O Se Nanuma Tiko?

O bau wilika vinaka na itabataba ni Vale ni Vakatawa ni yabaki qo? Raica mada ke o rawa ni sauma e vica na taro qo:

Ena yaga vakacava nida vakayagataka noda gauna meda vosa kina vei Jiova, vakarorogo vua, meda vakasamataki koya tale ga?

Eda na vakatulewa vinaka kina, eda na qasenivuli vinaka, ena dei noda vakabauta, eda na lomani Jiova tale ga vakalevu.—w22.01, t. 30-31.

Na cava ena vukei keda meda nuitaki Jiova kei ira e digitaka?

Qo na gauna meda nuitaka kina na ka e dau cakava na Kalou nida sega ni lomatarotarotaka na nodra veidusimaki kei na vakatulewa na qase ni ivavakoso. Ena veivakararawataki levu eda na tu vakarau meda talairawarawa ke mawi se dredre na veidusimaki.—w22.02, t. 4-6.

Na cava e vakaibalebaletaka na agilosi ni tukuna vei Sakaraia me baleta na “ivakarau e liga i Serupepeli [na Kovana]”? (Saka. 4:8-10)

Na raivotu qo e vakacegui ira na tamata ni Kalou ni na vakaoti na tara ni valenisoro. Ke ka wale se lailai mada ga, ena salavata kei na ivakatagedegede i Jiova.—w22.03, t. 16-17.

Eda na “ivakaraitaki” vinaka vakacava ena “vosa”? (1 Tim. 4:12)

Eda vosa ena yalovinaka kei na veidokai ena cakacaka vakaitalatala, eda na lagasere mai vu ni lomada, saumitaro wasoma ena soqoni, eda na dau dina, veiuqeti, eda na sega tale ga ni vosavakacaca.—w22.04, t. 6-9.

Na cava eso na ka e kilai kina na va na manumanu kila (matanitu) ena Taniela wase 7, e laurai kece ena dua ga na manumanu kila ena Vakatakila 13:1, 2?

Na manumanu kila ena Vakatakila 13 e sega ni dusia e dua ga na matanitu, me vakataki Roma. E dusia na matanitu kaukaua kece vakapolitiki e liutaka na kawatamata.—w22.05, p. 9.

Na cava e dua na sala bibi eda nuitaka kina na lewadodonu i Jiova?

Ke dua e vakacudrui keda, vakararawataki keda se caka ca vei keda, eda na saga meda kua ni cudru se yaloca, eda na biuta ga vei Jiova. Ena vakaotia na leqa kece e vu mai na ivalavala ca.—w22.06, t. 10-11.

Na cava me nanuma tiko na tacida e masu ena gauna ni soqoni?

Na masu e sega ni gauna me vakasalataki kina na ivavakoso se me vakarogoi kina eso na itukutuku. Me kua ni ‘balavu na masu,’ vakabibi ni tekivu na soqoni. (Maciu 6:7)—w22.07, t. 24-25.

Sala cava era na “vakaturi mera lewai” kina o “ira na cakava na ka ca”? (Joni 5:29)

Era na sega ni cudruvi ena ka era cakava ena gauna sa oti. Na nodra lewai ena vakatau ena nodra rai kei na nodra ivalavala ni oti nodra vakaturi.—w22.09, t. 18.

Na cava e uqeta o J. F. Rutherford ena soqo ni tikina ena Seviteba 1922?

E kacivaka o koya ena soqo ni tikina e Cedar Point, Ohio, Merika: “Sa veiliutaki na Tui! Oni lesi moni tukuna yani qori. Koya gona moni kacivaka, kacivaka, kacivaka na Tui kei na Matanitu!”—w22.10, t. 3-5.

Na cava e tolu na sala e tukuni ena Aisea wase 30 e vukei keda kina na Kalou meda vosota?

E vakaraitaka na wase qo (1) ni dau vakarorogo vinaka me sauma noda masu, (2) e dusimaki keda, (3) e vakalougatataki keda nikua kei na veigauna se bera mai.—w22.11, t. 9.

Na cava eda rawa ni kaya kina ni ka e tukuni ena Same 37:10, 11, 29 a vakayacori ena gauna makawa, ena vakayacori tale ga ena gauna se bera mai?

Na ka e tukuna o Tevita e vakamacalataka vinaka na ituvaki totoka e Isireli, me vaka nona veiliutaki o Solomoni. E tukuna tiko o Jisu na parataisi se bera mai ni cavuta na tikina e 11. (Maciu 5:5; Luke 23:43)—w22.12, t. 8-10, 14.