nodra veivakatawani na qase ni ivavakoso? (Joni 21:15)
10 E nodra itavi na qase ni ivavakoso mera veivakayaloqaqataki mai na iVolatabu, mera vakacegui ira tale ga na yalolailai. (1 Pita 5:2) Ena gauna ni leqa tubukoso, mera vakadeitaka na qase nira taqomaki vinaka na mataveitacini, sa tiko na kedra kakana, nodra isulu, kei na vanua mera tiko kina. Ia ni oti tale e vica na vula, ena rairai vinakati mera vakayaloqaqataki tiko ga mai na iVolatabu na mataveitacini, mera vakacegui. (Wilika Joni 21:15.) O Harold, e lewe ni Komiti ni Tabana, e veivosaki kei na levu na tacida e donui ira na leqa tubukoso. E kaya:“Ena taura na gauna me vinaka tale na ituvaki. De dua sa na matau tale vei ira na nodra bula, ia e rawa nira vakasamataki ira tiko ga na wekadra voleka era sa takali, na vakacacani ni nodra iyau mareqeti, kei na ka vakadomobula era donuya. Qori ena rawa ni vakavuna nodra rarawa tiko ga. Qo e sega ni kena ibalebale ni lailai na nodra vakabauta, e vakaraitaka ga na ka e dau yacovi keda na tamata.”
11. Era na vukei vakacava na vuvale?
11 Era na muria na qase ni ivavakoso na ivakasala mera “tagi vata kei ira era tagi.” (Roma 12:15) E vinakati me vakadeitaki vei ira na tacida era donuya na leqa tubukoso ni lomani ira tiko ga o Jiova kei ira na mataveitacini. Era na via vukei ira na vuvale mera dei tiko ga ena nodra ituvatuva vakayalo, me vaka na masu, vuli iVolatabu, tiko ena soqoni, kei na cakacaka vakavunau. Rawa tale ga nira uqeti ira na itubutubu mera vukei luvedra mera kauaitaka tiko ga na veika ena sega ni vakarusai rawa ena leqa tubukoso. Ra itubutubu, moni vukei ira na luvemuni mera kila ni nodra iTokani tiko ga o Jiova, ena sega vakadua ni biuti ira. Moni vakamacalataka tale ga nira tiko na tacidra vakayalo e vuravura raraba, era tu vakarau mera veivuke.—1 Pita 2:17.
Ni oti na leqa tubukoso, o rawa ni bole mo veivuke ena vanua o tiko kina? (Raica na parakaravu 12)e
12. Na cava eda rawa ni cakava meda veivuke ena vakacoko? (Raica na iyaloyalo.)
12 Ka meda cakava na kena vo. Ke yaco na leqa tubukoso ena dua na vanua voleka, tarogi ira na qase ena sala mo veivuke kina. Kena ivakaraitaki, de dua mo veivakaicilitaki vakalekaleka vei ira na mataveitacini era biuta mai na nodra itikotiko, se vei ira na bole yani mera veivuke ena vakacoko. De dua mo kauta na kedra kakana na dautukutuku se so tale na ka era gadreva. Ke yaco na leqa tubukoso ena dua na vanua yawa, o se rawa tiko ga ni veivuke. Ena sala cava? Mo masulaki ira era donuya na leqa tubukoso. (2 Kor. 1:8-11) O rawa tale ga ni veitokoni vakailavo ena vakacoko ni o cau ena cakacaka e vuravura raraba. (2 Kor. 8:2-5) Ke o rawa ni lai veivuke ena vanua e vakaleqai, tarogi ira na qase me baleta na bole cakacaka. Ke o sureti mo veivuke, de dua o na vakavulici mo rawa ni veivuke ena vanua kei na gauna e vinakati kina.
VUKEI IRA NA TACIDA MERA VOSOTA NA VEIVAKACACANI
13. Na leqa cava era sotava na tacida ena vanua e vakatabui kina na noda cakacaka?
13 Ena vanua e vakatabui kina na noda cakacaka, e vakadredretaka na nodra bula na mataveitacini na veivakacacani. O ira na tacida ena veivanua qori era se leqa tiko ga vakailavo, era tauvimate, e takali tale ga na wekadra lomani. Ia ena vuku ni vakatatabu, ena dredre toka nodra lai veisiko na qase se mera veivosaki kei ira e vinakati mera vakayaloqaqataki. Qori na ka e sotava o Andrei, e tukuni ena ulutaga sa oti. E leqa vakailavo e dua na tacida yalewa ena nona iwasewase ni cakacaka vakavunau. Oti ya e coqa ena motoka. E vinakati me caka vua e vica na veisele, e sega ni rawa tale ga ni cakacaka. Ni vakatabui tu na noda cakacaka, vaka kina na tete ni matedewa, era cakava eso na ka na mataveitacini mera veivuke kina, e kila tale ga o Jiova na ka e gadreva na tacida yalewa qori.
14. Era na vakaraitaka vakacava na qase nira vakararavi vei Jiova?
14 Ka mera cakava na qase. A masu o Andrei, e cakava tale ga na ka e rawata. Na cava e cakava o Jiova? E uqeti ira na mataveitacini e rawarawa nodra veitosoyaki mera veivuke. Eso era vakavodoka na tacida yalewa qori me lai laurai vei vuniwai. Eso tale era soli ilavo vua. E uqeti ira o Jiova mera veivuke ena ka era rawata, e vakalougatataka tale ga na nodra sasaga ena duavata kei na nodra yaloqaqa. (Iper. 13:16) Kemuni na qase, ke vakadredretaki na noda cakacaka, kerea eso tale mera veivuke. (Jere. 36:5, 6) Koya e bibi sara, moni vakararavi vei Jiova. Ena vukei kemuni moni vukei ira na mataveitacini.
15. Eda na duavata tiko ga vakacava ni vakatabui noda cakacaka?
15 Ka meda cakava na kena vo. Ni vakatabui na noda cakacaka, de dua sa na lailai ga o ira eda veimaliwai vata. Koya gona e bibi sara meda veiyaloni tiko ga. Meda vorati Setani, meda kua ni veivala vakataki keda. Meda raibaleta nodra malumalumu na tacida, se saga me wali totolo na noda duidui. (Vkai. 19:11; Efeso 4:26) Meda vakaliuliu meda veivukei. (Taito 3:14) Na nodra veitokoni na mataveitacini mera vukea na tacida yalewa ya e yaga vakalevu ena nodra iwasewase lailai ni vunau. Era veivolekati sara me vaka ga e dua na vuvale.—Same 133:1.
16. Me salavata kei na Kolosa 4:3, 18, eda na vukei ira vakacava na tacida era vakacacani?
16 Era qaravi Jiova tiko ga e vica vata na udolu na tacida ni vakadredretaka na matanitu na nodra cakacaka. Eso era vesu ena vuku ni nodra vakabauta. Meda masulaki ira kei na nodra vuvale. Meda masulaki ira tale ga era yaloqaqa mera tokoni ira na tacida ni rawa mada ga nira vesu. O ira na tacida qori era veivakayaloqaqataki, era vakarautaka na ka vakayago e yaga vei ira, era vosa tale ga ena vukudra ena mataveilewai.c (Wilika Kolosa 4:3, 18.) Kua ni guilecava ni yaga vakalevu nomu masulaki ira na tacida qori!—2 Ces. 3:1, 2; 1 Tim. 2:1, 2.
O na vakarautaki ratou vakacava ena gauna qo na nomu vuvale ena veivakacacani? (Raica na parakaravu 17)
17. O na vakarautaki iko vakacava ena gauna qo ena veivakacacani?
17 Mo vakavakarau rawa qo kei ratou na nomu vuvale ni bera na veivakacacani. (Caka. 14:22) Kua ni vakasamataka na ka ca ena rawa ni yaco. Ia mo vaqaqacotaka na nomu veiwekani kei Jiova, vukei ira tale ga na luvemu mera cakava qori. Ke o lomaleqa ena so na gauna, sova na lomamu vua na Kalou. (Same 62:7, 8) Mo dou veivosakitaka vakavuvale na vuna kece mo dou nuitaki koya kina.d Ena vuku ni leqa tubukoso, nomu vakavakarau kei na nomu nuitaki Jiova ena uqeti ira na luvemu mera yaloqaqa, mera kua tale ga ni lomaleqa.
18. Na bula cava eda vakanamata kina?
18 Na vakacegu ni Kalou ena vakanuideitaki keda. (Fpai. 4:6, 7) Ena vakayagataka qori o Jiova me vakaceguya na lomada ena gauna ni matedewa, leqa tubukoso, kei na veivakacacani ena gauna qo. E vakayagataki ira na qase ni ivavakoso gugumatua mera vakatawai keda. E uqeti keda tale ga meda dau veivukei vakamataveitacini. Na vakacegu eda marautaka tiko ena gauna qo ena vakarautaki keda ena levu tale na veika dredre sa tu mai liu, okati kina na “veivakararawataki levu.” (Maciu 24:21) Ena vinakati ena gauna ya meda veiyaloni tiko ga qai vukea eso tale mera cakava qori. Ia ni oti ya, sa na sega tale na leqa lelevu ena vakavu lomaleqa. Eda sa na qai marautaka na vakacegu dina me tawamudu e vinakata vei keda o Jiova.—Aisea 26:3, 4.
SERE 109 Loloma Mai vu ni Lomada
a O Jiova e dau vakayagataki ira nona tamata yalodina mera vukei ira era sotava tiko na veika dredre. Ena rawa ni vakayagataki iko tale ga mo ivurevure ni veivakayaloqaqataki vei ira na mataveitacini. Meda raica mada na sala eda rawa ni vukei ira kina na leqa tu.
b Sa veisau eso na yaca.
c E sega ni rawa ni vakauta na valenivolavola ni tabana se o ira ena itikotiko e liu na noda ivola vei ira na mataveitacini era tiko e valeniveivesu.
d Raica na ulutaga “Mo Vakarautaki Iko ena Veivakacacani” ena Vale ni Vakatawa ni Julai 2019.
e IVAKAMACALA NI IYALOYALO: Ni oti na leqa tubukoso, rau kau kakana na veiwatini qo vua dua na vuvale e tiko vakalekaleka ena dua na vanua.