E+/IvanJekic via Getty Images
BULI SE BULA VAKAIDEWADEWA?
Nona Vuka na Sorenikau ni Dandelion
Ni vakatauvatani kei na so tale na veikabula, e vinaka duadua na nona vuka na sorenikau ni dandelion. Ni liwava na cagi ena cagina e maliwalala e levu na sorena e vaka na irairai ni parasutu lalai. Ena rawa ni vuka tu me dua na kilomita se sivia, oti sa na qai tau ina qele. E rawa vakacava me dede tu va qori nona vuka? E laurai ena dua na vakadidike wale ga qo, ni vakavataki na totolo qai dei ni nona vuka ni vakatauvatani kei na parasutu.
Vakasamataka mada: Na sorenikau yadua era lili toka e tolona ena kabita dei tu na vutina lalai e vakatokai na pappus. Na vutina sara ga qori e vukea me cagina tu vakadede e maliwalala me vaka na parasutu.
Era tukuna eso na dauvakadidike na kaukaua ni cawiri ni cagi ena vakavuna me lutu kina vakamalua na sorenikau
Ia e tiko e dua tale na ka e rawa ni cakava na pappus. Ni liwava na cagi, ena qai bulia e dua na irairai ni cagi mokimokiti e delana. Qori ena vakamamadataka na sorenikau me cagina tiko ga i cake me yacova ni tau ina qele.
Na kena tuvani vakamaqosa na vuti ni sorenikau qori e rawa ni vuka kina me vaka na parasutu, ia e kaukaua cake sara qai dei. Kena ikuri, e rauta ni 90 na pasede na kena mamada e rawa kina me ciri wale tu e maliwalala! Kena ibalebale, e sega ni levu sara na ka e vakabibitaki koya.
Era saga na saenitisi mera vakamurimuria eso na sala e vuka kina na sorenikau qo. Dua ya era via bulia kina e dua na misini lailai (drone), qai lailai sara na kena vakayagataki kina na kaukaua ni livaliva. E levu na ka e rawa ni vakayagataki kina na misini qori, e rawa tale ga ni dikeva na sala e vagagai kina na cagi.
Na kena vuka na sorenikau ni dandelion
Cava o nanuma? E buli se bula vakaidewadewa na sala vakasakiti e dau vuka kina na sorenikau ni dandelion?