RA TAROGA NA ITABAGONE
Rawa ni Rau Nuitaki au na Noqu iTubutubu?
Ka mo kila
Na nomu nuitaki vakalevu e vakatau ena nomu daudina. Na nomu talairawarawa ena nodrau lawa na nomu itubutubu e vaka nomu saumi dinau tiko ina baqe. Nomu dinau vei rau oya na nomu talairawarawa. Ke rau dau nuitaki iko ena ‘sausaumi’, rau na solia vakarawarawa tale ga vei iko na ‘dinau’ se galala. Ia ke o sega ni dau nuitaki, kua ni kurabui ni rau na vakalailaitaka na nomu ‘ivolanidinau’ se na galala rau solia vei iko.
Ka ni sasaga me rau nuitaki iko nomu itubutubu. E vinakati mo vakaraitaka na itovo me rau nuitaki iko kina nomu itubutubu, ni bera ni rau solia tale vei iko na galala.
ITALANOA DINA: “Niu se itabagone au kila na ka rau vinakata noqu itubutubu meu cakava. Au dau cakava ga vakalasulasu, ia au cakava lo tiko na ka ga au vinakata. E dredre kina nodrau nuitaki au. Toso na gauna au liaca ni sala duadua ga rau na solia kina vakalevu vei au na galala oya meu daudina. E vinakati meu daudina meu nuitaki tale ga.”—Craig.
Ka mo cakava
Ke mosimosi mada ga, saga mo daudina e veigauna. Eda dau cala kece, ia ke o via ubia ena lasu (se o lasu mo kua ni tukuna na ka dina) rau na sega ni nuitaki iko na nomu itubutubu. Ena yasana adua, ke kilai ni o dau dina ena ka kece, rau na kila nomu itubutubu ni o rawa ni vakatusa na cala o cakava. Qori na mataqali gone e dau nuitaki.
“O na nuitaki ke o vakadinata ni o dau cala tale ga, ia ke o saga mo vunia o na sega ni nuitaki.”—Anna.
E kaya na iVolatabu: “Keitou vinakata me keitou dina ena ka kece.”—Iperiu 13:18.
Me vakasamataki: Vakacava o dau tukuna na ka dina ni rau taroga na nomu itubutubu na vanua o na lako kina, kei na veika o lai cakava? O dau tukuna na ka kece ni rau taroga na vanua o tu mai kina kei na veika o cakava?
Mo nuitaki. Talairawarawa ena lawa kece e vale. Dau cakava totolo na ka e tukuni vei iko. Ni dua na vanua e tukuni mo tiko kina, kua ni dau bera. Cakava na nomu lesoni mai koronivuli. Kua ni beca na vakatatabu ni lako ena bogi.
“Ke rau kaya na nomu itubutubu mo gade vei ira nomu itokani ena bogi ia mo tiko e vale ena ciwa, ke o qai lesu mai ena veimama ni tini kua ni namaka me rau na soli iko mo gade tale vei ira!”—Ryan.
E kaya na iVolatabu: “Nida na dui colata ga na noda icolacola.”—Kalatia 6:5, vmr.
Me vakasamataki: Vakacava o dau tiko e vale ena gauna e vakaroti vei iko, vakaotia vinaka na nomu cakacaka, qai talairawarawa kevaka mada ga o sega ni taleitaka?
Dau vosovoso. Ke o vakavuna nodrau sega ni nuitaki iko na nomu itubutubu, ena via taura na gauna me rau na nuitaki iko tale. E vinakati gona mo wawa.
“Au rarawataka nodrau sega ni nuitaki au na noqu itubutubu ena levu tale na ka me veiganiti kei na noqu yabaki ni bula. Au nanuma ga ni vakatau nona matua e dua ena yabaki ni nona bula, ia e sega. Au kerei rau noqu itubutubu meu vakaraitaka vei rau niu rawa ni nuitaki. Oti toka vakalailai rau sa qai nuitaki au. Au vulica kina ni sega ni vakatau ena nona yabaki e dua na nona nuitaki, e vinakati me laurai ena ka e cakava.”—Rachel.
E kaya na iVolatabu: “Dau vakadeitaka se o cei dina o kemuni.”—2 Korinica 13:5.
Me vakasamataki: Me rau dau nuitaki iko na nomu itubutubu, cava eso na ka mo cakava mo ‘vakadeitaki iko kina’ vei rau?
VAKATUTU: Tuvanaka nomu isausau, kua ni dau bera, vakaotia vinaka nomu itavi, muria na vakatatabu ni gauna e soli vei iko, se so tale na ka. Me rau kila na nomu itubutubu na ka o via cakava, tarogi rau ena veika rau namaka me rau qai nuitaki iko kina. Gumatua tale ga ni muria na veiuqeti ni iVolatabu: “Moni biuta tani na tamata makawa me vaka na nomuni itovo makawa.” (Efeso 4:22) Toso na gauna, rau na raica nomu itubutubu nomu toso!