Ni se cauravou na parofita o Taniela era kauti koya vakavesu na kai Papiloni donuya na ivalu, e yawa sara mai na nona vanua. Ia era taleitaki koya na vakailesilesi ni Papiloni. Era raica ga “na ka e sau,” ya ni “bulicaki vinaka” o Taniela, e “rairai vinaka,” e susu tale ga ena dua na vuvale rogo. (1 Sam. 16:7) Qori na vuna era vakavulici koya kina na kai Papiloni me veiqaravi ena valenitui. (Tani. 1:​3, 4, 6) E lomani Taniela o Jiova baleta na ivakarau ni bula e digia. A rairai voleka ni yabaki 20 o Taniela se 20 vakacaca, ena gauna e tukuni koya kina o Jiova kei na rua tale na turaga yalodina o Noa kei Jope, rau qarava na Kalou me dua na gauna balavu. (Vkte. 5:32; 6:​9, 10; Jope 42:​16, 17; Isik. 14:14) E lomani Taniela tiko ga o Jiova ena gauna kece ni nona bula.​—Tani. 10:​11, 19. w23.08 2 ¶1-2

Ke o vakasamataka tiko mo voli vale, e macala ga ni o na via kila na veika matailalai ni vale qori ni bera ni o volia. Eda rawa tale ga ni cakava qori nida wilika se vulica na iVolatabu. Ke o wiliwili ga vakatotolo o na rawa ni vulica ga eso na ka, qori na “ivakavuvuli rawarawa wale me baleta na veika vuni ni vosa ni Kalou.” (Iper. 5:12) Ia ke vinakati mo ‘curu i loma’ me vaka ga na vale, o na dikeva na veika matailalai e tu kina. Dua na iwalewale vinaka mo vulica kina na iVolatabu, ya mo raica na sala e veisemati kina na kena itukutuku. Saga sara mo kila na ka dina o sa mai vakabauta kei na vuna o vakabauta kina. Meda kila vinaka na ka kece ena Vosa ni Kalou, e tiko eso na ka e bibi meda vulica vakatitobu. E uqeti ira na tacina vakayalo na yapositolo o Paula mera gumatua ni vulica na Vosa ni Kalou “me matata kina ena nomuni vakasama . . . na raba, na balavu, na cere, kei na titobu” ni ka dina. Nira cakava qori ena “ti sara na [wakadra] qai dei na . . . yavu” ni nodra vakabauta. (Efeso 3:​14-19) E bibi meda cakava tale ga qori. w23.10 18 ¶1-3

E tu ena iVolatabu e levu na nodra ivakaraitaki o ira era vakaraitaka na vosovoso. E vinaka mo vulica na nodra ivakaraitaki, mo vakekeli tale ga kina. Kena ivakaraitaki, a se lumuti o Tevita ni se itabagone me tui e Isireli, ia e wawa tale me vica vata na yabaki me qai veiliutaki. Erau qaravi Jiova ena yalodina o Simione kei Ana ni rau waraka tiko na Mesaia yalataki. (Luke 2:​25, 36-38) Ni o vulica na nodra ivakaraitaki, raica na isau ni vica na taro qo: Na cava e vukei koya me vosovoso? E yaga vakacava vua? Au na vakatotomuri koya vakacava? De dua ena yaga tale ga mo vulica na nodra ivakaraitaki o ira na sega ni vosovoso. (1 Sam. 13:​8-14) O rawa ni taroga: ‘Cava e rairai vakavuna nodra sega ni vosovoso? Cava era sotava kina?’ w23.08 25 ¶15