E Veivakabulai Vakacava o Jisu?

Kena isau vakaivolatabu

A vakabulai ira na tamata yalodina o Jisu ena gauna e solia kina nona bula me isoro ni veivoli. (Maciu 20:28) Sa rauta me vakatokai o Jisu ena iVolatabu me “iVakabula kei vuravura.” (1 Joni 4:​14) E kaya tale ga na iVolatabu: “E sega tale ni dua ena veivakabulai, ni sega tale ni dua na yaca e ruku i lomalagi e soli vei keda meda vakabulai kina.”​—Cakacaka 4:​12.

A ‘mate ena vukudra kece’ era vakaraitaka nodra vakabauti koya o Jisu. (Iperiu 2:9; Joni 3:​16) “E . . . vakaturi koya mai na mate na Kalou,” qai lesu i lomalagi o Jisu ena yago vakayalo. (Cakacaka 3:​15) Ni sa tiko mai lomalagi o Jisu, “e rawa ni taucoko sara na nona vakabulai ira tale ga era toro yani vua na Kalou ena vukuna, ni bula tu ga o koya me vakamamasu ena vukudra.”​—Iperiu 7:​25.

Cava me vakamamasu kina ena vukuda o Jisu?

Eda ivalavala ca kece. (Roma 3:​23) Na ivalavala ca e tawasei keda mai vua na Kalou, qai kena itinitini na mate. (Roma 6:​23) Ia e “dauveivuke” o Jisu vei ira era vakaraitaka nodra vakabauta na nona isoro ni veivoli. (1 Joni 2:1) E vakamamasu o Jisu ena vukudra o ira qori ni kerea na Kalou me rogoca nodra masu, me vosota nodra ivalavala ca ena yavu ni nona mate vakaisoro. (Maciu 1:​21; Roma 8:​34) E vakayacora na Kalou na veika e kerea qori o Jisu ni salavata kei na lomana. A talai Jisu i vuravura na Kalou “me vakabulai . . . o vuravura ena vukuna.”​—Joni 3:​17.

E bibi ga meda vakabauti Jisu meda vakabulai kina?

Sega. Na noda vakabulai e sega ni vakatau ga ena noda vakabauti Jisu, eso tale na ka meda cakava. (Cakacaka 16:30, 31) E kaya na iVolatabu: “E mate na yago ni sega na icegu, ena mate tale ga na vakabauta e sega ni cakacakataki.” (Jemesa 2:​26) Ke da via vakabulai, meda:

• Vulica na veika me baleti rau o Jisu kei na Tamana o Jiova.​—Joni 17:3.

• Vaqaqacotaka noda vakabauti rau.​—Joni 12:44; 14:1.

• Vakaraitaka noda vakabauta nida talairawarawa ina nodrau ivakaro. (Luke 6:​46; 1 Joni 2:​17) A vakavulica o Jisu ni sega ni o ira kece era vakatokai koya me “Turaga” era na vakabulai, era na vakabulai ga o ira era “cakava na loma i [Tamana] mai lomalagi.”​—Maciu 7:​21.

• Vakaraitaka tiko ga noda vakabauta se mani ituvaki dredre cava eda sotava. A vakamatatataka qori o Jisu ena nona kaya: “O koya e vosota me yacova na icavacava ena vakabulai.”​—Maciu 24:13.