Au Sega ni Marautaka Noqu Bula—ena Vukei Au na Lotu, na Kalou, se iVolatabu?

Kena iSau Vakaivolatabu

Io. Na ivola makawa ni vuku na iVolatabu, e sauma e levu na taro bibi eda dau vakataroga, e rawa ni vakacegui iko se vakamarautaki iko. Raica mada qo e vica na taro e sauma na iVolatabu.

1. E Tiko na Dauveibuli? E kaya na iVolatabu ni “bulia na ka kece” na Kalou. (Vakatakila 4:11) Ni buli keda na Kalou, ena kila vinaka na ka eda gadreva meda marau da qai lomavakacegu kina.

2. E kauaitaki au na Kalou? Io, e dau nanumi keda na Kalou. E kaya na iVolatabu ni “sega ni yawa o koya vei keda yadua.” (Cakacaka 17:27) E kauaitaka na ka e yacovi iko qai vinakata me tokoni iko mo vinaka kina.—Aisea 48:17, 18; 1 Pita 5:7.

3. Au na marau niu kila na Kalou? E buli keda na Kalou meda kauaitaka noda “bula vakayalo,” oya na gagadre eda sucu kaya mai meda kila kina na ibalebale kei na inaki ni noda bula. (Maciu 5:3) Noda bula vakayalo e wili tale ga kina na gagadre ni noda via kila na Dauveibuli da qai veitokani kei koya. Ena marautaka me raica nomu sasaga mo via kilai koya vinaka, ni kaya na iVolatabu: “Toro voleka vua na Kalou ena qai toro voleka mai vei kemuni.”—Jemesa 4:8.

Levu sara era vakadinadinataka ni veisautaka ra qai marautaka na nodra bula nira bucina mera veitokani kei na Kalou. Nida mai kila na Kalou e sega ni kena ibalebale nida sa galala mai na leqa, ia na nona vuku e kune ena iVolatabu ena vukei iko

• Me mamarau nomu bula vakavuvale.

• Mo dau bula veiyaloni.

• Mo walia na leqa me vaka na lomabibi, leqataka na ilavo, kei na tauvimate bibi.

Levu na lotu era vakayagataka na iVolatabu ra qai sega ni muria na kena ivakavuvuli. Ia na lotu dina, e tokona na ka e kaya na iVolatabu, ena vukei iko mo kila vinaka na Kalou.