Eda na vakaraitaka noda lomani ira na tacida nida okati ira mera noda itokani nida veimaliwai. (2 Kor. 6:​11-13) Levu vei keda eda lewena na ivavakoso era tiko kina na tacida era lako mai na veivanua, e duidui tale ga na nodra itovo kei na ivakarau ni bula. Eda na lomani ira vakalevu ke da kauaitaka ga na nodra itovo vinaka. Nida vulica meda raici ira na tacida mai na rai nei Jiova, e vakaraitaka nida lomani ira. Ena bibi sara noda veilomani ena veivakararawataki levu. Eda na taqomaki vakacava ni tekivu na veivakararawataki levu? Dikeva mada na ka e tukuna o Jiova vei ira na nona tamata ni valuti ira o Papiloni makawa: “Ni lako na noqu tamata, moni curu ina nomuni rumu e loma, ni sogota na nomuni katuba. Moni vunitaki kemuni vakalekaleka me oti mada na veicudruvi.” (Aisea 26:20) De dua eda na muria tale ga na vosa qori ena veivakararawataki levu. w23.07 6-7 ¶14-16

Me kilai ni o dau yalorawarawa. Mo taroga: ‘Au kilai niu dau yalorawarawa, au dau vosota tale ga? Seu raici tu meu yalodredre, voravora, se yalodua? Au dau vakarogoci ira meu cakava na ka era vinakata ke veiganiti?’ Na ivakarau ni noda yalorawarawa ena laurai kina noda vakatotomuri Jiova kei Jisu. E vinakati na yalorawarawa ni veisau na keda ituvaki. Na veisau qori e rawa sara ga nida sega ni namaka. Eda na rairai tauvimate bibi. Se veisau vakasauri na bula vakailavo, se vakadredretaka noda bula na veiliutaki vakamatanitu. (Dauv. 9:11) Ni veisau mada ga na noda ilesilesi vakalou, eda rawa sara ga ni vakatovolei kina. Eda rawa ni vakamatauni keda ena veisau qori nida muria e va na ka qo: (1) meda ciqoma na keda ituvaki, (2) eda vakanamata ena veigauna se bera mai, (3) me donu noda rai, (4) vukea eso tale. w23.07 21-22 ¶7-8

Ni se cauravou na parofita o Taniela era kauti koya vakavesu na kai Papiloni donuya na ivalu, e yawa sara mai na nona vanua. Ia era taleitaki koya na vakailesilesi ni Papiloni. Era raica ga “na ka e sau,” ya ni “bulicaki vinaka” o Taniela, e “rairai vinaka,” e susu tale ga ena dua na vuvale rogo. (1 Sam. 16:7) Qori na vuna era vakavulici koya kina na kai Papiloni me veiqaravi ena valenitui. (Tani. 1:​3, 4, 6) E lomani Taniela o Jiova baleta na ivakarau ni bula e digia. A rairai voleka ni yabaki 20 o Taniela se 20 vakacaca, ena gauna e tukuni koya kina o Jiova kei na rua tale na turaga yalodina o Noa kei Jope, rau qarava na Kalou me dua na gauna balavu. (Vkte. 5:32; 6:​9, 10; Jope 42:​16, 17; Isik. 14:14) E lomani Taniela tiko ga o Jiova ena gauna kece ni nona bula.​—Tani. 10:​11, 19. w23.08 2 ¶1-2