Vosa Vakaibalebale 22:6—“Vakavulica na Gone ena Sala me Muria”

“Mo vakavulica na gone ena sala me muria, ni qase mai ena sega ni gole tani mai kina.”—Vosa Vakaibalebale 22:6, Vakadewa ni Vuravura Vou.

“Vakavulica na gone ena sala e dodonu me lako kina: Ia ni sa qase mai, ena sega ni lako tani mai kina.”—Vosa Vakaibalebale 22:6, English Standard Version.

iBalebale ni Vosa Vakaibalebale 22:6

O ira na itubutubu era vakavulici luvedra mera lomana na Kalou qai doka na nona lawa, era namaka ni na yaga qori ena nodra bula taucoko na gone.

“Vakavulica na gone ena sala me muria.” E rawa ni vakabalebaletaki qori ena nodra “vakavulici na gone mera muria na sala donu.” E levu na tikinivolatabu ena Vosa Vakaibalebale e uqeti ira na itubutubu mera vakavulica vei luvedra na ka e donu kei na ka e cala nira se lalai. (Vosa Vakaibalebale 19:18; 22:15; 29:15) Ia era kila na itubutubu dauloloma ni o ira na gone, me vakataki keda ga na qase, e tu vei ira na galala ni vakatulewa. Me kua ni tukuni tu ga vei ira na ka mera cakava, ia me vakamacalataki vinaka na vuna mera cakava kina qori qai vukei ira mera yalomatua qai dau vakatulewa vakamatau.—Vakarua 6:6, 7; Kolosa 3:21.

Era kaya eso na vuku ni iVolatabu ni vakaibalebaletaki qori ena nodra “vakavulici na gone mera muria ga na ka era vinakata,” se ena ivakarau ni lomadra. Era na rairai nanuma eso ni donu qori, ia na vosa vakaIperiu ni “sala me muria” e vakaibalebaletaki ina ivakarau ni bula e vinaka qai dodonu. E vakamacalataki ena Vosa Vakaibalebale e rua na sala eda rawa ni muria. E dua na sala e vakatokai me “nodra ivalavala na tamata vinaka,” se ‘na nodra sala na vuku,’ se “sala dodonu.” (Vosa Vakaibalebale 2:20; 4:11; 23:19) E dua tale e vakatokai me “nodra sala na ivalavala ca,”se “na nodra ivalavala na sesewa,” se “na sala cala.” (Vosa Vakaibalebale 4:14; 12:15; 16:29) Koya gona, na sala “me muria” na gone e dusia na “sala dodonu.” Qori na ivakarau ni bula e vakavulici ena Vosa ni Kalou na iVolatabu.—Same 119:105.

“Ni qase mai ena sega ni gole tani mai kina.” Nira vakavulici ira na gone na itubutubu ena ivakatagedegede savasava ni Kalou, ena rawa ni donu na sala era muria ena nona bula taucoko. E sega ni kena ibalebale qori ni gone e vakavulici vinaka ena sega vakadua ni “gole tani” mai na sala donu se vakanadakuya na ivakarau ni bula e vakadonuya na Kalou. Kena ivakaraitaki, ke dua e vakailala vakalevu kei ira na dau caka ca, ena rawa ni biuta na “sala dodonu” qai valavala ca. (Vosa Vakaibalebale 2:12-16; 1 Korinica 15:33) Ke yaco mada ga qori, nira vakavulici na gone mera muria na ivakatagedegede ni Kalou, era sa vukei ira tiko na itubutubu mera rawata na bula vinaka duadua.—Vosa Vakaibalebale 2:1, 11.

Tikina Wavolita na Vosa Vakaibalebale 22:6

E laurai ena Vosa Vakaibalebale wase 22, na vuku ni Kalou ena yaga ena levu na ituvaki ena noda bula. E vakabibitaki kina na vinaka ni keda irogorogo vei Jiova,a ena rawati qori nida yalomalumalumu, yalovinaka qai dau cakacaka. (Vosa Vakaibalebale 22:1, 4, 9, 29) Ia e tukuna eso tale na tikinivolatabu nira na sotava ga na leqa o ira na beca na ivakatagedegede ni Kalou qai vakasaurarataki ira na dravudravua.—Vosa Vakaibalebale 22:8, 16, 22-27.

E sega ni tikinivolatabu kece ena Vosa Vakaibalebale wase 22 e dusia na nodra tuberi na gone, ia e vakamacalataka na ivakarau ni bula ena vakadonui keda kina na Kalou, meda vakila tale ga kina na marau dina. (Vosa Vakaibalebale 22:17-19) Nira vakavulici na gone mera muria qori, era sa vakaraitaka tiko na itubutubu nira vinakata mera marautaka na gone na bula vinaka duadua.—Efeso 6:1-3.

Sarava na ivakamacala lekaleka ni ivola na Vosa Vakaibalebale.