Jeremaia

41 Ena ikavitu ni vula e lako yani o Isimeli+ na luvei Necanaia na luvei Ilisama na kawa vakatui,* e dua vei ira na nona vakailesilesi liu na tui, kei na tini na tamata vei Kitalaia na luvei Eikami e Misipa.+ Nira kanavata tiko e Misipa 2 e qai tucake o Isimeli na luvei Necanaia kei na tini na tamata eratou tomani koya me ratou mokuti Kitalaia na luvei Eikami na luvei Safani ena iseleiwau. E mani vakamatei koya e lesia na tui Papiloni me lewa na vanua. 3 E mokuta tale ga o Isimeli na Jiu kece era tomani Kitalaia e Misipa, kei ira na sotia ni Kalitia era tiko e kea.

4 Ni oti e rua na siga nona vakamatei o Kitalaia, ni se sega ni dua e kila, 5 era lako mai e 80 na tamata mai Sikemi,+ mai Sailo,+ kei Samaria.+ E toro na kumidra, e dresudresulaki tu na nodra isulu, era tavatavalaki ira,+ ra qai taura tiko e ligadra na isoro kakana kei na drega boivinaka+ mera kauta ina vale i Jiova. 6 E mani biuti Misipa mai o Isimeli na luvei Necanaia me tavaki ira, e tagi ni lako tiko. Ni sotavi ira e kaya vei ira: “Meda lako vei Kitalaia na luvei Eikami.” 7 Ia nira yaco yani ena lomanikoro e vakamatei ira o Isimeli na luvei Necanaia kei ira na nona tamata qai biuti ira ena loma ni ikeliniwai.

8 Ia eratou kaya vei Isimeli na tini na tamata eratou maliwai ira tiko: “Mo kua ni vakamatei keitou ni vunitaki tu ena were na neitou witi, na varile, na waiwai, kei na denioni.” E mani sega ni vakamatei ratou kei na tacidratou o koya. 9 E biuta o Isimeli na yagodra na tamata e vakamatea ena dua na ikeliniwai levu e cakava o Tui Esa ena vuku i Tui Pasa e Isireli.+ Qo na ikeliniwai e vakasinaita kina o Isimeli na luvei Necanaia na yagodra na tamata e vakamatea.

10 E kauti ira vakavesu na vo ni lewe i Misipa+ o Isimeli, wili kina o ira na luvena yalewa na tui kei ira kece na vo e Misipa e lesia vei Kitalaia+ na luvei Eikami o Nipusaretani na iliuliu ni yadra me raici ira tiko. E kauti ira vakabobula o Isimeli na luvei Necanaia, e lako sara yani vei ira na Amoni.+

11 Ni rogoca o Joenani+ na luvei Karea kei ira kece na iliuliu ni mataivalu era tomani koya na ka ca kece e vakayacora o Isimeli na luvei Necanaia, 12 era kauti ira kece na tamata mera lai valuti Isimeli na luvei Necanaia, era raici koya ena bati ni wai levu* e Kipioni.

13 Era marau vakalevu na tamata kece era tiko vata kei Isimeli nira raici Joenani na luvei Karea kei ira kece na iliuliu ni mataivalu era tomani koya. 14 Era vuki sara mera lesu vei Joenani na luvei Karia na tamata kece e kauta vakabobula o Isimeli mai Misipa.+ 15 Ia e drovaki Joenani o Isimeli na luvei Necanaia kei na walu na tamata me ratou lako vei ira na Amoni.

16 O Joenani na luvei Karea kei ira kece na iliuliu ni mataivalu era tomani koya era kauti ira na vo ni lewe i Misipa era vakabula mai vei Isimeli na luvei Necanaia, ni vakamatei Kitalaia+ oti na luvei Eikami. Era kauta lesu mai Kipioni na tamata, o ira na sotia, na yalewa, na gone, kei ira na vakailesilesi lelevu. 17 Era mani vakaicili ena burenivulagi nei Kimami volekati Peceliema,+ nira lako tiko mera yaco yani i Ijipita,+ 18 ena vukudra na Kalitia. Era rerevaki ira ni vakamatei Kitalaia na luvei Eikami o Isimeli na luvei Necanaia, a lesia na tui Papiloni me lewa na vanua.+