Vunau ni Soro

27 E vosa tale vei Mosese o Jiova, e kaya: 2 “Vosa vei ira na Isireli, qai tukuna vei ira, ‘Ke dua na tagane e cakava e dua na bubului+ bibi me solia na ka e nanumi me isau ni dua na tamata vei Jiova, 3 na isau e nanumi ni dua na tagane e tiko nona yabaki ni bula mai na 20 ina 60, ena 50 na sikeli* siliva, ena ivakarau tudei ni sikeli ena vanua tabu.* 4 Ia ke yalewa, na isau e nanumi e 30 na sikeli. 5 Ke yabaki 5 me yacova na yabaki 20, na isau e nanumi vei ira na tagane ena 20 na sikeli, qai 10 na sikeli vei ira na yalewa. 6 Ke vula dua me yacova na yabaki lima, na isau e nanumi vei ira na tagane ena lima na sikeli siliva, qai tolu na sikeli siliva vei ira na yalewa.

7 “‘Ke yabaki 60 lako cake, na isau e nanumi vei ira na tagane ena 15 na sikeli, qai 10 na sikeli vei ira na yalewa. 8 Ke rui dravudravua qai sega ni sauma rawa na isau e nanumi,+ ena duri ena mata ni bete na tamata oya, ena qai lewa vua na bete na kena isau. Ena lewa na bete me vaka ga na ka e rawata o koya e bubului.+

9 “‘Ke bubuluitaka na manumanu e ganita me isoro vei Jiova, ena vakatabui na ka kece ga e soli vei Jiova. 10 Me kua ni sosomitaka se veisautaka na ka vinaka ina ka ca, se na ka ca ina ka vinaka. Ia ke veisautaka e dua na manumanu kei na dua tale na manumanu, ena okati ruarua me ka tabu na imatai ni manumanu kei na kena e veisautaki. 11 Ia ke manumanu dukadukali+ e sega ni cabori me isoro vei Jiova, ena qai vakaduria tu na manumanu ena mata i bete. 12 Ena qai lewa na bete na kena isau, se ka vinaka se ka ca. Ena vakabau na isau e nanuma na bete. 13 Ia ke mani via volia lesu, me qai solia e dua na ikalima me ikuri ni isau sa nanumi tu.+

14 “‘Ke dua na tamata e via vakatabuya na nona vale me ka tabu vei Jiova, me lewa na bete na kena isau, se ka vinaka se ca. Na isau ga e lewa mai na bete, qori ga na kena isau.+ 15 Ia ke via volia lesu nona vale o koya e sa vakatabuya, me qai solia e dua na ikalima ni ilavo me ikuri ni isau sa nanumi tu, ena qai nona.

16 “‘Ke dua na tagane e vakatabuya vei Jiova eso na nona tikiniqele, ena vakatau na kena isau ena levu ni sorenikau e rawa ni kaburaki kina: e dua na omeri* sorenivarile ena 50 na sikeli siliva. 17 Ke vakatabuya na nona tikiniqele ena yabaki ni Jupili,+ se vakabau tiko ga na isau sa nanumi tu. 18 Ke vakatabuya na nona were ni oti na yabaki ni Jupili, ena cakacakataka vua na bete na isau me salavata kei na levu ni yabaki se vo me yacova na yabaki ni Jupili e tarava, me qai vakalutumi qori mai na isau sa nanumi tu.+ 19 Ia ke via volia lesu na tikiniqele o koya e vakatabuya, me qai solia e dua na ikalima ni ilavo me ikuri ni isau sa nanumi tu, ena nona tiko ga. 20 Ke sega ni volia lesu o koya na nona tikiniqele qai volitaki na tikiniqele vua e dua tale na tagane, sa na sega ni rawa ni voli lesu. 21 Ni sa vakasukai na were ena yabaki ni Jupili, sa na ka tabu vei Jiova, me vaka na tikiniqele e soli vakatabakidua vua. Ena nodra iyau na bete.+

22 “‘Ke dua e vakatabuya vei Jiova na tikiniqele a volia e sega ni wili ena nona ivotavota,+ 23 ena cakacakataka vua na bete na kena isau me yacova na yabaki ni Jupili, ena qai solia na isau e nanumi ena siga oya.+ Qo e ka tabu vei Jiova. 24 Ena yabaki ni Jupili, ena suka tale na tikiniqele oya vei koya e volia mai kina, vei koya e nona na vanua oya.+

25 “‘Na isau kece me cakacakataki ena ivakarau tudei ni sikeli ena vanua tabu. Na sikeli me rauta ni 20 na kera.*

26 “‘Ia me kua ni dua e vakatabuya na imatai ni manumanu era sucu mai, nira sucu mai e liu mera nei Jiova.+ Se mani bulumakau tagane se sipi, sa nei Jiova.+ 27 Ke dua vei ira na manumanu dukadukali, e qai volia lesu me salavata na isau sa nanumi tu, me solia e dua na kena ikalima me kena ikuri.+ Ia ke sega ni voli lesu, ena volitaki me salavata na isau sa nanumi tu.

28 “‘Ia me kua ni dua na tamata me na volitaka se volia lesu tale na ka sa vakatabuya vakatabakidua me nei Jiova, se mani kawatamata se manumanu se nona tikiniqele. Na ka kece e vakatabui e ka tabu sara vei Jiova.+ 29 Me kua tale ga ni voli lesu na tamata beitaki sa wasei tani tu me vakarusai.+ Me vakamatei sara ga+ o koya.

30 “‘E nei Jiova e dua na ikatini+ kece ni tikiniqele, se mani vuaniqele se vuata ni kau. Qo e ka tabu vei Jiova. 31 Ke dua na tamata e via volia lesu na nona ikatini, me solia e dua na kena ikalima me kena ikuri. 32 Na ikatini kece ni qelenibulumakau kei na qelenisipi, na ka kece e lako ena ruku ni nona ititoko na ivakatawa ni manumanu, na ikatini ni manumanu* me ka tabu vei Jiova. 33 Me kua ni dikeva se ka vinaka se ca, se me sosomitaka. Ia ke via sosomitaka, na kena imatai kei na kena isosomi me ka tabu.+ Me kua ni voli lesu.’”

34 Qo na ivakaro e solia o Jiova vei Mosese ena Ulu i Saineai ena vukudra na Isireli.+