Na Bai kei Jerusalemi

Meda raica mada na ka e yaco ena vica na yabaki e liu. A veiqaravi tiko vei Tui Atakisekise o Niemaia na Jiu ena koro o Susani mai Perisia. E gole mai Juta o tacina qai tukuna vua e dua na itukutuku rogo ca: ‘E leqataki nodra bula na Isireli era lesu i Jerusalemi. E se bera ni tara tale na bai kei na matamatanikoro era vakarusa na kai Papiloni.’ E rarawa o Niemaia, e vinakata me lai veivuke, mani masulaka me vakadonuya na tui.

E raica na tui ni matararawa voli o Niemaia. E kaya: ‘Au se sega ni raici iko mo va qo. Cava e leqa?’ E kaya o Niemaia: ‘Na cava meu sega ni matararawa kina ni rusa tu na noqu koro o Jerusalemi?’ E taroga na tui: ‘Cava o vinakata meu cakava?’ Gauna vata qori e masu lo o Niemaia. Oti e kaya sara: ‘Au kerea meu lai tara tale na bai kei Jerusalemi.’ E vakadonuya o Tui Atakisekise, e raica tale ga me taqomaki o Niemaia ena nona ilakolako balavu. E lesi koya me kovana e Juta qai vakarautaka na kau ni matamatanikoro.

Ni yaco i Jerusalemi o Niemaia, e lai vakaraica sara na bai ni koro. E soqoni ira na bete kei ira na turaga qai kaya vei ira: ‘Sa vakaloloma sara ga. Meda vakavinakataka.’ Era duavata na Isireli mani tekivu na tara bai.

Ia era vakalialiai ira na Isireli eso na meca, era kaya: ‘E rawa mada ga ni vakabalea na fokisi na bai oni tara tiko.’ Era sega ni kauaitaka qori na tamata cakacaka, era tomana ga nodra tara bai. E toso cake tiko ga na bai, e kaukaua tale ga.

Era vinakata na meca mera valuti Jerusalemi mai na veiyasana. Era rere na Jiu nira rogoca qori. Ia e kaya o Niemaia: ‘Ni kua ni rere ni tokoni keda o Jiova.’ E lesia eso mera yadravi ira na cakacaka, era sega ni ravuravu rawa na meca.

Ena loma ga ni 52 na siga, e tara oti na bai kei na matamata. E soqoni ira kece na Livai o Niemaia e Jerusalemi ena kena vakatabui. E tuvanaka me rua na matasere. Era lako cake ena delanibai nira muria na ikabakaba donuya na Matamata ni iKeliniwai. Nira yaco i cake, e muri ena yasana imatau e dua na matasere, e muri ena yasana kadua na ikarua ni matasere. Era muria qori mera wavokita na koro. Era uvu biukila, qiri sibali, na api ra qai sere vei Jiova. E lako o Esera kei na dua na matasere, e lako o Niemaia kei na kena ikarua mera qai sota ena valenisoro. Era marau ra qai vakacaboisoro kece vei Jiova na tagane, yalewa kei na gone. E voqa yawa na nodra marau.