Jeremaia

24 E qai vakaraitaka vei au o Jiova e rua na sova lolo e tu ena mata ni valenisoro i Jiova, ni kauti ira oti o Tui Nepukanesa* e Papiloni, oya o Jekonaia*+ na luvei Jioiakimi+ na tui Juta kei ira na turaga ni Juta, o ira na matai kei ira na matai ni kaukamea,* e kauti ira mai Jerusalemi i Papiloni.+ 2 E tiko na lolo vinaka sara ena dua na sova, e vaka na lolo taumada, e tiko ena dua tale na sova na lolo ca sara, e sega ni laukana rawa ni rui ca.

3 E qai tarogi au o Jiova: “Na cava o raica tiko Jeremaia?” Au kaya yani: “Na lolo, na lolo vinaka e vinaka sara, ia na lolo ca e ca sara, e sega ni laukana rawa ni rui ca.”+

4 E vosa tale vei au o Jiova, e kaya: 5 “Qo na ka e tukuna o Jiova na Kalou ni Isireli, ‘Me vaka ga na lolo vinaka qo au na raica mera vinaka na Juta era kau vakavesu, o ira au vakatala ena vanua qo ina nodra vanua na Kalitia. 6 Au na vakaraici ira tiko ga mera vinaka kina, au na vakalesui ira mai ena vanua qo.+ Au na tarai ira, au na sega ni basuka, au na tei ira, au na sega ni cavuta.+ 7 Au na solia vei ira na yalo mera kilai au ni o yau o Jiova.+ Era na noqu tamata, au na nodra Kalou,+ nira na lesu mai vei au ena lomadra taucoko.+

8 “‘Ia na lolo ca e sega ni laukana rawa ni rui ca,+ qo na ka e kaya o Jiova: “Ena va qori na noqu raici Tui Setekaia+ e Juta, o ira na nona turaga, o ira na vo ni lewe i Jerusalemi era tiko ena vanua qo kei ira na tiko ena vanua o Ijipita.+ 9 Au na cakava mera domobulataki, mera ca ina veimatanitu kece e vuravura,+ mera beci, mera bolei, mera vosavakacacataki, mera cudruvi+ ena vanua kece au vakasavi ira kina.+ 10 Au na tala vei ira na iseleiwau,+ na dausiga, kei na matedewa+ mera mate mada ena vanua au solia vei ira kei na tukadra.”’”