Na Cava Era Sega ni Soqova Kina na iVakadinadina i Jiova na Siganisucu?

Keimami sega ni soqova na siganisucu ni keimami vakabauta ni sega ni marautaka na Kalou. E sega ni tukuna vakadodonu na iVolatabu ni tabu na soqovi ni siganisucu, ia e yaga eso na tikina qo meda kila kina na rai ni Kalou. Raica mada e va na tikina qo kei na kena ivakavuvuli vakaivolatabu.

1. Na siganisucu e vu mai na lotu butobuto. E volai ena dua na ivola ni itukuni na Funk & Wagnalls Standard Dictionary of Folklore, Mythology, and Legend, ni siganisucu e vu mai na vakabauta ni gauna e sucu kina e dua, e “rawarawa nira curumi koya na timoni” ia “ena taqomaki koya na nodra tiko na nona itokani kei na nodra vosa ni vakanuinui vinaka.” E volai ena ivola The Lore of Birthdays (Na iTukutuku Makawa Baleta na Siganisucu) ena gauna makawa, na itukutuku ni siganisucu e “bibi ni dau dikevi kina na itukutuku ni nona bula” ni yavutaki ena “nodra vakadidike na dauraikalokalo.” E kuria na ivola qo, “ena vakabauta makawa na kadrala ni siganisucu e vakayacora na ka eda vinakata.”

   Ia e vakacala na iVolatabu na cakaiba, cakaisausau, vakatevoro, se “dua na ka va qo.” (Vakara 18:14; Kalatia 5:19-21) Dua na vuna e vakarusa kina na Kalou na koro makawa o Papiloni nira dauraikalokalo, qori e wili me cakaisausau. (Aisea 47:11-15) Keimami sega ni kauaitaka vakasivia na vanua era vu mai kina na ivalavala kece; ia keimami na sega ni vakawalena ke sa vakamatatataki tu ena iVolatabu.

2. Era sega ni soqova na siganisucu na lotu vaKarisito taumada. E kaya na ivola na World Book Encyclopedia “nira okata [na lotu vaKarisito taumada] me nodra ivalavala na lotu butobuto na soqovi ni nona siganisucu e dua.” E tukuni ena iVolatabu nira tauyavutaka na yapositolo kei na so tale e vakavulici ira o Jisu na ivakarau mera muria na lotu vaKarisito kece.​—2 Cesalonaika 3:6.

3. Na soqo bibi ga meda vakananuma na lotu vaKarisito na mate i Jisu, sega ni nona sucu. (Luke 22:17-20) E sega ni dodonu meda kurabuitaka ni tukuna na iVolatabu ni “vinaka na siga ni mate e ca na siga ni sucu.” (Dauvunau 7:1) Ni cava na bula i Jisu e vuravura e rogo vinaka tu ga na yacana vua na Kalou, oya na vuna e bibi kina na siga e mate kina mai na siga e sucu kina.​—Iperiu 1:4.

4. Sega ni cavuti ena iVolatabu na nona siganisucu e dua na dauveiqaravi ni Kalou. E sega ni nakiti qo ni volai kina na nodrau siganisucu e rua erau sega ni qarava na Kalou. Ia e ca ruarua na kena itinitini.​—Vakatekivu 40:20-​22; Marika 6:​21-​29.

Era lomalomani ira na luve ni iVakadinadina i Jiova nira sega ni soqova na siganisucu?

Me vakataki ira ga na itubutubu vinaka, era vakaraitaka e veigauna na itubutubu iVakadinadina i Jiova nira lomani luvedra. Era soli iloloma vei ira, e tiko tale ga na gauna mera soqo kina. Era saga mera muria na ivakaraitaki uasivi ni Kalou ni dau yalorawarawa me solia na ka vinaka vei ira na luvena. (Maciu 7:11) Era sega ni lomalomani ira na luvedra na iVakadinadina i Jiova me vaka e laurai ena vica na ivakamacala qo:

• “Au marau ni soli vei au na iloloma au sega ni namaka.”​—Tammy, yabaki 12.

• “E sega ni dau soli vei au na iloloma ena noqu siganisucu, ia rau dau soli iloloma vei au na noqu itubutubu ena so tale na gauna. Au taleitaka qori niu sega ni dau namaka.”​—Gregory, yabaki 11.

• “O nanuma ni marautaki na pati e tini ga na miniti, e vica ga na keke kei na dua na sere? Lako mada mai neitou vale mo qai kila kina na pati!”​—Eric, yabaki 6.