Ena Dei Vakacava Noda Vakabauta na Yalayala i Jiova me Baleta na Vuravura Vou?

1-2. Na cava meda cakava nida waraka tiko na vuravura vou?

EDA mareqeta na vosa ni yalayala ni Kalou me veisautaka na ivakarau ca ni vuravura qo, me dua na vuravura vou era na tiko kina na yalododonu. (2 Pita 3:13) Eda sega ni kila na gauna ena yaco kina qori, ia e tiko na ivakadinadina ni na sega ni dede na noda wawa.—Maciu 24:32-34, 36; Caka. 1:7.

² Ke sa dede mada ga na noda tiko ena dina, e vinakati vei keda kece meda vakabauta dei na vosa ni yalayala qori. Na vuna? Ni rawa ni malumalumu tale vakayalo o koya mada ga e dei tu na nona vakabauta. E kaya na yapositolo o Paula, na lailai ni vakabauta ya “na ivalavala ca eda dau tacori rawarawa kina.” (Iper. 12:1) Me kua ni malumu na noda vakabauta, e bibi meda dau vakasamataka vakalevu na ivakadinadina ni sa voleka sara na vuravura vou.—Iper. 11:1.

3. Na cava eda na veivosakitaka ena ulutaga qo?

³ Eda na veivosakitaka ena ulutaga qo e tolu na sala meda vakabauta dei kina na yalayala i Jiova me baleta na vuravura vou: (1) nida vakasamataka vakatitobu na ivoli, (2) nida vakasamataka na kaukaua i Jiova, kei na (3) nida vakaitavi vakalevu ena veika vakayalo. Oti eda na veivosakitaka na sala e vaqaqacotaka kina noda vakabauta ena gauna qo na ka e tukuna o Jiova vei Apakuki. Ia meda veivosakitaka mada eso na ituvaki eda sotava tiko qo e vinakati kina me dei noda vakabauta na yalayala me baleta na vuravura vou.

ITUVAKI E VINAKATI KINA ME DEI NODA VAKABAUTA

4. Na vakatulewa cava e vinakati kina me dei na noda vakabauta?

⁴ E veisiga eda vakatulewataka e levu na ka e vinakati kina me dei noda vakabauta. Me kena ivakaraitaki eda vakatulewataka na noda ilala, ka ni veivakamarautaki, vuli, vakawati, ira na luveda, kei na cakacaka saumi. E vinaka meda taroga: ‘E laurai ena noqu vakatulewa niu kila ni na sega ni dede na vuravura qo, ena sosomitaka na vuravura vou ni Kalou? Seu vakatotomuri ira tiko na sega ni vakabauta ni rawa nida bula tawamudu?’ (Maciu 6:19, 20; Luke 12:16-21) Eda na vakatulewa vinaka ke dei na noda vakabauta ni sa voleka sara na vuravura vou.

5-6. Na cava me dei kina noda vakabauta nida sotava na ituvaki dredre? Vakatauvatana.

⁵ E vinakati tale ga me dei noda vakabauta nida vakatovolei. Eda rawa ni vakacacani, tauvimate bibi, se sotava eso na ituvaki e veivakayalolailaitaki. Nida sotava qori eda na rairai nanuma nida na vosota rawa. Ia ke sa dede noda sotava tiko, e vinakati me dei tiko ga noda vakabauta me rawa nida vosota qai marautaka tiko ga noda qaravi Jiova.—Roma 12:12; 1 Pita 1:6, 7.

⁶ Nida sotava tiko na ituvaki dredre, eda na rairai nanuma ni sa na sega ni yaco mai na vuravura vou e yalataka o Jiova. Kena ibalebale qori ni sa lailai noda vakabauta? Sega. Vakasamataka mada na ivakatautauvata qo. Ni tau tiko na uca me vica vata na macawa, eda na rawa ni nanuma ni sa na sega ni cila na siga. Oti ga qori sa cila tale mai na siga. E va tale ga qori nida yalolailai vakalevu, eda na rairai nanuma ni sa na sega ni yaco mai na vuravura vou. Ia ke dei na noda vakabauta, eda kila ni na vakayacori ga na yalayala ni Kalou. (Same 94:3, 14, 15; Iper. 6:17-19) Nida nuidei, eda na vakaliuca tiko ga noda sokalou vei Jiova.

7. Na rai cava meda qarauna?

⁷ Dikeva e dua tale na ka e vinakati kina me dei na noda vakabauta, ya na cakacaka vakavunau. Era nanuma e levu eda vunau vei ira ni sega ni dina na “itukutuku vinaka” me baleta na vuravura vou sa voleka. (Maciu 24:14; Isik. 33:32) Eda sega sara ga ni vinakata meda vakatitiqa va qori me vakataki ira. Me kua ni yaco qori, e bibi meda vaqaqacotaka tiko ga na noda vakabauta. Meda dikeva mada qo e tolu na sala eda rawa ni cakava kina qori.

VAKASAMATAKA VAKATITOBU NA IVOLI

8-9. Ena yaga vakacava ena noda vakabauta nida vakasamataka vakatitobu na ivoli?

⁸ Dua na sala ena dei kina na noda vakabauta, ya meda vakasamataka vakatitobu na ivoli. Na ivoli e ivakadei ni na yaco dina na vosa ni yalayala ni Kalou. Nida vakasamataka vinaka na vuna e vakarautaki kina na ivoli kei na ka e vauca, ena qai dei na noda vakabauta na yalayala ni Kalou me baleta na bula tawamudu ena dua na vuravura e vinaka sara. Na cava eda tukuna kina qori?

⁹ Na cava e okati ena ivoli? E tala mai nona ulumatua daulomani o Jiova, na nona itokani voleka mai lomalagi me mai sucu me tamata uasivi e vuravura. Ni bula e vuravura o Jisu, e vosota na veimataqali ka rarawa. Oti e vakararawataki qai vakamatei vakaloloma. E dua dina na ka talei e vakarautaka o Jiova! Ena sega ni vinakata na noda Kalou dauloloma me vakararawataki o Luvena qai mate me vinaka ga kina vakalekaleka na noda bula. (Joni 3:16; 1 Pita 1:18, 19) Ni talei na ka e vakarautaka o Jiova, ena raica sara ga me vakayacori na bula tawamudu ena vuravura vou.

VAKASAMATAKA NA KAUKAUA I JIOVA

10. Me vaka e tukuni ena Efeso 3:20, na cava e rawa ni cakava o Jiova?

¹⁰ Na ikarua ni sala e dei kina noda vakabauta ya nida dau vakasamataka na kaukaua i Jiova. E tu vua na kaukaua me vakayacora na ka kece e yalataka. Era nanuma e levu nikua ni na sega ni rawati na bula tawamudu ena vuravura vou. Ia o Jiova e dau yalataka na ka eda sega ni cakava rawa. E Kalou Kaukaua Duadua o koya. (Jope 42:2; Mari. 10:27) Sa rauta me dau yalataka na ka e veivakurabuitaki.—Wilika Efeso 3:20.

11. Tukuna e dua na ivakaraitaki ni nona yalayala veivakurabuitaki na Kalou. (Raica na kato “Vakayacori Eso na Yalayala Veivakurabuitaki.”)

¹¹ Vakasamataka mada eso na ka e yalataka o Jiova vei ira nona dauveiqaravi ena gauna sa oti, eda rairai nanuma ni dredre me vakayacori. E vakadeitaka vei Eparama kei Sera ni rau na vakaluveni ni rau sa itabaqase. (Vkte. 17:15-17) E tukuna tale ga vei Eparama ni na soli na vanua o Kenani vei ira na nona kawa. Na gauna balavu era bobula tu kina e Ijipita na kawa i Eparama o ira na Isireli, e kena irairai ni sa na sega ni yaco na vosa ni yalayala qori. Ia e qai yaco. Dua tale na gauna e muri, e tukuna o Jiova vua na kenamarama o Ilisapeci ni na dua na luvena. E tukuna tale ga vua na goneyalewa o Meri, ni na vakasucuma e dua na gonetagane. A se yalataka makawa qori o Jiova ena vica na udolu na yabaki sa oti ena were o Iteni, e vakayacori tale kina e dua na vosa ni yalayala!—Vkte. 3:15.

12. Na cava e vakadeitaka na Josua 23:14 kei na Aisea 55:10, 11 me baleta na kaukaua i Jiova?

¹² Nida vakasamataka na veika e dau yalataka o Jiova oti qai vakayacora, eda kila kina na nona kaukaua levu. Qori ena dei sara ga kina noda vakabauta nona yalayala me baleta na vuravura vou. (Wilika Josua 23:14; Aisea 55:10, 11.) E vakarautaki keda tale ga meda vukea e levu tale mera vakabauta ni sega ni tadra wale ga, se ka ga ni vakanananu na yalayala me baleta na vuravura vou. O Jiova sara ga e yalataka me baleta na lomalagi vou kei na vuravura vou: “E donu na vosa qo, e dina tale ga.”—Vkta. 21:1, 5.

VAKAITAVI ENA VEIKA VAKAYALO

13. Ena dei vakacava noda vakabauta nida tiko ena soqoni ni ivavakoso? Vakamacalataka.

¹³ Na ikatolu ni sala ena dei kina noda vakabauta oya nida vakaitavi ena veika vakayalo. Me kena ivakaraitaki, dikeva na yaga ni noda tiko ena soqoni ni ivavakoso. O Ana sa vicasagavulu na yabaki nona vakaitavi ena levu na taba ni veiqaravi vakatabakidua, e kaya: “E vakadeitaka sara ga na noqu vakabauta na noqu tiko ena soqoni. Ke sega mada ga ni kenadau sara ena veivakavulici o koya e vunau tiko, se me tukuna e dua na ka vou, au na rogoca e dua na tikina au na kila vinaka kina na ka dina vakaivolatabu, ena dei tale ga na noqu vakabauta.”b Macala ga nida dau taleitaka na nodra ivakamacala eso ena ivavakoso e vakadeitaka noda vakabauta.—Roma 1:11, 12; 10:17.

14. Ena dei vakacava noda vakabauta nida cakacaka vakavunau?

¹⁴ Ena dei tale ga na noda vakabauta nida vakaitavi ena cakacaka vakavunau. (Iper. 10:23) E kaya o Vere, sa sivia ni 70 na yabaki nona qaravi Jiova tu: “E dau dei na noqu vakabauta niu cakacaka vakavunau. Na levu ga ni noqu tukuna na vosa ni yalayala i Jiova, sa qai dei ga na noqu vakabauta.”

15. E dei vakacava noda vakabauta nida dau vuli vakataki keda? (Raica tale ga na iyaloyalo.)

¹⁵ Dua tale na ka vakayalo ena dei kina na noda vakabauta, ya noda vuli vakataki keda. E raica o Susana ni yaga nona tuvanaka na gauna me vuli kina. E kaya: “Ena Sigatabu, au na vulica na ulutaga ni Vale ni Vakatawa Vulici ena veivosakitaki ena macawa e tarava. Ena Moniti kei na Tusiti, au na vakarautaka na ka ena vulici ena soqoni ena lomanimacawa. Ena vo ni siga, au dau vulica e dua na ka au vakekeli tiko kina.” Ni muria tiko ga o Susana na nona ituvatuva, e dei kina na nona vakabauta. O Irene, sa vicasagavulu na yabaki nona veiqaravi tiko ena itikotiko liu, e vaqaqacotaka na nona vakabauta nona vulica na parofisai vakaivolatabu. E kaya: “Au qoroqoro ga ni vakayacori na veika matailalai sara mada ga e yalataka o Jiova.”c

“ENA YACO DINA”

16. Na cava e yaga kina vei keda nikua na ka e tukuna o Jiova vei Apakuki? (Iperiu 10:36, 37)

¹⁶ Eso na dauveiqaravi i Jiova sa dede sara nodra waraka tiko me rusa na veika vakavuravura qo. Eso era nanuma ni rui berabera na vakayacori ni yalayala ni Kalou. Ia e kauaitaki ira na nona dauveiqaravi o Jiova. E tukuna kina vua na nona parofita o Apakuki: “E waraka na raivotu na gauna lokuci, e vakusakusa tiko ina kena icavacava, ena sega ni lasu. Ke berabera mada ga, mo waraka tiko ga! Ena yaco dina. Ena sega ni bera!” (Apak. 2:3) Vakacava e yaga duadua ga vei Apakuki na veivakadeitaki qori ni Kalou? Se yaga tale ga vei keda nikua? E uqeti vakalou na yapositolo o Paula me tukuna tale ga qori vei ira na lotu vaKarisito era waraka tiko na vuravura vou. (Wilika Iperiu 10:36, 37.) Io, meda nuidei ke rairai berabera tiko na yalayala me baleta na noda vakabulai, “ena yaco dina. Ena sega ni bera!”

17. E muria vakacava e dua na tacida yalewa na ivakasala i Jiova vei Apakuki?

¹⁷ Levu sara na dauveiqaravi i Jiova era muria tiko na ivakasala qori mera ‘wawa tiko ga,’ ke vicasagavulu mada ga na yabaki. Kena ivakaraitaki o Luisa, se tekivu qaravi Jiova sara ena 1939. E kaya: “Ena gauna qori, au nanuma ni sa na yaco mai na Amaketoni ni se bera ni oti noqu vuli ena sekeneri. Ia qai sega. Ni toso na gauna, au dau wilika na italanoa vakaivolatabu me baleti ira na waraki Jiova tiko me vakayacora nona yalayala, e uqeti au tale ga meu wawa. Au wilika na italanoa me baleti Noa, Eparama, Josefa, kei na so tale sa dede na nodra waraka tiko na icovi e yalataka tu o Jiova. Noqu vakabauta tiko ni na vakayacori dina na vosa ni yalayala, e uqeti au kei na so tale me keimami vakadeitaka ni sa voleka sara na vuravura vou.” Era duavata kina e levu tale era qaravi Jiova tu mai vakadede!

18. Nida dikeva na veikabuli, ena dei vakacava noda vakabauta na vuravura vou sa voleka?

¹⁸ E se bera mai na vuravura vou. Ia vakasamataka eso na ka sa tu rawa nikua me vaka na kalokalo, vunikau, manumanu, o keda tale ga. E sega ni dua e vakatitiqataka na kena tu na ka kece qori, ni dua na gauna era sega ni bula tu. Ia era tu nikua baleta ni buli ira sara ga o Jiova. (Vkte. 1:1, 26, 27) E nona inaki tale ga na noda Kalou me vakarautaka na vuravura vou. Ena vakayacora dina qori. Ena vuravura vou, eda na bula tawamudu, eda na bulabula vinaka tale ga. Ena gauna lokuci ni Kalou, ena tiko dina na vuravura vou me vaka ga na lomalagi kei na vuravura e tu nikua.—Aisea 65:17; Vkta. 21:3, 4.

19. Ena dei vakacava nomu vakabauta?

¹⁹ Ena gauna qo, mo gumatua me dei nomu vakabauta. Mo vakavinavinakataka na ivoli. Vakasamataka na kaukaua i Jiova. Vakaitavi vakalevu ena veika vakayalo. Ni o cakava qori, o na dua vei “ira na taukena na vosa ni yalayala ni Kalou ena vuku ni [nomu] vakabauta kei na vosovoso.”—Iper. 6:11, 12; Roma 5:5.