Ena Vukei Au na Kalou Keu Masu?

Kena iSau Vakaivolatabu

Io, na Kalou e dau vukei ira era kerea na ka e salavata kei na lomana. Ke o sega mada ga ni dau masu, ena vakayaloqaqataki iko na kedra ivakaraitaki na cavuti ena iVolatabu nira masuta, ‘Kemuni na Kalou, ni vukei au.’ Me kena ivakaraitaki:

• “Ni vukei au, i Jiova na noqu Kalou, vakabulai au ena vuku ni dei ni nomuni loloma.”—Same 109:26.

• “Au ligalala qai dravudravua: Ni vukei au, noqu Kalou.”—Same 69:6, Douay Version.

O ira na vola na vosa qori e dei na nodra vakabauta na Kalou. Ia na Kalou e rogoci ira kece era torovi koya ena rai donu, me vakataki ira e “ramusu na lomadra” se “dasila na yalodra.”—Same 34:18.

Kua ni nanuma ni sa rui yawa na Kalou qai sega ni kauaitaka na kemu ituvaki. E tukuni ena iVolatabu: “E cecere o Jiova, e dau kauaitaki ira na yalomalumalumu, ia e yawaki ira na qaciqacia.” (Same 138:6) A kaya tale ga o Jisu vei ratou na nona tisaipeli: “E kilai vinaka na iwiliwili ni drauniulumudou.” (Maciu 10:30) E kauaitaka na Kalou na veika e baleti iko, na kena mada ga o sega ni vakasamataka. Sa qai wacava nona kauai ni o masulaka me vukei iko ena ka o lomaleqataka!—1 Pita 5:7.