Mate e 6 na Milioni ena COVID—Cava e Kaya na iVolatabu?

Ena ika23 ni Me 2022, e tukuna na isoqosoqo na World Health Organization (WHO), ni 6.27 na milioni na lewenivanua era sa mate ena COVID-19. Ia e ripotetaki ena nius ena ika5 ni Me 2022, ni ratou raica na WHO ni sivia na iwiliwili qori era mate ena matedewa qo. E kaya me tekivu mai na 2020 ina 2021, “e rauta ni 14.9 na milioni era mate . . . ni tauvi ira sara ga na COVID-19, se dewa mai vei ira ena so tale na sala.” Vakacava e bau tukuna na iVolatabu ni na yaco e dua na ituvaki rarawataki va qori?

Parofisaitaka na iVolatabu na matedewa rerevaki

•  E parofisaitaka o Jisu ni na yaco na matedewa, ena veitauvi tale ga na “mate rerevaki” ena “iotioti ni veisiga.”—Luke 21:11, Contemporary English Version; 2 Timoci 3:1.

Sa yaco sara tiko ga nikua na veika e tukuna qori o Jisu. Mo kila e levu tale na ka, wilika na ulutaga “Cava na iVakatakilakila ni ‘iOtioti ni Veisiga’ se ‘Gauna ni iCavacava’?”

E veivakacegui na ka e kaya na iVolatabu

•  “Na Kalou e dau vakacegui keda . . . ena veika dredre kece eda sotava.”—2 Korinica 1:3, 4.

Levu e vakacegui ira na ka e tukuna iVolatabu ni takali na wekadra lomani. Mo kila e levu tale na ka, raica na ulutaga “iVakasala Yaga—Ka o Rawa ni Cakava” kei na “Vu ni Veivakacegui Yaga Duadua Vei Ira na Lolosi.”

Kaya na iVolatabu na sala ena vakaoti kina na matedewa

•  “Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi.”—Maciu 6:10.

Sa voleka na gauna me veiliutaki kina “na Matanitu ni Kalou,” ena vakaotia tale ga na matedewa. “Ena sega ni kaya e dua na lewenivanua: ‘Au tauvimate.’” (Marika 1:14, 15; Aisea 33:24) Mo kila na veika me baleta na matanitu vakalomalagi qori kei na ka ena cakava, sarava na vidio Na Cava na Matanitu ni Kalou?

Keimami sureti iko mo vulica eso tale na ka e tukuna na iVolatabu, me rawa ni yaga vei iko kei ratou nomu vuvale na kena ivakasala, kei na inuinui totoka e yalataka.