RA TAROGA NA ITABAGONE

Cava Meu Cakava Niu Papitaiso Oti?—Wase 1: Dei ena Nomu iTuvatuva Vakayalo

Eda dau taqomaka qai maroroya vinaka na iyau mareqeti, me vaka na vale se motoka. E va tale ga qori na ka mo cakava mo taqomaka kina nomu veitokani kei na Kalou. O na vaqaqacotaka vakacava nomu veitokani kei Jiova ni oti nomu papitaiso?

Ena ulutaga qo

Vulica tiko ga na Vosa ni Kalou

Tikinivolatabu: “Moni . . . vua ena cakacaka vinaka kece kei na nomuni vakalevutaka tiko ga na kilaka dodonu me baleta na Kalou.”—Kolosa 1:10.

Kena ibalebale: Oti nomu papitaiso e bibi mo wilika tiko ga na iVolatabu, qai vakasamataka vakatitobu na veika o vulica.—Same 25:4; 119:97.

Ka mo namaka: Eso na gauna o na vucesa mo vuli vakataki iko. De dua o nanuma ni o na sega ni rawata.

Ka o rawa ni cakava: Vakekeli ena so na ulutaga vakaivolatabu o taleitaka. Mo vakarautaka e dua na ituvatuva ni vuli vakataki iko, me rawarawa tale ga. Me inaki ni nomu vuli mo lomani Jiova vakalevu, kei na nona Vosa. Ena marautaki qai yaga na vuli va qori.—Same 16:11.

Vakatutu: Me yaga vei iko na ka o vulica, vuli ena dua na vanua vakanomodi.

Via kila eso tale na ka

Wilika:

“Ena Yaga Vakacava Vei au na iVolatabu?—Wase 2: Marautaka Nomu Wili iVolatabu”

“Ena Dei Vakacava ena Noqu Vakasama na ka au Vulica?”
Sarava:

Ka Era Kaya Nomu iCaba—Wili iVolatabu
Download:

“iTuvatuva ni Wili iVolatabu”

Masuti Jiova tiko ga

Tikinivolatabu: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka.”—Filipai 4:6.

Kena ibalebale: E vinakati na vakarorogo kei na veivosaki nida veitokani kei na Kalou. O vakarorogo vua ni o wilika nona Vosa, o vosa vua ni o masu. Nanuma tiko e rawa ni o masulaka vua na Kalou na veika o gadreva, qai vakavinavinakataka na nona vakalougatataki iko.

Ka mo namaka: Eso na gauna ena rawa ni dua tu ga na ivakarau ni nomu masu. O na rairai sega ni kauaitaka kina ni rogoci iko tiko o Jiova, se e via rogoca na nomu masu.—Same 10:1.

Ka o rawa ni cakava: Ena loma ni dua na siga, vakasamataka na veika o rawa ni masulaka. Ia ke o tu ena dua na vanua o sega ni rawa ni cakava kina qori, saga mo talaucaka vei Jiova ena masu ni bera ni cava e dua na siga. Masulaka na veika o nuiqawaqawataka, kei na ka era gadreva eso tale.—Filipai 2:4.

Vakatutu: Ke sa dua tu ga na ivakarau ni nomu masu, mo masulaka qori vei Jiova. E via rogoca na ka kece o leqataka, okati kina na ivakarau ni nomu masu.—1 Joni 5:14.

Via kila eso tale na ka

Wilika:

“Na Cava e Bibi Kina na Masu?”
Download:

“Sala Mo Vakavinakataka Kina Nomu iVakarau ni Masu”

Wasea tiko ga nomu vakabauta

Tikinivolatabu: “Qarauni iko vinaka tiko ga kei na nomu veivakavulici. . . . Ni o cakava qo o na vakabulai iko kei ira na rogoci iko.”—1 Timoci 4:16.

Kena ibalebale: Ena vaqaqacotaka nomu vakabauta ni o wasea vei ira eso tale na ka o vakabauta. Ni o cakava qori o na vakabulai iko, kei ira na rogoci iko.

Ka mo namaka: Eso na gauna, o na sega ni via wasea na nomu vakabauta. De dua o na rere ni cakava qori vakabibi e koronivuli.

Ka o rawa ni cakava: Me kua ni lewa na ka o cakava na rai cala me vaka na rere. E vola na yapositolo o Paula: “Keu [kacivaka na itukutuku vinaka] ena voraki, au se vakayacora tiko ga na itavi e nuitaki vei au.”—1 Korinica 9:16, 17.

Vakatutu: Ke rau vakadonuya nomu itubutubu, qara e dua na tacida me vukei iko, e ivakaraitaki vinaka tale ga ena cakacaka vakaitalatala.—Vosa Vakaibalebale 27:17.

Via kila eso tale na ka

Wilika:

Na ulutaga vakavalagi, “Why Am I Afraid to Share My Faith?”

Dau tiko ena soqoni vaKarisito

Tikinivolatabu: “Meda dau veinanumi nida veivakauqeti ena loloma kei na caka vinaka, meda kua ni biuta na noda soqoni vata.”—Iperiu 10:24, 25.

Kena ibalebale: Eda tiko ena soqoni nida via sokaloutaki Jiova. Ia e rua tale tiko na kena yaga. Kena imatai, era na vakayaloqaqataki iko na mataveitacini. Kena ikarua, o vakayaloqaqataki ira ni o tiko ena soqoni qai vakaitavi.—Roma 1:11, 12.

Ka mo namaka: Eso na gauna ni o soqoni tiko, o na rawa ni vakasamataka eso tale na ka. Ena sega ni kasa kina vei iko na veika yaga o vulica ena soqoni. Se, o na rawa sara ga ni temaki mo kua ni gole se vakalutu soqoni, ni o sa kauaitaka eso tale na ka me vaka nomu ka ni vuli.

Ka o rawa ni cakava: Dina ni o na sega ni via vakaweleweletaka nomu ka ni vuli. Ia mo kua ga ni calata na soqoni, qai saga mo vulica mai kina e levu na ka. Mo dau saumitaro. Ni oti na soqoni, tovolea mo vakavinavinakataka e dua ena nona ivakamacala se itavi.

Vakatutu: Vakavakarau ni bera ni o gole ena soqoni. Me download na JW Library®, tabaka na “Meetings” mo kila kina na ka ena vulici ena soqoni.

Via kila eso tale na ka

Wilika:

Na ulutaga vakavalagi, “Why Go to Christian Meetings?”