Tauca na Witi ena Siga ni Vakacecegu

Eratou sa gole qo ina vualiku, e Kalili, o Jisu kei na nona tisaipeli. Sa vulaitubutubu ra qai tu ena were na witi. Eratou tauca sara na tisaipeli eso na witi ni ratou sa viakana. E donuya tu qori na Siga ni Vakacecegu ra qai vakararai tu na Farisi.

Era sa via vakamatei Jisu rawa tiko eso na Jiu mai Jerusalemi nira tukuna ni beca na Siga ni Vakacecegu. Qo era sa beitaki ratou na tisaipeli na Farisi ena ka ratou cakava. “Raica! Eratou cakava na nomu tisaipeli na ka e vakatabui ena Siga ni Vakacecegu.”​—Maciu 12:2.

Era kaya na Farisi ni tauci na witi qai qiliraki sa wili me tatamusuki kei na samusamu. (Lako Yani 34:21) E dodonu me marautaki qai veivakabulabulataki vakayalo na Siga ni Vakacecegu, ia sa veivakaocai tale nodra lawa na Farisi me baleta na siga qori. E vakadodonutaka nodra rai cala o Jisu ena rua na ivakaraitaki e laurai kina ni sega ni nakita o Jiova me vakaibalebaletaki va ya nona lawa ni Siga ni Vakacecegu.

A cavuti Tevita kei ira na nona tamata o Jisu me imatai ni ivakaraitaki. Ni ratou viakana ena dua na gauna, ratou curu ina valenisoro qai kania na madrai e dau cabori vua na Kalou. O ira ga na bete era rawa ni kania na madrai qori ni sa kau laivi mai qai biu yani na madrai vou me cabori e mata i Jiova. Ia eratou sega ni cudruvi o Tevita kei na nona tamata ni ratou kania qori ena vuku ni ituvaki eratou tu kina.​—Vunau ni Soro 24:5-9; 1 Samuela 21:1-6.

E kaya o Jisu ena ikarua ni ivakaraitaki: “Oni sega ni wilika ena Lawa na nodra dau cakacaka tu ga na bete ena valenisoro ena Siga ni Vakacecegu ra qai sega ni cala kina?” A tukuna tiko o Jisu nira dau vakamate manumanu mada ga ena Siga ni Vakacecegu na bete me isoro ra qai cakava eso tale na itavi ena valenisoro. E kaya o Jisu: “Ia au tukuna vei kemuni, sa tu qo e dua e uasivia na valenisoro.”​—Maciu 12:5, 6; Tiko Voli Mai na Lekutu 28:9.

E yavutaka tale ena iVolatabu o Jisu nona ivakamacala tarava: “Ke oni kila na ibalebale ni vosa qo, ‘Au vinakata na yalololoma, au sega ni vinakata na isoro,’ ke oni sega ni vakalewai ratou qo ni sega ni dua nodratou cala.” Sa qai tinia: “Ni Turaga ni Siga ni Vakacecegu na Luve ni tamata.” E vakaibalebaletaka tiko o Jisu e keri na dua na udolu na yabaki ni veiliutaki ni Matanitu ni Kalou ena vakilai kina na vakacegu.​—Maciu 12:7, 8; Osea 6:6.

Dua na gauna balavu e vakabobulataka voli kina na kawatamata o Setani, vakavuna me levu tiko ga na ivalavala voravora kei na ivalu. Ia sa na oti qori ena Siga ni Vakacecegu levu se ni sa veiliutaki o Karisito, nida sa na vakila na vakacegu eda diva qai vinakata tu.