Roma 15:13—“Me Vakasinaiti Kemuni Mada ga na Kalou o Koya na vu ni Noda iNuinui ena Marau Kece kei na Vakacegu”

“Me vakasinaiti kemuni mada ga na Kalou o koya na vu ni noda inuinui, ena marau kece kei na vakacegu ena vuku ni nomuni vakabauti koya, me levu tiko ga kina na nomuni inuinui ena kaukaua ni yalo tabu.”—Roma 15:13, New World Translation.

“Me vakasinaiti kemudou mada na Kalou, o koya na vu ni nuinui, ena reki kece ga kei na vakacegu ni dou sa vakabauta, me levu sara na nomudou inuinui e na vuku ni nona kaukauwa na Yalo Tabu.”—Roma 15:13, New International Version.

iBalebale ni Roma 15:13

E kaya na yapositolo o Paula ena tikinivolatabu qori ni vinakata me vakasinaiti ira nona dauveiqaravi na Kalou ena “marau kei na vakacegu.” Na itovo vinaka qori e salavata kei inuinui e solia na Kalou kei na kaukaua ni yalo tabu.

Eda kila ni vakarautaka na Kalou na inuinui ena nona Vosa, na iVolatabu. E kaya na Roma 15:4, “na ka kece e volai e liu [ya na iVolatabu] e volai meda vakavulici kina, me noda na inuinui e rawati mai na noda vosota kei na noda vakacegui mai na veika e volai ena iVolatabu.” E volai ena iVolatabu na vosa ni iyalayala ni Kalou me walia na leqa e dau vakararawataki keda ena gauna qo, me vaka na bula dravudravua, veika tawadodonu, tauvimate kei na mate. (Vakatakila 21:4) Na Kalou ena vakayacora nona vosa ni yalayala ni vakayagataki Jisu Karisito. Eda rawa ni nuitaka kina na veigauna vinaka e se bera mai.—Roma 15:12.

Eda na rawa ni “vakasinaiti” ena inuinui e solia na Kalou ke da vakabauta na ka e yalataka. Na levu ga ni noda vulica na veika me baleti koya, na levu tale ga ni noda vakadeitaka ni na vakayacora o koya na ka kece e yalataka. (Aisea 46:10; Taito 1:2) Na noda nuitaka na veika e yalataka na Kalou, eda vakasinaiti kina ena marau kei na vakacegu ena gauna mada ga eda sotava kina na ituvaki dredre.—Roma 12:12.

Na vakacegu, marau kei na inuinui e veisemati kei na “yalo tabu,” e laurai kina na kaukaua ni Kalou.a Na Kalou e vakayagataka na yalo tabu me vakayacora kina na nona vosa ni yalayala. Qori e solia vei keda na inuinui. Na yalo tabu e rawa tale ga ni vukei keda meda vakaraitaka na itovo vinaka, me vaka na marau kei na vakacegu.—Kalatia 5:22.

Tikina Wavolita na Roma 15:13

Na ivola na Roma e volai taumada vei ira na lotu vaKarisito era tiko ena siti o Roma. Eso vei ira na lotu vaKarisito qori era Jiu, eso tale era sega ni Jiu. Dina ni duidui na nodra isususu kei na itovo vakavanua, ia e uqeti ira kece o Paula mera saga me duavata na nodra rai kei na ka era cakava.—Roma 15:6

E tukuna o Paula vei ira na lotu vaKarisito e Roma ni sa parofisaitaka makawa tu na Kalou ni na yaco e dua na gauna era na duavata kina na lewe ni veimatanitu mera sokaloutaki koya. E vakadeitaka o Paula na ka e tukuna qori ni cavuta vakava na tikinivolatabu mai na iVolatabu vakaIperiu.b (Roma 15:9-12) Qo na ka e vakabibitaka: Me vakataki ira ga na Jiu, ena yaga tale ga vei ira na lewe ni veimatanitu na cakacaka vakaitalatala i Karisito. Era na rawa ni rawata kece kina na Jiu kei na sega ni Jiu, na inuinui e vakarautaka na Kalou. Era uqeti gona na lewe ni ivavakoso e Roma mera “dau veiciqomi” se mani vakacava na nodra isususu se vanua era cavutu mai kina.—Roma 15:7