E rawa ni nuitaki na ka ga eda nanuma?
E Donu se Cala? Na Cava Era Nuitaka e Levu Nira Vakatulewa?
O keda kece eda kila tu ni so na ka e donu, eso na ka e cala. Kena ivakaraitaki, e levu era cata na laba, kucu kei na nodra vaqaseni na gone. E taleitaki vakalevu na itovo me vaka na caka dodonu, yalololoma kei na veikauaitaki. Ia eso tale na ituvaki me vaka na veiyacovi, daudina, se itavi vakaitubutubu, e levu era vakabauta ni sega ni dua na digidigi e donu se cala. Era nanuma ni donu kece na nodra digidigi. E levu era nuitaka ga na ka era nanuma kei na ka era nanuma eso tale nira vakatulewa. Vakacava e ka vakayalomatua qori?
KA EDA NANUMA
E levu na gauna eda yavutaka na noda vakatulewa ena ka eda nanuma ni donu se cala, qori e vakatokai na noda lewaeloma. (Roma 2:14, 15) O ira mada ga na gone, e rawa nira kila na duidui ni itovo vinaka kei na itovo ca, era rarawataka mada ga eso na cala era cakava. Toso na gauna, na noda lewaeloma ena vakamuai ena ka eda vulica vei ira noda vuvale, itokani, qasenivuli, ira eda tiko veitikivi, lotu vata se tautauvata noda ivakarau vakavanua. Nida vakatulewa, na noda lewaeloma ena vakaraitaka vei keda ni donu se cala na noda digidigi.
Na noda rai me baleta na ka e donu kei na ka e cala ena uqeti keda meda veikauaitaki, dau vakavinavinaka, caka dodonu qai veinanumi. Ena rawa ni vukei keda tale ga meda kua ni cakava na ka ena vakararawataki ira eda lomana, se ka ena vakavuna noda madua.
E rawa ni nuitaki na ka ga eda nanuma? E kaya o Garrick me baleta nona bula ni se cauravou, “Au dau cakava na ka ga au nanuma ni donu.” Ia e raica ni kauta ga mai e levu na leqa. E rarawataka na nona bula ni sa lai coko tu ena “itovo vakasisila, wainimategaga, gunu vakasivia kei na itovo kaukaua.”
KA ERA NANUMA ESO TALE
Eso na gauna e rawa ni vakamua na noda vakatulewa na nodra rai eso tale. Ena rawa ni yaga vei keda na ka era kila, kei na ka era sa sotava oti. Ke da cakava na ka e donu vei ira noda vuvale, itokani se ira eda tiko veitikivi, era na dokai keda.
E rawa ni nuitaki na ka era nanuma eso tale? Ni se goneyalewa o Priscila, e dau muria na ka era dau cakava na nona itokani qai veiyacovi ni bera ni vakamau. Ia e vakila ga na rarawa ni cakava na ka era nanuma eso ni donu. E kaya: “Au sega ni marau niu vakamurimuria na ka era cakava eso tale. Au lai cakava kina eso na ka lialia qai ririkotaki kina noqu bula.”
E TIKO NA IDUSIDUSI NUITAKI?
Nida vakatulewataka na ka e donu kei na ka e cala, e dau yaga nida kauaitaka na noda rai kei na nodra rai eso tale. Ia e sega ni dau tini vinaka ena so na gauna. E rawa ni bale ga vei keda na noda rarawa kei na nodra rarawa eso tale, nida sega ni vakasamataka vinaka na itinitini ni noda vakatulewa. (Vosa Vakaibalebale 14:12) Eso mada ga na ka e donu vei keda kei ira eso tale, e rawa ni vakavu leqa qai rawa tale ga ni veisau. Eso tale ga na itovo e dau nanumi tu ni cala sa vakadonui tu nikua, eso na itovo e nanumi ni donu sa okati nikua me cala.
E rawa ni nuitaki na ka era nanuma eso tale?
Vakacava e tiko e dua na idusidusi nuitaki meda vakatulewataka kina na ka e donu kei na ka e cala? E tiko e dua na ivakatagedegede ena yaga tu ga, da qai sega ni veivutunitaka noda muria?
Eda kalougata ni tiko e dua na idusidusi e tudei qai nuitaki, ena yaga vei keda kece se vanua cava eda tu kina. Ena vakamacalataki ena ulutaga e tarava na idusidusi nuitaki qori meda vakatulewataka kina na ka e donu kei na ka e cala.