Jeremaia
4 “Ke o na lesu mai Isireli,” e kaya o Jiova,
“Ke o na lesu mai vei au,
Ke o na kauta tani na nomu matakau vakasisila e mataqu,
O na qai sega ni veidroyaki.+
2 Ke o bubului,
‘Ni bula dina tiko o Jiova!’ ena lomadina, ena lewadodonu, kei na yalododonu,
Ena vosa vakalougatataki ira na veimatanitu o koya,
Era na sakitaki koya.”+
3 Qo na ka e kaya o Jiova vei ira na lewe i Juta kei Jerusalemi:
“Moni cukita na nomuni vanua se bera ni cuki,
Moni kua ni kakaburaki tiko ga ena wavakavotona.+
4 Moni cilivi kemuni moni nei Jiova,
Moni ciliva na vuso ni lomamuni,+
O kemuni na kai Juta kei na lewe i Jerusalemi,
De waqa na noqu cudru me vaka na bukawaqa
E caudre qai sega ni dua e bokoca,
Ni ca na nomuni ivalavala.”+
5 Moni tukuna qori e Juta, moni vakarogoya e Jerusalemi.
Moni kailavaka, moni uvuca na davui* ena vanua.+
Moni kacivaka ena domolevu, moni kaya: “Moni soqoni vata,
Meda dro ina koro vakabai vinaka.+
6 Moni vakaduria na kaunikuila me donui Saioni.
Moni dro, moni kua ni tu vakadua,”
Niu na kauta mai na vualiku na ca,+ na veivakarusai levu.
7 E lako mai o koya me vaka e dua na laione mai na nona veikau,+
E lako yani o koya e dauvakarusa na veimatanitu.+
E biuta mai na nona vanua me vukica na nomuni vanua me domobulataki.
Na nomuni koro ena vakarusai me kua ni dua e tiko kina.+
9 “Ena siga oya,” e kaya o Jiova, “ena rere na lomana na tui,+
Kei na lomadra na turaga,
Era na domobula na bete, era na kidroa na parofita.”+
10 Au kaya sara: “Isa, kemuni na Turaga Cecere Duadua Jiova! Oni vakacalai ira dina na tamata qo+ kei ira e Jerusalemi, oni kaya, ‘Oni na tiko vakacegu,’+ ni sa tu e domo i keimami na iseleiwau.”*
11 Ena gauna oya ena tukuni vei ira na tamata qo kei Jerusalemi:
“E dua na cagi katakata mai na veidelana talasiga
Ena liwava sobu na goneyalewa ni* noqu tamata,
E sega ni liwa mai me ceburaka se vakasavasavataka.
12 Au vakarota me liwa na cagi kaukaua mai na veivanua qori.
Au na tukuna qo na noqu lewa me baleti ira.
13 Raica! Ena lako mai o koya me vaka na o ni uca,
Kei na nona qiqinivalu me vaka na cagi kaukaua.+
E totolo na nona ose, e bera na ikeli.+
Eda rarawa, nida sa vakarusai!
14 Mo vuya tani na ca mai lomamu Jerusalemi, mo bula kina.+
Ena vakacava na dede ni nomu nanuma tiko na ka ca?
15 Ni dua na domo e vakarogoya tiko na itukutuku mai Tani,+
E tukuna tiko na ka ca mai na veiulunivanua e Ifireimi.
16 Moni tukuna qori ina veimatanitu,
Moni vakarogoya vei Jerusalemi.”
“Era lako mai na vanua yawa na sotia,*
Era na tabalaka na domodra ena koro kece e Juta.
17 Era voliti koya mai na yasana kece me vakataki ira na ivakatawaniwere,+
Ni talaidredre vei au o koya,”+ e kaya o Jiova.
18 “Ena sauti iko ga na nomu ivalavala kei na ka o cakava.+
E mosimosi na kemu itotogi,
Ni lauta sara ga na lomamu!”
19 Oilei na noqu rarawa,* na noqu rarawa!
E mosi sara ga vakalevu na lomaqu.*
E tavatukituki na utoqu e lomaqu.
20 E kacivaki na veitaravi ni leqa,
Ni sa vakarusai na vanua taucoko.
E vakarusai vakasauri na noqu valelaca,
E totolo wale ga na noqu ilati.+
21 Ena vakacava na dede ni noqu raica tiko ga na kaunikuila,
Meu rogoca tiko ga na rorogo ni davui?+
22 Nira sesewa na noqu tamata,+
Era sega ni kauaitaki au.
Era gone yalowai, era sega ni yalomatua.
Era qaseqase sara ni vakayacora na ka ca,
Ia era sega ni kila na caka vinaka.
23 Au vakaraica na vanua, au raica ni sa lala, sa biu wale tu.+
Au dagava na lomalagi, e sega na kena rarama.+
24 Au vakaraica na veiulunivanua, au raica ni yavavala,
E sakure na veidelana.+
25 Au vakararai, au sega ni raica na tamata,
Era dro na manumanuvuka kece ni lomalagi.+
26 Au vakararai, au raica ni sa veikau na loga ni kauvuata,
Sa basuraki kece na kena koro.+
Ena vuku i Jiova,
Ena waqawaqa ni nona cudru.
27 Ni qo na ka e kaya o Jiova: “Ena lala na vanua taucoko,+
Au na sega ni vaqeavutaka vakadua.
29 Ena domodra na dauvodo ose kei ira na vakadakaititi,
Era dro na lewenikoro taucoko.+
Era lako ina loma ni veikau,
Era kabata na vatu.+
Sa biu tu na koro kece,
E sega ni dua me tiko kina.”
30 Ia qo ni o sa rusa, na cava o na cakava?
O dau vakaisulu damudamu,
Mo ukutaki iko ena iukuuku koula,
O vakalevutaka na matamu ena iboro* loaloa.
Ia e sega na betena nomu ukucavu,+
Nira cati iko o ira na garovi iko tiko,
31 Niu rogoca e dua na domo e vaka na domo ni yalewa tauvimate,
E vaka na yaluma ni yalewa e vakasucuma na imatai ni luvena,
Na domo ni goneyalewa ni Saioni ni cegulevu tiko.
E kaya ni dodoka ruarua na qeteqeteniligana:+
“Au sa rarawa niu oca ena vukudra na dauveivakamatei!”