O Cei ena Vakabulai Ira na Lewenivanua? —Cava e Kaya na iVolatabu?

E volatukutukutaka na Matabose kei Vuravura:

• Ena ika7 ni Okotova ina ika23 ni Okotova 2023, na nodrau veivaluvaluti o Gaza kei Isireli era mate kina e le 6,400 qai le 15,200 era mavoa, levu vei ira qori era lewenivanua ga. Qai kuria ya, e vica na drau na udolu era dro ena so tale na vanua.

• Ena ika24 ni Seviteba 2023, era a vakamatei kina e le 9,701 ena vuku ni nodrau veivaluvaluti o Rusia kei Ukraine, qai mavoa kina e 17,748 na lewenivanua e Ukraine.

Na inuinui cava e vakarautaka na iVolatabu vei ira na vakalolomataki ena ivalu?

E Tiko na iNuinui

E parofisaitaka na iVolatabu ni Kalou ena ‘vakaotia na ivalu e vuravura taucoko.’ (Same 46:9) Ena vakayagataka na veiliutaki vakalomalagi, se na matanitu ni Kalou me sosomitaka na matanitu vakatamata. (Taniela 2:44) Na Matanitu ni Kalou ena kauta mai na vakacegu ina kawatamata.

Dikeva na cava ena cakava o Jisu Karisito, na tui ni Matanitu ni Kalou:

• “Ni na vakabula o koya na dravudravua e tagi ni kere veivuke, o koya tale ga na vakaloloma kei koya e sega ni vukei. Ena lomani ira na vakaloloma kei na dravudravua, ena vakabula tale ga na dravudravua. Ena vakabulai ira mai na veivakasaurarataki kei na ivalavala kaukaua.”—Same 72:12-14.

Ena ruku ni veiliutaki ni nona Matanitu, na Kalou ena kauta laivi kece na rarawa kei na veivakalolomataki e kauta mai na veivaluvaluti kei na itovo voravora.

• “Ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”—Vakatakila 21:4.

Sa voleka sara qo me veisautaka na ituvaki kei vuravura na Matanitu ni Kalou. E parofisaitaka na iVolatabu na “ivalu kei na itukutuku ni ivalu” esa vakayacori tiko ena gauna qo. (Maciu 24:6) Na veika kece qo kei na so tale na ituvaki e vakadinadinataka nida sa bula tiko “na iotioti ni veisiga” ni veiliutaki vakatamata.—2 Timoci 3:1.