Cava Era Cakava na iVakadinadina i Jiova Vei Ira na Lewena tu e Liu Nodra Lotu?

Keimami saga me keimami veikauaitaki, veidokai qai lomani ira na tamata kece. Ia ke dua na iVakadinadina i Jiova e malumu se sega ni tomana nona sokalou, keimami na saga me keimami vukei koyaa qai vakadeitaka vua neimami loloma me rawa ni gumatuataka tale nona ka vakayalo.—Luke 15:4-7.

Eso na gauna, na ka e cakava e dua e rawa ni vakavuna me biu tani mai na ivavakoso. (1 Korinica 5:13) Ia neimami lomani koya, keimami na saga me keimami vukei koya ni bera ni biu tani. Ke mani biu tani mada ga, keimami na vakaraitaka tiko ga vua na loloma kei na veidokai me vaka e uqeti keimami kina na iVolatabu.—Marika 12:31; 1 Pita 2:17.

Cava e vakavuna me biu tani e dua mai na ivavakoso?

E vakamatatataka na iVolatabu ke dua na lotu vaKarisito e cakava na valavala ca bibi qai sega ni via veisau, e dodonu me biu tani mai na ivavakoso.b (1 Korinica 5:11-13) E vakamacalataka tale ga na valavala ca bibi e rawa ni vakavuna me biu tani kina e dua. Kena ivakaraitaki, na veibutakoci, mateni, laba, veivakalolomataki e vale kei na butako.—1 Korinica 6:9, 10; Kalatia 5:19-21; 1 Timoci 1:9, 10.

Ia na sega totolo ga nona biu tani mai na ivavakoso e dua e cakava na valavala ca bibi. Ratou na saga rawa i liu na qase ni ivavakosoc me veisautaka na nona ivakarau. (Roma 2:4) Ratou na vukei koya vakayalololoma, vakayalomalua tale ga. (Kalatia 6:1) Qori e dua na sala ena liaca kina nona cala qai rawa ni uqeti koya me veisau. (2 Timoci 2:24-26) Ia ke mani vukei vakavica qai beca tiko ga na ivakatagedegede savasava ena iVolatabu qai sega ni via veisau, e dodonu me biu tani mai na ivavakoso. Era na kacivaka na qase ena ivavakoso ni sa sega tale ni iVakadinadina i Jiova.

Rau wasea tiko vakayalololoma na qase ni ivavakoso na tikinivolatabu vua e dua na tagane. Dua vei rau e vakacegui koya ni vosa tiko vua. — Era na saga na qase ni ivavakoso mera vukei koya e valavala ca bibi ena yalololoma kei na yalomalua

Na cava na yaga ni nona biu tani e dua e cakava tiko ga na valavala ca? Dua, ena tutaka kina na ivavakoso na ivakatagedegede ni Kalou me baleta na itovo savasava, era na taqomaki tale ga na lewe ni ivavakoso ena nona veivakamuai. (1 Korinica 5:6; 15:33; 1 Pita 1:16) Kena ikuri, ena uqeti koya e cala me biuta nona itovo ca qai saga me veisau.—Iperiu 12:11.

Cava era cakava na iVakadinadina i Jiova vei ira na biu tani mai na ivavakoso?

E kaya na iVolatabu mera “kua ni vakailala” na lotu vaKarisito kei koya e biu tani mai na ivavakoso, mera “kua mada ga ni kana vata kei koya.” (1 Korinica 5:11) Ya na vuna keimami na sega ni veimaliwai kina kei koya e biu tani. Ia sega ni kena ibalebale qori me keimami sega sara ga ni kauaitaki koya. Keimami na dokai koya tiko. E rawa ni gole yani ena soqoni, era na kidavaki koya tale ga na iVakadinadina i Jiova.d Rawa ni kerei ratou tale ga na qase me ratou vukei koya me lesu ena ivavakoso.

Rau kidavaka tiko ena Vale ni Soqoni na veiwatini iVakadinadina, e dua na yalewa e biu tani mai ena ivavakoso. — E rawa nira gole yani ena soqoni o ira na biu tani mai na ivavakoso

Vakacava ke dua sa biu tani mai na ivavakoso, ia e iVakadinadina i Jiova tiko ga o watina kei luvena? Dina ni ratou na sega ni qaravi Jiova vata vakavuvale, ia ena tiko ga na kedratou isema vakavuvale. Me vaka ni ratou tiko vata ga ena dua na vale, ena tomani tiko ga nona veimaliwai kei watina, ratou tale ga na luvena. Ratou na veilomani tiko ga.

E rawa tale ga ni kerei ratou na qase ni ivavakoso me ratou sikovi koya. Ratou na vukei koya vakayalololoma mai na iVolatabu, qai uqeti koya me veivutuni qai lesu vei Jiova. (Sakaraia 1:3) Ke sa muduka nona ivakarau ca qai vinakata dina me muria na ivakatagedegede savasava ena iVolatabu, sa rawa vakalesui tale ena ivavakoso. Era na ‘vosoti koya qai vakacegui koya’ na ivavakoso, me vaka ga era cakava na lotu vaKarisito e Korinica ni dua e veisau, qai muduka nona itovo ca.—2 Korinica 2:6-8.

Cava era vakila o ira na vakalesui tale mai ena ivavakoso?

Dikeva mada na ka era tukuna eso na iVakadinadina i Jiova era biu tani ena ivavakoso, oti ra qai vakalesui tale mai.

“Gauna au vakatulewataka kina meu lesu ena ivavakoso, au nanuma ni ratou na via kila na qase na ka kece au cakava ena vica vata na yabaki au biu tu kina. Ia ratou kaya ga, ‘Keitou vinakata mo kauaitaka ga na ka o rawa ni cakava qo.’ Au lomavakacegu sara ga.”—Maria, Merika.

“Era marau na lewe ni ivavakoso niu lesu tale vei Jiova. Au vakamareqeti. Era vakadeitaka vei au na mataveitacini ni sa vosoti au o Jiova, qai vukei au meu toso i liu. Era vukei au na qase meu vaqaqacotaka tale noqu veiwekani kei Jiova. Era vakacegui au qai vukei au meu raica ni o Jiova e vakamareqeti au, e lomani au tale ga.”—Malcom, Sierra Leone.

“Au taleitaka ni o Jiova e lomani ira nona tamata qai vinakata me savasava tiko ga nona isoqosoqo. Eso na lewenivanua era rairai nanuma ni sa rui kaukaua na vakatulewa e caka vei ira na valavala ca bibi. Ia qori e dua na ituvatuva vakayalololoma, qai dodonu me caka. Au vakavinavinakataka ni Tamada vakalomalagi o Jiova e dauloloma, qai dauveivosoti.”—Sandi, Merika.

Ka era tukuna na kenadau ena lawa era sega ni iVakadinadina i Jiova

Cava era kaya na mataveilewai kei na tabana ni lawa me baleti ira na iVakadinadina i Jiova nira biu tani mai na ivavakoso o ira na valavala ca bibi? Qo na ka era kaya eso.

“Ena muria na isoqosoqo lotu na ivakavuvuli vakaivolatabu. Koya gona, ni dua na lewe ni lotu e cala bibi, e tiko vua na isoqosoqo lotu na dodonu me [biuti koya tani ke veiganiti]. Ena yaga sara vakalevu qori, baleta ke dua e sega ni muria na ivakatagedegede vakaivolatabu qai sega ni biu tani, ena rawa ni veivakamuai vei ira na lewe ni lotu na valavala ca e cakava.”—The High Court of Justice, Igiladi kei Welesi, June 7, 2019.
“Era kaya na mataveilewai e Urope kei na so tale na vanua, na vakatulewa ni nona [biu tani] e dua . . . qori na nodra galala ni sokalou na iVakadinadina i Jiova, e dodonu vakalawa . . . e sega tale ga ni yaco i kea na nodra kaukaua na mataveilewai.”—Parofesa Paulo Pinto de Albuquerque, turaganilewa tu e liu ena European Court of Human Rights.

a E vakamuai tiko na ulutaga qo vei ira na tagane, ia na kena ivakavuvuli e baleti ira tale ga na yalewa.

b E liu, e dau cavuti na vakasivoi vei ira na valavala ca bibi. Ia qo ena vakayagataki na vosa ena iVolatabu, eda sa na tukuna ga nira biu tani mai na ivavakoso.

c Era tagane lotu vaKarisito matua na qase ni ivavakoso, ra qai veivakavulici ena iVolatabu. Era vakatawani ira tale ga na tamata i Jiova ena nodra veivakayaloqaqataki kei na nodra veitokoni. Era sega ni saumi.—1 Pita 5:1-3.

d Ena so na ituvaki, e rawa ni biuta na ivavakoso e dua qai saga me vakacacana na duavata, veivakayalolailaitaki se uqeti ira na lewe ni ivavakoso mera cakava na itovo ca. Ke yaco qori, meda muria na ivakaro ena iVolatabu, ya meda kua ni “vakabula vua.”.—2 Joni 9-11.