Sala Cava ena Vakilai Kina e Vuravura na Vakacegu?

Kena isau vakaivolatabu

Na Matanitu ni Kalou ena kauta mai na vakacegu e vuravura, sega ni sasaga vakatamata. Qori na matanitu vakalomalagi, e liutaka o Jisu Karisito. Raica mada na ka e tukuna na iVolatabu me baleta na inuinui totoka qori.

1. Ena vakaotia na Kalou “na ivalu me yacova na iyalayala kei vuravura,” ena vakayacora nona yalayala mera vakila na “vakacegu e vuravura o ira e vakadonuya!”—Same 46:9; Luke 2:14, Good News Translation.

2. Na Matanitu ni Kalou e tiko mai lomalagi, qai veiliutaki e vuravura taucoko. (Taniela 7:14) Ena kauta laivi na yalo ni boletaki vanua ni uqeta na veivakaduiduitaki qai vakavuna e levu na leqa.

3. E vakatokai o Jisu na “Turaga ni Sautu” ni na liutaka na Matanitu ni Kalou. Ena vakadeitaka tale ga ni na ‘vakilai tu ga na sautu.’—Aisea 9:6, 7.

4. Era na sega ni vakabulai o ira era dau veivala, ni “[Kalou] e cati ira kece era taleitaka na itovo kaukaua.”—Same 11:5; Vosa Vakaibalebale 2:22.

5. Na Kalou e vakavulici ira na tamata mera bula veiyaloni. E vakadeitaka qori ni tukuna ena iVolatabu: “Era na tukitukia na nodra iseleiwau me batinisiviyara kei na nodra moto me isele ni sasamaki. Ena sega ni lave iseleiwau e dua na matanitu ina dua na matanitu era na sega ni vulica tale na ivalu.”—Aisea 2:3, 4.

Keimami sa vulica tiko na iVakadinadina i Jiova e veiyasa i vuravura na sala me keimami veiyaloni kina. (Maciu 5:9) Dina ni duidui na vanua keimami cavutu mai kina, keimami vakaitikotiko tale ga ena sivia e 230 na vanua. Ia e sega vakadua ni keimami tauri iyaragi me keimami vakamatei ira kina na wekai keimami.