Rua Tale na Lewe ni iLawalawa Dauvakatulewa

ENA ika5 ni Okotova 2024, e kacivaki e dua na itukutuku marautaki ena bose vakayabaki: rau sa lesi o Brother Jody Jedele kei Jacob Rumph me rau lewe ni iLawalawa Dauvakatulewa ni iVakadinadina i Jiova. Sa dede nodrau qaravi Jiova tu mai ena yalodina.

E sucu o Brother Jedele e Missouri, e Merika, e susu tale ga ena dina. Ratou tiko na nona vuvale ena vanua era sega ni levu kina na iVakadinadina i Jiova. E dau sotavi ira gona na mataveitacini mai na duidui vanua era dau lai veivuke yani ena cakacaka vakavunau. E uqeti koya vakalevu na nodra veilomani kei na duavata. E papitaiso ni se itabagone, ena ika15 ni Okotova, 1983. E taleitaka na cakacaka vakavunau, ni oti ga nona vuli ena sekeneri, e tekivu painia tudei sara ena Seviteba 1989.

Ni se itabagone o Brother Jedele, rau dau kauti koya kei ganena na nona itubutubu me ratou lai sarasara i Peceli. Na gade qori e uqeti rau vakaveitacini me nodrau isausau na veiqaravi e Peceli, rau mani rawata na isausau qori. E lako i Peceli e Wallkill o Brother Jedele ena Seviteba 1990. A veiqaravi e liu ena Tabana ni Sasamaki, oti sa qai lai veiqaravi ena Tabana ni Veiqaravi Vakavuniwai (Medical Services).

Ena gauna qori, sa tubu tiko na ivavakoso voleka era vosa vakaSipeni, e vinakati kina nodra veivuke e levu na tacida tagane. E mani lewena o Brother Jedele e dua na ivavakoso qori, e vulica sara na vosa vakaSipeni. Sega ni dede rau sota kei Damaris, e painia tiko ena tabacakacaka qori. Toso na gauna rau vakamau sara, rau mani veiqaravi vata e Peceli.

Ena 2005 rau biubiu e Peceli me rau lai qaravi rau na nodrau itubutubu, ratou qaravi Jiova ena yalodina. Rau painia tudei tiko ga ena gauna qori. E veivuke o Brother Jedele ena veivakavulici ena Koronivuli ni Cakacaka Vakapainia, e veiqaravi tale ga ena Komiti Veitaratara kei na Valenibula, kei na Komiti ni Taravale ena Duidui Vanua.

Ena 2013, rau sureti tale i Peceli o Brother kei Sister Jedele ena tarataravaki e Warwick. Tekivu mai na gauna qori, rau veiqaravi tale ga e Patterson kei Wallkill. E veiqaravi o Brother Jedele ena Tarataravaki e Qarava na Valenivolavola ni Tabana kei na Tabana ni iTukutuku ni Valenibula. Ena Maji 2023, e lesi sara me dauveivuke ena Komiti ni Cakacaka. Ni raica lesu na nona ilesilesi, e kaya: “Ni dua nomu ilesilesi vou, de dua o na rere. Ia qori sara ga na gauna mo nuitaki Jiova kina, ni o koya ga ena vakavuna me yaco.”

E sucu o Brother Rumph e Kalifonia, e Merika. Ni se gone, e malumu tu vakayalo o tinana, ia e dau saga me vakavulici koya ena iVolatabu. E veiyabaki e dau gade vei buna, e yalodina vei Jiova. E dau uqeti koya me taleitaka na ka dina, ni yabaki 13 e kerea me vuli iVolatabu. E papitaiso ena ika27 ni Seviteba 1992, ni se itabagone. E marautaki ni sa kaukaua tale vakayalo o tinana, era toso tale ga mai nona vuvale, era papitaiso sara.

Ni se itabagone o Brother Rumph, e dau raica nodra mamarau na painia. Ni oti gona nona vuli ena sekeneri, e tekivu painia sara ena Seviteba 1995. Ena 2000, e toki i Ecuador me lai veiqaravi ena vanua e vinakati kina vakalevu na veivuke. Rau sota sara kei Inga, e dua na tacida yalewa mai Kenada e painia tiko e kea, toso na gauna rau vakamau sara. Ni rau vakamau oti, rau veiqaravi tiko ga ena dua na tauni e Ecuador, e vica ga na kena dautukutuku. Nikua sa dua na ivavakoso levu.

Toso na gauna, rau sa painia lavotaki o Brother kei Sister Rumph, oti rau lesi sara ena veiqaravi vakaivakatawa ni tabacakacaka. Ena 2011, rau sureti ena ika132 ni kalasi e Kiliati. Ni oti na tuvaitutu, rau lai veiqaravi ena so na vanua e veiyasa i vuravura, rau marautaka tale ga na duidui taba ni veiqaravi, me vaka e Peceli, daukaulotu, kei na ivakatawa ni tabacakacaka. E lesi tale ga o Brother Rumph me veivakavulici ena Koronivuli ni iTalatala ni Matanitu.

Ena vuku ni matedewa na COVID-19, rau lesu i Merika o Brother kei Sister Rumph. Rau sureti ena Peceli e Wallkill, e vakavulici o Brother Rumph ena Tabana ni Cakacaka (Service Department). Toso na gauna, rau lesi tale ina valenivolavola ni tabana e Ecuador, e lai veiqaravi o Brother Rumph ena Komiti ni Tabana. Ena 2023, rau lesi i Warwick. Ena Janueri 2024, e lesi o Brother Rumph me dauveivuke ena Komiti ni Cakacaka. Ni vakasamataka lesu na veivanua e veiqaravi kina, e kaya: “E sega ni bibi na vanua eda lesi kina, e bibi ga o ira na tacida eda lai veiqaravi vata.”

Eda taleitaka na nodrau gumatua na tacida qo, meda “vakamareqeti ira tale ga na tagane era vakataki [rau].”—Fpai. 2:29.