Ena Rogoca na Kalou Noqu Masu?

Kena iSau Vakaivolatabu

Io ena rogoca. E vakamacalataki ena iVolatabu kei na so na ivakaraitaki ni dau rogo masu na Kalou. E kaya na iVolatabu: “E vakamamautaki ira na rerevaki koya ena ka era gadreva, e rogoca o koya na nodra tagi ni kere veivuke qai vakabulai ira.” (Same 145:19) Ia ena rogoca na Kalou na nomu masu se sega, ena vakatau vei iko.

Ka e Kauaitaka

• Mo masu vua na Kalou, kua ni masu vei Jisu, Meri, sanito, agilosi, se ivakatakarakara. O Jiova ga e “Daurogo masu.”​—Same 65:2.

• Na ka o masulaka me salavata kei na loma ni Kalou e tukuni ena iVolatabu.​—1 Joni 5:14.

• Mo masu ena yaca i Jisu e vakaraitaka ni o doka nona itutu. E kaya o Jisu, “Ena vukuqu ga ena qai torovi Tamaqu rawa kina e dua.”​—Joni 14:6.

• Mo masu ena vakabauta. Ke lailai nomu vakabauta kerea me vakalevutaki.​—Maciu 21:22; Luke 17:5.

• Mo yalomalumalumu, mo dau dina. E kaya na iVolatabu: “E cecere o Jiova, e dau kauaitaki ira na yalomalumalumu.”​—Same 138:6.

• Gumatua tiko ga ena masu. E kaya o Jisu: “Dou kerekere tiko ga, ena qai soli vei kemudou.”​—Luke 11:9.

Ka e Sega ni Kauaitaka

• Na vanua o cavutu mai kina se matatamata cava. “Ni sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”​—Cakacaka 10:34, 35.

• Nomu ivukivuki, iduriduri se idabedabe. O rawa ni masu vua na Kalou ni o dabe, cuva, tekiduru, se tucake.​—1 Veigauna 17:16; Niemaia 8:6; Taniela 6:10; Marika 11:25.

• Me rogolevu nomu masu, se o masu lo. E rogoca mada ga na Kalou na masu lo.​—Niemaia 2:1-6.

• E tarabi se sega na ka o lomaleqataka. E uqeti keda na Kalou meda ‘biuta vua na noda lomaocaoca kece, ni kauaitaki keda o koya.’​—1 Pita 5:7.